Бунёду бозсозии 72 иншоот дар нақша

То фарҷоми соли 2022 дар вилояти Хатлон 72 иншооти соҳаи тандурустӣ таъмиру бозсозӣ хоҳанд шуд.
 Аз 72 иншооти дар нақша буда, аллакай 44 адади он таъмиру аз нав сохта шуда, дар боқимонда корҳои таъмиру сохтмонӣ бо маром идома доранд.
Аз Раёсати тандурустӣ дар вилояти Хатлон ба “Сафо” иттилоъ доданд, ки барои таъмиру бунёди иншооти мавриди назар беш аз 43 миллион сомонӣ масраф шудааст. 
Гуфта шуд, ки иқдоми мазкур 47 фоиз аз ҳисоби Вазорати тандурустӣ ва ҳифзи иҷтимоии аҳолии кишвар ва беш аз 50 дарсад аз ҳисоби маблағгузории шаҳру ноҳияҳои вилоят амалӣ хоҳад шуд. Инчунин дар ин кор соҳибкорони ватанӣ ва шарикони рушд низ ҳиссагузорӣ хоҳанд кард.
Баъди пурра мавриди истифодабарӣ қарор гирифтани 72 иншоот, хизматрасонии тиббӣ ба аҳолӣ беҳтар шуда, барои беш аз 100 нафар мутахассисон ҷойҳои нави корӣ фароҳам хоҳад шуд. 
Сулаймон СУЛТОН