Таъмиру бозсозии 94 маркази саломатӣ

Бо ибтикори Вазорати тандурустӣ ва ҳифзи иҷтимоии аҳолии Ҷумҳурии Тоҷикистон дар ҳашт ноҳияи вилояти Хатлон 94 маркази саломатии деҳотӣ таъмиру бозсозӣ мешаванд.
Ба иттилои сардори Раёсати тандурустӣ дар вилояти Хатлон Шайдулло Шарифзода, аллакай 17 адади онҳо мавриди баҳрабардорӣ қарор дода шуда, дар 56 иншооти дигар корҳои сохтмонӣ бо маром идома доранд.
Гуфта шуд, ки иқдоми мазкур дар доираи Лоиҳаи “Инкишофи барвақтии кӯдакон барои густариши сармояи инсонӣ дар Тоҷикистон” амалӣ гардида, баҳри беҳтар намудани сифати хизматрасонии тиббӣ ба аҳолӣ мусоидат хоҳад кард. 
-Бозсозии марказҳои саломатии деҳотӣ дар ноҳияҳои Вахш – 9 адад, Дӯстӣ – 2, Ҷайҳун – 7, Қубодиён – 15, Кӯшониён – 13, Абдураҳмони Ҷомӣ – 7, Восеъ – 34 ва ноҳияи Ҳамадонӣ – 7 адад ба нақша гирифта шуда, баъди мавриди баҳрабардорӣ қарор гирифтанашон бо муосиртарин таҷҳизоти тиббӣ муҷҷаҳҳаз карда мешаванд, - гуфт Ш. Шарифзода. 
Сулаймон СУЛТОНОВ,