Бунёди 270 иншоот дар нақша

Дар маркази маъмурии вилояти Хатлон – шаҳри Бохтар то ҷашни 35 – солагии Истиқлолияти давлатии Ҷумҳурии Тоҷикистон бунёди 270 иншооти таъиноти гуногун ба нақша гирифта шудааст, ки аллакай зиёда аз 10 адади он мавриди баҳрабардорӣ қарор дода шуд.
Тавре зимни суҳбат мудири бахши меъморӣ ва шаҳрсозии Мақомоти иҷроияи маҳаллии ҳокимияти давлатии шаҳри Бохтар Валиҷон Ятимзода иброз кард, аз иншооти ба нақша гирифташуда 64 адади он бинои истиқоматии баландошёна буда, 59 адади дигар марказҳои савдою хизматрасонӣ мебошанд. Инчунин то ин ҷашни фархуна, 16 иншоот дар соҳаи маориф, панҷ адад дар соҳаи тандурустӣ, панҷ иншооти соҳаи фарҳанг ва варзиш, се иншооти соҳаи обтаъминкунӣ ва 18 адад дигар иншоот бунёд хоҳанд шуд. 
Зикр шуд, ки дар ин баробар таъмири 58 истгоҳ ва 10 километр роҳҳои ҳудуди шаҳр низ дар назар аст.  
Ҷиҳати эълон шудани солҳои 2022 – 2026 ҳамчун Солҳои рушди саноат дар шаҳр бунёди 18 корхона ва коргоҳҳои саноатӣ ба нақша гирифта шудааст. 
Дар натиҷаи андешидани тадбирҳои судманд, то инҷониб панҷ корхона бо таъсиси 37 ҷои нави корӣ ба фаъолият оғоз кардааст. То охири сол боз се корхонаи саноатии дигар, аз қабили корхонаи истеҳсоли гӯгирд, корхонаи истеҳсоли қубурҳои азбестӣ ва нуқтаи забҳи чорво ба истифода дода мешавад. 
Сулаймон СУЛТОНОВ