КӮЛОБ. ТАҶЛИЛИ РӮЗИ ФАЛАК

  Ҳамасола 10-уми октябр дар мамлакат Рӯзи фалак бо шукуҳӯ шаҳомати хоса таҷлил карда мешавад. Ба ин муносибат санаи 8 октябри соли ҷорӣ дар Қасри фарҳанги ба номи Рустами Абдураҳими шаҳри Кӯлоб чорабинии бошукӯҳ доир гардид.
Дар он намояндагони Мақомоти иҷроияи ҳокимияти давлатии шаҳри Кӯлоб, шоирону адибон, омӯзгорони муассисаҳои таълимӣ ва дӯстдорони жанри фалак иштирок доштанд.
Нахуст, меҳмонон аз намоиши ҳунарҳои мардумии шаҳр, аз қабили гулдӯзию чакандӯзӣ, қуроқдӯзӣ, чӯбтарошиву кандакорӣ ва дигар навъҳои ҳунарии мардумӣ дидан намуда, ба ҳунари волои онҳо баҳои баланд доданд.
Маросими тантанавӣ бахшида ба Рӯзи фалакро  муовини раиси шаҳри Кӯлоб
Даминзода Арафамо оғоз намуда, аз номи роҳбарияти шаҳр ҳамагонро ба Рӯзи фалак табрику таҳният гуфтанд. Гуфта шуд, ки барои мо мардуми Тоҷикистони соҳибистиқлол, хусусан сокинони шаҳри Кӯлоб мояи ифтихор ва сарфарозист, ки бо эъҷози баланди ҳунар тӯли асрҳо дар рушди фарҳанги миллӣ ва умумиҷаҳонӣ саҳми арзанда гузошта истодаем. Тавре ки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон  иброз доштаанд: “Ватани Чакан ва ватани Фалак шаҳри Кӯлоб аст”.
Дар ин рӯз   ба як қатор ҳунармандони  шаҳри Кӯлоб барои  хизматҳои назаррас ноил гардидан ба дастовардҳои пурсамари меҳнатӣ, саҳми арзанда гузоштан дар рушди соҳаи фарҳанг  Сипосномаи раиси шаҳри Кӯлоб тақдим карда шуд.
Дар охир чорабинии фарҳангӣ аз тамошои   наворҳои видиоӣ аз ҷараёни қабулшавии жанри Фалак дар ЮНЕСКО ва барномаи омоданамудаи фалаксароёни шаҳри бостонии Кӯлоб пешниҳоди иштирокчиён карда шуд.
Далер Шарифов