20 май 10:03АСОСӢ / Ахбор / Ҷамъият / Иҷтимоъ / Маърифат ва тандурустӣ / Маслиҳати муфид

ШУЪБАИ ҶАРРОҲИИ ҶОҒУ РӮЙ БА ФАЪОЛИЯТ ОҒОЗ КАРД

Дар Маркази стамотологии вилояти Хатлон имрӯз 20 май, шӯъбаи ҷарроҳии ҷоғу рӯй ба фаъолият оғоз кард.

Дар ин бора котиби матбуотии Раёсати тандурустӣ дар вилояти Хатлон Сайраҳмон Назриев ба "Сафо" иттилоъ дод.

Номбурда гуфт, ки ин шӯъба аз 10 кат иборат буда, 5 кат барои калонсолон ва 5 кати дигар барои кӯдакон пешбинӣ шудааст.

Иттилоъ дода шуд, ки то ин муддат чунин шӯъба дар Беморхонаи клиникии вилоятии ба номи Бӯрӣ Воҳидов фаъолият дошт.

Гуфта шуд, ки дар шӯъбаи навташкил тамоми дастгоҳу таҷҳизоти лозимӣ аз ҷониби Вазорати тандурустӣ ва ҳифзи иҷтимоии аҳолии мамлакат ва Мақомоти иҷроияи ҳокимияти давлатии вилояти Хатлон таъмин карда шуда, мутахассисони он дар хориҷи кишвар, аз ҷумла давлатҳои Федератсияи Россия ва Гурҷистон аз таҷрибаомӯзӣ гузаштаанд. Феълан дар маркази мазкур тамоми ҷарроҳии ҷоғу рӯй ба роҳ монда шудааст ва корафтодагон метавонанд аз хизматрасонии босифати ин марказ истифода намоянд.

Дар маросими ба фаъолият оғоз кардани маркази мазкур сардори Раёсати тандурустии вилояти Хатлон Иброҳим Мӯсозода ва дигар масъулон иштирок намуда, аз фаъолияти он аз наздик шинос шуданд.

Гуфтан ба маврид аст, ки бинои нави Маркази стаматологии вилояти Хатлон 27 октябри соли 2021 бо иштироки Асосгузори сулҳу ваҳдати миллӣ-Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон мавриди истифода қарор дода шуд.

-Марказ дорои шуъбаҳои амбулаторӣ, ҷарроҳӣ, муолиҷавӣ, дандоншинонӣ, шуъбаи кӯдакону наврасон ва шуъбаи ҷарроҳии ҷоғу руй мебошад. Дар марказ 25 нафар табибон, аз ҷумла 10 нафар табибони ҷавон кору фаъолият мекунанд,-гуфт С. Назриев.

С. СУЛТОН

Похожие новости:

Добавить комментарий