Субъектҳои хоҷагидорӣ санҷида шуданд

Аз ҷониби кормандони Раёсати Хадамоти назорати давлатӣ дар соҳаи меҳнат, муҳоҷират ва шуғли аҳолӣ дар вилояти Хатлон давоми соли сипаригардида 514 субъектҳои хоҷагидории ҳудуди вилоят мавриди санҷиш қарор гирифтанд. 
Ҳамза Бобозода, сардори Раёсати болозикр зимни нишасти матбуотӣ дар ин бора маълумот дода гуфт, ки аз санҷишҳои гузаронидашуда, 461 санҷиш ба масъалаҳои меҳнат, 41 санҷиш ба масъалаҳои бехатарии меҳнат ва риояи стандартҳо, 5 санҷиш ба масъалаи муҳоҷират ва 7 санҷиши дигар ба масъалаи шуғли аҳолӣ рост меояд. 
Гуфта шуд, ки дар натиҷаи санҷишҳои анҷомёфта 1999 ҳолати қонунвайронкуниҳо ошкор карда шуд, ки аз ин шумора 1855 ҳолат ба масъалаҳои меҳнат, бехатарии меҳнат ва риояи стандартҳо, 102 ҳолат дар самти экспертизаи давлатии шароити меҳнат, 23 ҳолат дар самти муҳоҷират ва 19 ҳолат ба самти шуғли аҳолӣ иртибот доранд. Дар натиҷа бо дахолати Раёсат 8 миллиону 816 ҳазору 231 сомонӣ ба буҷети давлатӣ ва шаҳрвандон пардохт карда шуд. 
Инчунин барои содир кардани ҳуқуқвайронкуниҳои маъмурӣ дар соҳаи меҳнат, муҳоҷират ва шуғли аҳолӣ, соли гузашта ба 87 нафар корфармоён дар ҳаҷми 113 ҳазору 152 сомонӣ ҷарима таъйин карда шудааст.
-Соли гузашта дар ташкилоту муассисаҳои ҳудуди вилоят 14 ҳолати ҳодисаҳои нохуш дар истеҳсолот ва бемориҳои касбӣ ба қайд гирифта шудааст, ки дар натиҷа ба маблағи 242 ҳазору 904 сомонӣ ҷуброни яквақта ва кумакпулӣ пардохт карда шудааст,- гуфт Ҳамза Бобозода.
Сулаймон СУЛТОН