ҶОИ ТУ ХОЛӢ НАМОНАД ДАР ҶАҲОН

Вақте ба гӯш садои модар мерасад, хотират ҷамъу дилат беғам. Зеро ӯ фариштаи дуогӯи Илоҳист, ки нияту амалаш танҳо аз барои хайри тану ҷони фарзанд ва баракоти рӯзгори осоиштаи ӯст. Ин неъмати муқаддас ягона нафарест, ки на танҳо моро ба дунёи ҳастӣ меорад, балки бо меҳру муҳаббати модаронаи худ бароямон ақлу хирад, одобу ахлоқ ва маърифати инсониро меомӯзонад. Тинати ӯ поку мусаффост, чеҳрааш пурнуру гуворост.

Инсоният дар зиндагии пуршебу фароз ба ҳолатҳое сар мезанад, ки мушкилкушои он танҳо як каф дуои Модар аст. Дуое, ки қалбҳоро равшан ва инсонҳоро сабзу хуррам мекунад. Аз ин ҷост, ки номи ӯ, қадру манзалату зебу зиннати ӯ як умр бо мост ва он ҳеҷ аз хотираҳо зудуда намешавад.

Бузургони дар осори пурғановати худ модарро тавсиф карда, ӯро як тани чанд ҷон гуфтаанд. Чунки қалби ӯ барои ҳар як фарзанд метапад, рӯҳу равонаш то абад бо ӯ мемонад. Дар байте устод Лоиқ Шералӣ аҷаб зебо гуфтааст:

Сӯзани ту аз сутуни қасри тилло қимат аст,

Рӯи нуронии ту аз рӯи дунё қимат аст.

Бе ту хуш фоле намонад дар ҷахон,

Ҷои ту холӣ намонад дар ҷахон.

Рўзи модар ба ҳамаи занону бонувон фархунда бод. Бодо, ки ҳамеша зинатбахши зиндагии мо бошанд!

Мусозода Шодӣ,

сардори Сарраёсати ҳифзи муҳити зисти вилояти Хатлон

Похожие новости: