ШАБЕҲИ МЕССӢ

  Муҳаммад Муҳиддинов дар сикаву сурат шабеҳи футболбози аргентинии машҳури олам, Қаҳрамони ҷаҳон Леонел Мессӣ аст ва дар майдон ҳам кӯшиш мекунад, ки мисли ӯ маҳорати баланд  нишон диҳад. Дар мавсими соли 2022 футболбози беҳтарини Лигаи дуюм аз дастаи “Кӯшон”-и ноҳияи Кӯшониён дониста шуд ва дар мулоқоти раиси вилояти Хатлон бо варзишгарон бо Ифтихорномаи Мақомоти иҷроияи ҳокимияти давлатии вилояти Хатлон сарфароз гардид. Муҳаммад 26 сол дошта ҳаёти худро бе футбол тасаввур карда наметавонад.

  Аз хурдӣ меҳри футбол дар дилам нақш баста буду ҳамарӯза  ҳамроҳи ҳамсолон дар майдончаи деҳа ба бозии футбол машғул мешудем, - иброз дошт дар оғози суҳбат Муҳаммад. – Дар хонаводаи мо ҳама мухлиси бозии футболанд. Ин буд, ки барои ман ҳама шароитро фароҳам месохтанд, то дар оянда футболбоз шавам. Аз овони хурдсолӣ бозиҳои Леонел Мессиро бо шавқ тамошо мекардам ва дар дил орзу доштам, ки ба монанди ӯ футболбозӣ хуб шавам. Дар ҳамаи бозиҳои футболи мактаб фаъолона иштирок карда, кӯшиш мекардам, ки аз худ маҳорати хуб нишон диҳам. Ҷароҳатҳое, ки ҳангоми бозӣ мебардоштам маро рӯҳафтода намекард ва ҳамин, ки захмҳоям сиҳат мешуданд боз бозиро идома медодам. Рӯзҳо мегузаштанду шавқи футбол дар дилам зиёдтар ҷӯш мезад. Чун бузургтар шудам, заҳматҳоям натиҷа оварданд ва дар чандин мусобиқаҳои футбол фаъолона иштирок мекардаму ба дастаи хеш кумак мерасонидам. Шаҳди пирӯзиро, ки мечашидем, рӯҳбаланд мешудем ва ин маро водор мекард, ки футбол маъвои зиндагиям шудаасту бояд ба роҳи хеш идома бидиҳам, - бо хушнудӣ қисса кард ин ҷавони варзишгар.
   Идеалӣ ӯ дар футбол Леонел Мессӣ аст. Ба қавли тағояш Хушмуҳаммад Қадриддинов, ки ӯ низ дӯстдорӣ бозии футбол аст, ҳар вақте клуби футболи Барселона, ки Леонел Мессӣ дар он солҳои зиёд бозӣ кардааст, ғалаба мекард Муҳаммад аз хурсандӣ дар курта намеғунҷид. Агар мабодо рафту ба шикаст мувоҷеҳ мешуд, гиря гулӯгираш мекард ва беихтиёр ашк аз чашмонаш ҷорӣ мешуд. 
Бародари Муҳаммад Сиратулло Муҳиддинов низ футболбозӣ бомаҳорат аст. Дар дили ӯ низ шавқи футбол ҷӯш мезанад ва дар аксари мусобиқаҳо ҳамроҳи Муҳаммад бозӣ мекунад.
   Чанд сол пеш Муҳаммад бо амри тақдир ба шаҳри Самараи Федератсияи Россия ба муҳоҷират рафт. Дар баробари кор дар муҳоҷират вақт ёфта, ба футбол машғул мешуд. Чун аз худ маҳорати баланд нишон медод, ба қавле зуд “харидор” пайдо кард. Масъулини клуби варзишии “Крилья советов”-и шаҳри Самара ӯро ба ин даста ҷалб карданд. Дар ҳайати ин клуби машҳури шаҳри Самара Муҳаммад хуб ҳунарнамоӣ кард ва дар як мавсим ба задани голҳои зиёд даст ёфт. 
   Дар ҳайати ин клуб ҳамаи шароит барои мо бозингарон муҳайё буд, - изҳор дошт дар идомаи суҳбат Муҳаммад. – Аммо орзуманди он будам, ки дар ягон тими меҳани худ бозӣ карда, шарафи Тоҷикистони азизро баланд бардорам. Баъди баргаштанам ба Тоҷикистон масъулини дастаи “Кӯшон”-и ноҳияи Кӯшониён, ки ман дар ин ноҳия ба дунё омадааму дар ин ҷо ба воя расидам, маро даъват намуданд, то дар ҳайати ин даста ҳунарнамоӣ кунам. Бе дудилагӣ ин даъватро пазируфтам ва айни ҳол дар ҳайати ин даста дар Лигаи дуюм бозӣ менамоям, - афзуд ӯ.
  Ба гуфти директори Мактаби варзишии ноҳияи Кӯшониён Парвиз Азимзода, Муҳаммад дар баробари футболбози хуб будан, бо хулқу атвори писандидааш намунаи ибрат аст. Хурду калонро ҳурмат мекунаду бо ҳамаи ҳамдастаҳояш муносибати хуб дорад. Чунон хушахлоқ аст, ки ягон маротиба аз даҳонаш ҳарфи ноҷое нашунидаем. 
-Бо пайвастани Муҳаммад ба дастаи “Кӯшон” пешравиҳо дар ин даста зиёд шуданд, - гуфт Парвиз Азимзода.  Дар мавсими соли 2022 дастаи “Кӯшон” барандаи Ҷоми вилояти Хатлон шуд ва Муҳаммад бо задани 20 гол ба дарвозаи ҳарифон бозингари беҳтарини Ҷоми вилояти Хатлон дар соли 2022 интихоб гардид. Умедворем, ки дар оянда низ бо нишон додани бозии хуб Муҳаммад ба дастовардҳои зиёде ноил мегардад ва шарафи ноҳияи Кӯшониёнро баланд мебардорад, - афзуд дар идома сарвари Мактаби варзишии ноҳияи Кӯшониён Парвиз Азимзода.
   Муҳаммад Муҳиддинов изҳори қаноатмандӣ аз он дорад, ки имрӯз дар Тоҷикистони биҳиштосо бо таваҷҷуҳу дастгириҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон барои ҷавонон тамоми шароитҳои мусоид фароҳам оварда шудаанд. 
   Пешвои муаззами миллат ҷавононро неруи ояндасози миллат меҳисобанд. Бунёди майдончаҳои варзишии замонавӣ дар маҳаллаҳо гувоҳӣ аз он медиҳад, ки таваҷҷуҳи Давлату Ҳукумат ба ин қишри ҷомеа дар сатҳи баланд аст. Инчунин, бо дастгириҳои бевоситаи раиси Маҷлиси миллии Маҷлиси Олии Ҷумҳурии Тоҷикистон, раиси шаҳри Душанбе муҳтарам Рустами Эмомалӣ, футбол дар кишварамон рушд карда истода, тимҳои миллии футболи Тоҷикистон ба дастовардҳои назаррас ноил шуда истодаанд. Бинобар ин, азм намудаам, ки бо саъю кӯшиши дучанд дар мусобиқаҳои ояндаи футбол маҳорати хуб нишон дода, парчамбардори ноҳияву вилоят ва Тоҷикистони азиз бошам, - мегӯяд Муҳаммад.
Сулаймон СУЛТОНОВ