МАҶМААИ ИСТИҚЛОЛ

 Дар арафаи таҷлил аз 31-умин солгарди Истиқлоли давлатии Ҷумҳурии Тоҷикистон, 8 сентябри соли ҷорӣ, дар шаҳри Душанбе бо иштироки Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон ва Раиси Маҷлиси Миллии Маҷлиси Олии Ҷумҳурии Тоҷикистон, Раиси шаҳри Душанбе муҳтарам Рустами Эмомалӣ Майдони «Истиқлол» ва Маҷмааи рамзи «Истиқлол» ифтитоҳ ёфт. Дар майдони «Истиқлол» беш аз 200 нафар сокинони маҳаллӣ, ки шумораи зиёди онҳоро занон ташкил медиҳанд, бо ҷойи кор таъмин гардиданд. 
Маврид ба зикр аст, ки 26 майи соли 2018 аз тарафи Ҳукумати Ҷумҳурии Тоҷикистон дар бораи таъсиси Комиссияи байниидоравӣ оид ба гузаронидани озмуни кушод байни шахсони воқеӣ ва ҳуқуқии ватанию хориҷӣ ҷиҳати интихоби беҳтарин лоиҳаи ангоравии Майдони «Истиқлол» бо Маҷмааи меъмории рамзи «Истиқлол» дар шаҳри Душанбе фармоиш ба имзо расида буд. Дар ин озмун, ки 11 марти соли 2020 аз ҷониби аъзои комиссия ва мутахассисони соҳа ҷамъбаст гардид, 32 лоиҳа пешниҳод гардида буд. Лоиҳа бо рамзи «Тоҷ», ки аз ҷониби гурӯҳи эҷодии Сарраёсати меъморӣ ва шаҳрсозии Мақомоти иҷроияи ҳокимияти давлатии шаҳри Душанбе таҳти роҳбарии Раиси шаҳри Душанбе Рустами Эмомалӣ таҳия гардид, сазовори ҷойи якум шуд. Ин лоиҳа бо бартариҳои афзалиятдорифодагари тамоми талаботи озмун ва рамзи давлатдорию таъриху тамаддуни оламшумули миллати тоҷик мебошад. Ҳангоми таҳияи Лоиҳа бо рамзи «Тоҷ» лоиҳакашон ҳамчун асос ба рамзи «дарахти ҳаёт» такя намуданд, ки он ғояву мазмуни васеъро ифода ва таҷассум менамояд. Аз ҷумла, «дарахти ҳаёт» бо реша, тана ва шохаҳои он рамзи зиндагии ҷовидона ва сарсабзию устувории ҳаёт, тоҷпоя – рамзи пойдору устувор ва бардавом нигоҳ доштани тоҷ, ҳафт гунбази гирдогирди муҷассама рамзи 7 қабати замину осмон, 7 иқлим, 7 ранги асосии табиат ва 7 зинаи ташаккули илму маърифат ва худшиносию  ҷаҳоншиносии инсониятро ифода менамояд. Маҷмааи майдони «Истиқлол» аз бахшҳои алоҳида иборат буда, дар маркази боғ бино ёфтааст, ки аз берун атрофи онро 14 деворнигораи андозаи 9 бар 5,20 метр иҳота намудаанд. Аз 121 метр баландӣ иборат будани Маҷмааи «Истиқлол» рамзӣ аст, яъне қисми поёнии маҷмаа 30 метр - рамзи 30-солагии Истиқлоли давлатӣ ва қисмати болоӣ 91 метр мазмуни дар соли 1991-уми асри гузашта ба даст овардани Истиқлолро ифода менамояд. Масоҳати умумии маҷмааи рамзи «Истиқлол» 11 ҳазору 900 метри мураббаъро дар бар гирифта, майдони зери сохтмон 4 ҳазору 761 метри мураббаъ мебошад. Дар қисмати болои маҷмаа тоҷи қутраш 8 метра, ки аз титан сохта шудааст, ҷойгир мебошад. Дар рамзи «Истиқлол» тоҷ ҳамчун рамзи давлатдорӣ, Истиқлолият, соҳибдавлативу соҳибтамаддунӣ ва таърихи омӯзандаи миллати куҳанбунёди тоҷикро таҷассум менамояд.Пояи маҷмаа пирамидаи ҳаштрӯя буда, аз 7даромадгоҳ иборат мебошад.Яке аз ҷойҳои ҷолиби маҷмаа майдони тамошои он мебошад, ки дар ошёнаи 14, дар сатҳи 94 метр ҷойгир аст. Майдони тамошо доирашакл буда, дорои 4 дурбини калонҳаҷм мебошад. Масоҳати умумии Майдони «Истиқлол» 30 гектарро дар бар гирфта, аз ин 2,7 гектари онро макони баргузории чорабиниҳои сиёсию фарҳангӣ ташкил медиҳад. Дар майдони «Истиқлол» бо ибтикори Сарвари давлат дар давоми ду сол зиёда аз 7,5 ҳазор бех дарахтони ҳамешасабзу ороишии нодир шинонида шудааст.
Баъди ба истифода додани Майдони «Истиқлол» ин мавзеъ майдони асосию марказӣ, қалби пойтахт ва каъбаи умеди тоҷикистониён ва тоҷикони ҷаҳон гардид. Зеро дар ин ҷо рамзи истиқлол ва озодӣ, ки хоҳишу талоши миллати сарбаланди тоҷик аст, гузошта шудаааст.