Наҷотдиҳандагони хатлонӣ ба Туркия мераванд

Ҷамшед Маҳмадзода, сардори Раёсати Кумитаи ҳолатҳои фавқулода ва мудофиаи гражданӣ дар вилояти Хатлон зимни нишасти матбуотӣ иттилоъ дод, ки 8 нафар наҷотдиҳанда аз Раёсати онҳо барои кумак расонидан ба сокинони зарардида аз заминларзаи Туркия сафарбар хоҳанд шуд.
Қайд гардид, ки ин ҳашт нафар аз беҳтарин мутахассисони Раёсат буда, таҷрибаи хуби корӣ доранд. 
Қарор аст, ки онҳо ҳамроҳ бо дигар наҷотдиҳандагони ҷумҳурӣ рӯзи 8 феврали соли равон аз Фурудгоҳи байналмилалии Душанбе ба Туркия парвоз кунанд.
-То бартараф шудани оқибатҳои заминларза онҳо дар Туркия хоҳанд буд, - гуфт Ҷамшед Маҳмадзода.
Ёдовар мешавем, ки 6-уми феврали соли ҷорӣ дар Ҷумҳурии Туркия заминларзаи шадиде ба вуқўъ пайваст, ки дар натиҷа сокинони зиёде ба ҳалокат расида, беш аз ду ҳазор биноҳои баландошёна фурӯ рафтанд. 
Сулаймон СУЛТОНОВ