Таъмиру бозсозии роҳҳо дар Кӯшониён

  Бо ташаббуси соҳибкорони маҳаллӣ ва маблағгузории Вазорати нақлиёти Ҷумҳурии Тоҷикистон соли 2022 бо харҷи беш аз 1,8 миллион сомонӣ роҳҳои автомобилгард ва пулу қубурҳои ноҳияи Кӯшониён таъмиру бозсозӣ шудаанд.
Тавре Фирӯз Насруллоев, сардори Муассисаи давлатии нигоҳдории роҳҳои автомобилгарди ноҳияи Кӯшониён зимни суҳбат иброз кард, соли гузашта аз ҳисоби Вазорати нақлиёти мамлакат 682 ҳазор сомонӣ маблағ ҷудо гардида буд, ки аз ин ҳисоб 120 километр роҳ таъмири ҷорӣ, 18 пулу 12 қубур таъмири пурра ва дар 120,5 километр роҳ хатҳои уфуқӣ кашида шуданд. Инчунин аз ин ҳисоб дар роҳҳои ҳудуди ноҳия 55 аломати роҳ насб карда шуд.
Ҳамчунин соли сипаригардида соҳибкорон 8,6 километр роҳро сангфарш, 2 километри дигарро таъмири асосии асфалтпӯш ва ду пули дигарро бозсозӣ карданд, ки дар маҷмӯъ маблағи масрафшуда 1 миллиону 149 ҳазор сомониро дар бар мегирад. 
-Барои бемамоният сипарӣ намудани давраи тирамоҳу зимистони имсола, дар анбори муассиса 290,4 метри кубӣ омехтаи қуму намак, 30 тонна намаки техникӣ, 1500 литр сӯзишвории дизелӣ ва як тонна ангишт захира карда шудааст, - гуфт Ф. Насруллоев.
Дар мувозинати Муассисаи давлатии нигоҳдории роҳҳои автомобилгарди ноҳияи Кӯшониён 34,8 километр роҳҳои байналмилалӣ, 16,9 километр роҳҳои ҷумҳуриявӣ, 178,4 километр роҳҳои аҳамияти маҳаллӣ, 100 адад пул бо дарозии 1458 метр ва 297 адад қубурҳо ба қайд гирифта шудааст. 
Сулаймони СУЛТОН