Таҷдиди роҳ идома дорад

Бо дастгирии давлати Ҷопон тариқи грант марҳилаи сеюми роҳи автомобилгарди Душанбе-Хуросон-Бохтар, аз Қизилқалъа то Бохтар бо дарозии 9,2 километр бомаром идома дорад. 
Тавре Музаффар Холиқов, сармуҳандиси Муассисаи давлатии Идораи хоҷагии роҳҳои автомобилгарди минтақаи Бохтари вилояти Хатлон зимни суҳбат иттилоъ дод, маблағи сохтмон 30 миллион доллари амрикоиро дар бар гирифта, он моҳи марти соли ҷорӣ мавриди баҳрабардорӣ қарор дода мешавад.
-Айни замон дар сохтмони мазкур 390 нафар мутахассисон ба кор ҷалб шудаанд, ки аз онҳо 367 нафар коргарони маҳаллӣ ва 23 нафар мутахассисони хориҷӣ мебошанд, гуфт М. Холиқов.
Дар ин сохтмон кор тибқи нақша бомаром идома дошта, то ба имрӯз беш аз 75 фоизи корҳо ба анҷом расонида шудаанд. Дар роҳи байналмилалии Душанбе – Бохтар байни роҳ пурра бо деворҳои ҳимоявӣ ҷудо карда шуда, бехатарии воситаҳои нақлиёт пурра таъмин мебошад. 
Сулаймон СУЛТОНОВ