Зиёда аз 8 километр роҳ таъмир карда шуд

 

Бо ибтикори Вазорати нақлиёти Ҷумҳурии Тоҷикистон, мақомоти маҳаллӣ ва соҳибкорон дар давоми 10 моҳи сипаригардидаи соли ҷорӣ, зиёда аз 8 километр роҳҳои мошингарди ноҳияи Вахш яклухт мумфарш карда шудаанд.
Наҳтулло Олимов, сардори Муассисаи давлатии нигоҳдории роҳҳои автомобилгарди ноҳияи Вахш зимни суҳбат иброз кард, ки аз ҳисоби соҳибкорони маҳаллӣ бо харҷи 1 миллиону 200 ҳазор сомонӣ 3,5 километр роҳ ва 3 пули мошингузар пурра аз таъмир бароварда шуд.
Инчунин аз ҳисоби Вазорати нақлиёт, дар ин давра бо харҷи 141 ҳазор сомонӣ 2 пули мошингузари дигар таъмир карда шудааст. 
-Аз ҳисоби мақомоти маҳаллӣ бошад, дар 10 моҳи сипаригардидаи соли ҷорӣ, 165 ҳазор сомонӣ ҷудо шуда, роҳҳои маҳаллии ҳудуди ноҳияи таъмири асосию ҷорӣ карда шуданд. Боз дар назар аст, ки аз ҳисоби буҷети маҳҳаллӣ рӯзҳои наздик 300 ҳазор сомонии дигар ҷудо карда шавад, - гуфт Н. Олимов.

Сулаймон СУЛТОНОВ