Маҷаллаи Сафо
Маслиҳати муфид
Номаҳо
НАФАҚА – КАФОЛАТИ ИҶТИМОИИ ДАВЛАТ БА ШАҲРВАНДОН
Яке аз самтҳои муҳими сиёсати иҷтимоии давлат ва Ҳукумати Ҷумҳурии Тоҷикистон дастгирии табақаҳои ниёзманди аҳолӣ ва таъмини ҳифзи иҷтимоии шаҳрвандон мебошад. Ҳамасола баланд бардоштани андозаи нафақаҳо, кумакпулиҳо ва дигар пардохтҳои иҷтимоӣ далели таваҷҷуҳи пайвастаи давлат ба беҳтар намудани сатҳи зиндагии мардум аст.
Оид ба тартиби таъйин ва пардохти нафақа, навъҳои нафақа ва дигар масъалаҳои марбут ба соҳаи ҳифзи иҷтимоӣ бо сардори Раёсати Агентии суғуртаи иҷтимоӣ ва нафақаи назди Ҳукумати Ҷумҳурии Тоҷикистон дар вилояти Хатлон Қобилҷон Файзализода мусоҳибае анҷом додаем, ки пешниҳоди хонанда месозем.
– Аввалан дар хусуси синни ба нафақа баромадани шаҳрвандон дар Ҷумҳурии Тоҷикистон маълумот медодед?
– Тибқи Қонуни Ҷумҳурии Тоҷикистон «Дар бораи нафақаҳои суғуртавӣ ва давлатӣ», синни ба нафақа баромадан барои мардон 63 ва барои занон 58 солагӣ муқаррар шудааст. Ҳамзамон, барои баъзе гурӯҳҳои шаҳрвандон имтиёзҳо пешбинӣ гардидаанд. Аз ҷумла, заноне, ки панҷ нафар ё бештар аз он фарзанд таваллуд намуда, онҳоро то синни ҳаштсолагӣ тарбия кардаанд ва дорои на камтар аз 20 соли собиқаи корӣ мебошанд, метавонанд аз синни 53-солагӣ ба нафақа бароянд.
Андозаи нафақа аз собиқаи корӣ ва ҳаҷми музди меҳнати шаҳрванд вобаста буда, дар раванди таъйини нафақа тавассути барномаи электронӣ ҳисоб карда мешавад.
– Шаҳрвандоне, ки бори аввал ба нафақа мебароянд, бояд ба куҷо муроҷиат намоянд?
– Барои таъйини нафақа шаҳрванд бояд ба раёсат ё шуъбаи Агентии суғуртаи иҷтимоӣ ва нафақа дар маҳалли истиқомати худ муроҷиат намоянд.
– Дар бораи навъҳои нафақа маълумот медодед.
– Тибқи қонунгузорӣ дар Тоҷикистон ду гурӯҳи асосии нафақа мавҷуданд: суғуртавӣ ва давлатӣ.
Ба нафақаҳои суғуртавӣ дохил мешаванд:
нафақаи суғуртавӣ аз рӯи синну сол;
нафақаи суғуртавӣ аз рӯи маъюбӣ;
нафақаи суғуртавӣ аз рӯи маҳрум шудан аз саробон.
Ба нафақаҳои давлатӣ дохил мешаванд:
нафақаи иҷтимоӣ аз рӯи синну сол;
Нафақаи иҷтимоӣ аз рӯи маъюбӣ;
Нафақаи иҷтимоӣ аз рӯи маҳрум шудан аз саробон.
– Нафақаи шаҳрвандоне, ки дар хориҷа, мисол дар Федератсияи Русия фаъолият мекунанд, чӣ гуна таъйин мешавад?
– Барои шаҳрвандони Тоҷикистон, ки дар Федератсияи Русия фаъолияти меҳнатӣ доранд, таъйини нафақа дар асоси Созишномаи байни Ҷумҳурии Тоҷикистон ва Федератсияи Русия оид ба ҳамкорӣ дар соҳаи таъмини нафақа амалӣ мешавад. Давраи фаъолияти меҳнатии шаҳрванд ҳам дар Тоҷикистон ва ҳам дар Русия ба ҳисоб гирифта шуда, нафақа мутобиқи қонунгузории ҳар ду давлат таъйин ва пардохт мегардад.
– Тартиби ҳисоб намудани нафақа чӣ гуна аст?
– Андозаи нафақа пеш аз ҳама аз собиқаи корӣ ва музди меҳнати шаҳрванд вобаста мебошад. Тибқи қонун, барои таъйини нафақаи суғуртавӣ шаҳрванд бояд на камтар аз 60 моҳи собиқаи суғуртавӣ дошта бошад.
Ҳисобкунии нафақаҳои суғуртавӣ тавассути барномаи электронии таъйини нафақа анҷом дода мешавад. Нафақаҳои давлатӣ бошанд, тибқи меъёрҳои муайяншуда дар шаҳру ноҳияҳо таъйин мегарданд.
– Ба андешаи баъзе шаҳрвандон нафақаи онҳо, махсусан барои давраи фаъолияти меҳнатии то истиқлолият, кам ҳисоб мешавад. Сабаб дар чист?
– Таъйини нафақа дар ҳама давру замон аз ду омил – собиқаи корӣ ва музди меҳнат вобаста аст. Ҳар қадаре ки собиқа ва музди меҳнат бештар бошад, ҳамон қадар андозаи нафақа низ зиёд мегардад.
– Давлат барои беҳтар намудани вазъи иҷтимоии нафақахӯрон чӣ тадбирҳо меандешад?
– Ҷумҳурии Тоҷикистон ҳамчун давлати иҷтимоӣ пайваста барои беҳтар намудани сатҳи зиндагии шаҳрвандон чораҳои зарурӣ меандешад. Тавре Президенти Ҷумҳурии Тоҷикистон муҳтарам Эмомалӣ Раҳмон дар Паёми навбатии худ ба Маҷлиси Олӣ таъкид намуданд, аз 1 сентябри соли 2026 нафақаҳои суғуртавӣ, меҳнатӣ ва иҷтимоӣ, инчунин, иловапулиҳо ба онҳо бо назардошти сатҳи таваррум, вале на камтар аз 15 фоиз индексатсия (зиёд) карда мешаванд.
Ин иқдом барои боз ҳам беҳтар намудани шароити зиндагии нафақахӯрон равона шудааст.
– Ташаккур барои суҳбат!
– Саломат бошед!
Аъзам Бобоев, шаҳри Бохтар
Добавить комментарий
Ахбор
БОНУИ МАТИНИРОДА 13:39НАФАҚА – КАФОЛАТИ ИҶТИМОИИ ДАВЛАТ БА ШАҲРВАНДОН 13:32БОХТАР. БОЗСОЗИИ МАҶМААИ “ВАҲДАТ” ОҒОЗ ШУД 14:02АЗ ҚАЪРИ ГИЛИ СИЯҲ ТО АВҶИ ЗУҲАЛ 13:58РАИСИ ВИЛОЯТИ ХАТЛОН БО РАИСИ ШӮРОИ ДИРЕКТОРОНИ ШИРКАТИ SHAANXI APPLE GROUP CO., LTD. МАСЪАЛАҲОИ РУШДИ ҲАМКОРИҲОИ САРМОЯГУЗОРӢ ВА БОҒДОРИРО БАРРАСӢ КАРДАНД 16:52ЭҲЁИ АДОЛАТИ ТАЪРИХӢ 12:56ДАР ВИЛОЯТИ ХАТЛОН НАТИҶАҲОИ РУШДИ ИҶТИМОИЮ ИҚТИСОДИИ НИМСОЛАИ АВВАЛИ СОЛИ 2026 ҶАМЪБАСТ ГАРДИДАНД 15:47Ҳамоиш таҳти унвони "Ин ҷаҳонро нигар бо чашми хирад" 12:36
Маҷаллаи №6-2019
Серхонандаҳо
Паёми шодбошии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати қабули қатъномаи Созмони Милали Муттаҳид таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036»
ЁВОН. МАРКАЗИ САЛОМАТИИ НАВУ ЗАМОНАВӢ БУНЁД МЕШАВАД
НОРАК. 194 ИНШООТИ ТАЪИНОТИ ГУНОГУН БУНЁД ШУД
БОХТАР. ТАРАБХОНАИ “KFC” БА ФАЪОЛИЯТ ОҒОЗ НАМУД
БОХТАР. ФУТБОЛИ ЗАНОНА ДАР МЕҲВАРИ ТАВАҶҶУҲ
РОҲИ АВТОМОБИЛГАРДИ ЁВОН-ВАҲДАТ-НОРАК БОЗСОЗӢ КАРДА МЕШАВАД
БОХТАР. БОЗСОЗИИ МАҶМААИ “ВАҲДАТ” ОҒОЗ ШУД
ЯК СИМОЮ ЯК САДО, АММО ДУ САРНАВИШТ
ДАҲСОЛАИ СУЛҲ: ЭЪТИРОФИ ҶАҲОНИИ ТАШАББУСИ ТОҶИКИСТОН
АЗ УМЕД ТО ХАТАР
