Маҷаллаи Сафо
Маслиҳати муфид
Номаҳо
МУЛОҚОТИ РАИСИ ВИЛОЯТИ ХАТЛОН ДАВЛАТАЛӢ САИД БО НАМОЯНДАГОНИ МАГАТЭ: ТАҲКИМИ ҲАМКОРИҲО БАРОИ РУШДИ СОҲАИ ТАНДУРУСТӢ
БОХТАР, 2 июн. Раиси вилояти Хатлон Давлаталӣ Саид бо ҳайати намояндагони Агентии байналмилалии неруи атомӣ (МАГАТЭ) таҳти роҳбарии хонум Стейскал Сандра Мари мулоқот анҷом доданд.
Дар ҷараёни вохӯрӣ масъалаҳои таҳкими ҳамкориҳои дуҷониба дар самти рушди соҳаи тандурустӣ, мубориза бо бемориҳои саратонӣ, такмили ихтисоси мутахассисон ва истифодаи технологияҳои муосири тиббӣ мавриди баррасӣ қарор гирифтанд.
Раиси вилояти Хатлон зимни мулоқот аз сатҳи баланди ҳамкориҳо изҳори қаноатмандӣ намуда, таъкид карданд, ки ин ҳамкорӣ дар солҳои охир барои рушди инфрасохтори тиббӣ ва беҳтар гардидани хизматрасонии тиббӣ ба аҳолӣ саҳми арзанда гузоштааст.
Зикр гардид, ки имрӯз мубориза бар зидди бемориҳои саратонӣ яке аз самтҳои афзалиятноки сиёсати иҷтимоии давлат ба ҳисоб рафта, Ҳукумати Ҷумҳурии Тоҷикистон барои таҳкими заминаи моддиву техникии муассисаҳои тандурустӣ, ҷорӣ намудани технологияҳои нав ва омодасозии кадрҳои баландихтисос тадбирҳои муассир меандешад.
Дар доираи ҳамкориҳои МАГАТЭ бо Ҷумҳурии Тоҷикистон, аз ҷумла вилояти Хатлон, як қатор лоиҳаҳои муҳим амалӣ гардидаанд. Марказҳои саратоншиносии вилоят бо таҷҳизоти замонавии тиббӣ, аз қабили дастгоҳҳои ултрасадо, рентгени рақамӣ, маммографияи рақамӣ ва томографияи компютерӣ таъмин шудаанд, ки барои ташхиси барвақтии бемориҳои саратонӣ ва баланд бардоштани сифати табобат аҳаммияти калон доранд.
Давлаталӣ Саид инчунин аз дастгирии МАГАТЭ дар самти такмили ихтисоси мутахассисони соҳаи тандурустӣ ёдовар шуда, қайд намуданд, ки табибони вилояти Хатлон тавассути барномаҳои байналмилалӣ имкони омӯзиш ва азхудкунии таҷрибаи пешқадами ҷаҳониро соҳиб гардидаанд.
Раиси вилоят омодагии мақомоти иҷроияи ҳокимияти давлатии вилояти Хатлонро барои густариши ҳамкориҳо бо МАГАТЭ дар самтҳои рушди технологияҳои тиббӣ, таҳкими иқтидори кадрӣ ва таъмини амнияти радиатсионӣ иброз намуда, изҳор доштанд, ки натиҷаҳои мулоқоти имрӯза барои татбиқи лоиҳаҳои нав ва рушди минбаъдаи ҳамкориҳо заминаи мусоид фароҳам меоранд.
Бояд таъкид намуд, ки бо дастгирии Ҳукумати Ҷумҳурии Тоҷикистон соли 2022 аз ҷониби МАГАТЭ Барномаи TAD6009 «Бехатаргардонии имконоти ташхисии Маркази вилоятии саратоншиносии шаҳри Кӯлоб» тасдиқ гардид. Дар доираи ин барнома солҳои 2023–2025 ба марказ таҷҳизоти муосири ташхисӣ, аз ҷумла дастгоҳи ултрасадои ESAOTE, рентгенографияи рақамӣ, маммографияи рақамӣ ва томографияи компютерӣ ворид ва насб карда шуданд.
Аз ҷумла, моҳи июли соли 2023 дастгоҳи замонавии ултрасадои ESAOTE ба маблағи зиёда аз 26 ҳазор евро ба марказ дастрас гардид. Соли 2024 дастгоҳи рентгени рақамӣ ба маблағи беш аз 203 ҳазор евро ворид шуда, мавриди истифода қарор гирифт. Моҳи феврали соли 2025 бошад, дастгоҳи маммографияи рақамӣ ба маблағи зиёда аз 141 ҳазор евро насб ва ба истифода дода шуд.
Ҳамзамон, дар доираи барнома як қатор мутахассисони марказ дар хориҷи кишвар курсҳои бозомӯзӣ ва такмили ихтисосро гузашта истодаанд.
Тибқи иттилои пешниҳодшуда, намояндагони МАГАТЭ аз раванди корҳои анҷомёфта изҳори қаноатмандӣ намуда, омодагии худро барои идомаи дастгирии техникӣ ва омӯзиши мутахассисони тоҷик таъкид карданд.
Дар анҷоми мулоқот раиси вилояти Хатлон ба роҳбарият ва намояндагони Агентии байналмилалии неруи атомӣ барои саҳмгузорӣ дар рушди соҳаи тандурустии Тоҷикистон изҳори миннатдорӣ намуда, ба фаъолияти минбаъдаи онҳо комёбиҳои нав орзу карданд.
Хадамоти матбуоти раиси вилояти Хатлон
Добавить комментарий
Ахбор
БЕШ АЗ 432 МИЛЛИОН СОМОНӢ РУХСАТПУЛИИ ОМӮЗГОРОН ПАРДОХТ ШУДААСТ 17:40ПЕШРАФТ ДАР СОҲАИ МАОРИФИ ХАТЛОН: АЗ СОХТМОН ТО ДАСТОВАРДҲОИ ОЛИМПИАДАВӢ 12:36ЗИЁДА АЗ 27 ҲАЗОР ҚОНУНВАЙРОНКУНИҲО ОШКОР КАРДА ШУД 12:30ТАТБИҚИ ЛОИҲАИ “ШАҲРИ БЕХАТАР” ДАР БОХТАР 16:57Дар ноҳияи Абдураҳмони Ҷомӣ 226 иншооти ҷашнӣ мавриди истифода қарор гирифт 13:45ҶАЙҲУН ДАР МАСИРИ РУШДИ УСТУВОР ВА СОЗАНДАГӢ 14:33ТАРБИЯРО АЗ КАДОМ СИННУ СОЛ БОЯД ОҒОЗ КАРД? 14:30БОНУИ МАТИНИРОДА 13:39
Маҷаллаи №6-2019
Серхонандаҳо
