01 май 13:50АСОСӢ / Ахбор / Рушди деҳот, сайёҳӣ ва ҳунарҳои мардумӣ / Ҷамъият / Фарҳанг / Иҷтимоъ / Мақомот

ХАТЛОН. ДАВРИ ВИЛОЯТИИ ФЕСТИВАЛ-ОЗМУНИ ҶУМҲУРИЯВИИ «ЯК МАТОВУ САД РАНГ»

Дар саҳни Театри вилоятии мусиқӣ-мазҳакавии ба номи Ато Муҳаммадҷонови шаҳри Бохтар, даври вилоятии фестивал-озмуни ҷумҳуриявии «Як матову сад ранг» бо иштироки муовини раиси вилояти Хатлон Анзурат Абдусаломзода, меҳмонон ва намояндагони шаҳру навоҳии вилоят баргузор гардид.

Нахуст, меҳмонон аз намоиши ҳунарҳои мардумӣ, ки дар саҳни театр ба маърази тамошо гузошта шуда буд, дидан намуда, бо намунаҳои нодири чакандӯзӣ, сӯзанидӯзӣ, гулдӯзӣ, зардӯзӣ, атласу адрасбофӣ ва дигар навъҳои ҳунарҳои миллӣ шинос шуданд.

Зимни суханронии худ Анзурат Абдусаломзода таъкид дошт, ки фестивал-озмуни мазкур дар асоси амри Президенти Ҷумҳурии Тоҷикистон ва нақша-чорабиниҳои Кумитаи кор бо занон ва оилаи назди Ҳукумати ҶТ бо мақсади ҳифз ва рушди арзишҳои фарҳанги миллӣ роҳандозӣ гардида, ба тарғиби либоси миллӣ, баланд бардоштани мақому манзалати ҳунарҳои мардумӣ ва пешгирии бегонапарастиву тақлидкорӣ равона шудааст.

Қайд гардид, ки чунин чорабиниҳо барои баланд бардоштани эҳсоси ватандӯстӣ, худшиносии миллӣ ва муаррифии фарҳангу тамаддуни ғании халқи тоҷик заминаи мусоид фароҳам оварда, ҳамзамон ба рушди ҳунармандӣ ва таъсиси ҷойҳои нави корӣ мусоидат менамоянд.

Ёдовар мешавем, ки тибқи низомнома, фестивал-озмун дар се давр баргузор гардида, даври аввал дар сатҳи шаҳру ноҳияҳо, даври дуюм дар сатҳи вилоятҳо ва даври ниҳоӣ дар шаҳри Душанбе доир мегардад. Дар он беҳтарин ҳунармандон, тарроҳон ва эҷодкорон аз рӯи номинатсияҳои гуногун, аз ҷумла намоиши либосҳои миллӣ, маҳсулоти дастбоф ва ҳунарҳои мардумӣ байни ҳам рақобат мекунанд.

Дар идомаи чорабинӣ барномаи фарҳангии рангин манзури ҳозирин гардид.

Дар анҷом, ғолибони даври вилоятии фестивал-озмун бо сипоснома ва туҳфаҳои хотиравӣ қадрдонӣ гардида, барои иштирок дар даври ҷумҳуриявӣ роҳхат гирифтанд.

М. Маҳмадалиев

📷: Далер Шарифов

Похожие новости:

Добавить комментарий