14 июн 11:10АСОСӢ / Ахбор / Фарҳанг / Варзиш / Ҷавонон / Маориф / Иҷтимоъ / Маърифат ва тандурустӣ

Хатлон. Беш аз 190 ҳазор нафар кӯдакону наврасон ба истироҳату фароғат фаро гирифта мешаванд

Дар вилояти Хатлон аз 10-уми июни соли равон мавсими фарогирии кӯдакон ба лагеру истироҳатгоҳҳо оғоз гардида, тибқи нақша дар ин мавсим беш аз 190 ҳазору 800 кӯдак ба истироҳату фароғат фаро гирифта мешаванд.

Дар ин бора сармутахассиси шуъбаи таҳсилоти иловагӣ, томактабӣ ва интернатии Раёсати маорифи вилояти Хатлон Ниёзалӣ Ашурзода ба “Сафо” иттилоъ дод.

Номбурда гуфт, ки аз шумораи умумии 190 ҳазору 870 нафар кӯдакон, 6180 нафар ба истироҳатгоҳҳои беруназшаҳрӣ, 11 ҳазору 640 нафар ба истироҳати меҳнатӣ – фароғатӣ, 97 ҳазору 506 нафар ба фароғати таълимӣ, 17 ҳазору 680 нафар ба истироҳати варзишӣ – беҳдоштӣ, 22 ҳазору 300 нафар ба лагерҳои назди муассисавӣ, 6310 нафар аз муассисаҳои интернатӣ ва 29 ҳазору 200 нафар аз муассисаҳои томактабӣ ба истироҳату фароғат фаро гирифта мешаванд.

Иттилоъ дода шуд, ки дар чор мавзеи хушбоду ҳавои шаҳру ноҳияҳои вилояти Хатлон макони истироҳату фароғати кӯдакон ташкил карда шудааст, ки қисмати зиёди хонандагон дар ин мавзеъҳо ба истироҳату фароғат фаро гирифта мешаванд.

Инчунин кӯдакони вилояти Хатлон ба лагерҳои истироҳатии беруназшаҳрии “Ширкент”-и шаҳри Турсунзода, “Ромит” ва “Файзи Истиқлол”-и ноҳияи Варзоб фиристода мешаванд.

Ҳамзамон дар ноҳияи Ховалинг барои ғолибони олимпиадаҳо ва озмунҳои сатҳи ҷумҳуриявӣ аз ҷониби Вазорати корҳои дохилии мамлакат истироҳатгоҳи “Лаёқатмандон” ташкил карда шудааст, ки аллакай 10 нафар ғолибони олимпиадаҳо ва озмунҳо барои истироҳату фароғат ба ин мавзеъ фиристода шудаанд.

Фарогирии наврасону кӯдакон ба истироҳату фароғат дар шаҳру ноҳияҳои вилояти Хатлон то 5-уми августи соли равон идома ёфта, дар се марҳила роҳандозӣ карда мешавад.

С. СУЛТОНОВ

Похожие новости:

Добавить комментарий