23 апр 16:26АСОСӢ / Ахбор / Фарҳанг / Ҷавонон / Маориф / Иҷтимоъ / Шеъру адаб / Чеҳра

"ЗАНИ ШАРҚӢ"

Бо чунин унвон китоби дуюми шоираи ширинкалом Зебунисо Қосимова, ки бо тахаллуси Интизор шеър мегӯяд, рӯи чоп омадааст.

Ин маҷмӯа дар муассисаи нашриявии "Адиб"-и Вазорати фарҳанги Ҷумҳурии Тоҷикистон интишор гардид, пешкаши ҳаводорони каломи бадеи ин шоираи соҳибистеъдод гардидааст.

Маҷмуаи аввалини Зебунисо Қосимова соли 2020 бо номи “Ҳадисе аз шукуфтанҳо” ба дасти хонандагон расида буд.

Дар маҷмуаи дуюмаш Зебунисо Қосимова дар тамоми жанрҳои шеърӣ қувваозмоӣ намуда, ба комёбиҳои беназире ноил гардидааст. Дар “Зани шарқӣ” Зебунисо Қосимова тароватҳои дили як зани эҷодкорро фароҳам оварда, дар онҳо муҳаббати пок, муҳаббат ба Ватан ва васфи манзараҳои ин диёри зеборо ошиқонаву содиқона тараннум намудааст.

Ёдовар мешавем, ки Зебунисо Қосимова ғолиби озмуни ҷумҳуриявии “Фурӯғи субҳи доноӣ китоб аст” буда, ба ҳайси директори муассисаи таҳсилоти миёнаи умумии №33-и ноҳияи Ҷалолиддини Балхӣ кору фаъолият намуда истодааст.

С. СУЛТОНОВ

Дар зер аз эҷодиёти ин шоираи ширинкалом шеъреро бо номи Зани шарқӣ пешкаши ҳаводорони каломи бадеъи ин шоираи нозукхаёл менамоем.

ЗАНИ ШАРҚӢ

Агар ман як зани шарқӣ намебудам,

Агар ойин садди роҳам намегардид,

Раҳо кай карда будам дар миёни кӯча танҳоят?

Сари ҳар як қадам бо остинам пок мекардам

Ғубори роҳ аз поят.

Раҳо кай карда будам бо дигарҳо гуфтугӯятро?

Намемондам

Барад бар сӯи занҳо боди ҳарҷогард бӯятро.

Насиме сила созад тори мӯятро.