РОҲҲО ТАЪМИР ШУДА ИСТОДААНД

 Дар ноҳияи Кӯшониён давоми моҳҳои сипаригардидаи соли ҷорӣ беш аз 110 километр роҳҳо таъмири асосию ҷорӣ карда шуда, ба дарозии беш аз 120 километр хатҳои уфуқию амудӣ кашида шудаанд. 
Ба иттилои сардори Муассисаи давлатии нигоҳдории роҳҳои автомобилгарди ноҳияи Кӯшониён Фирӯз Насруллоев, ин кор бо дастгирии Вазорати нақлиёт, мақомоти маҳаллӣ ва соҳибкорон анҷом дода шудааст.
Барои таъмири роҳҳо аз ҳисоби Вазорати нақлиёти мамлкат 443 ҳазор сомонӣ ва аз ҳисоби мақомоти маҳаллӣ 45 ҳазор сомонӣ ҷудо гардида, роҳҳои ҳудуди ноҳия аз таъмир бароварда шудаанд. Инчунин давоми моҳҳои сипаришуда, аз ҷониби соҳибкорон 555 ҳазор сомонӣ маблағгузорӣ шудааст.
-Дар баробари таъмири роҳҳо инчунин дар ин давра 17 пул ва як қубури қутраш  калон аз таъмир бароварда шуда, дар роҳҳои ҳудуди ноҳия 52 аломати роҳ насб карда шудааст, - гуфт Фирӯз Насруллоев.
Сулаймон СУЛТОНОВ