Маҷаллаи Сафо
Маслиҳати муфид
Номаҳо
1147 НАФАР АЗ МУАССИСАИ ИСЛОҲИИ №3/6-И НОҲИЯИ ЁВОН БА ОЗОДӢ БАРГАШТАНД
Қонуни Ҷумҳурии Тоҷикистон «Дар бораи авф», ки ба муносибати 35-солагии Истиқлоли давлатии Ҷумҳурии Тоҷикистон бо ташаббуси Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон қабул гардид, барои ҳазорон нафар имкони бознигарии зиндагӣ ва оғози роҳи навро фароҳам овард. Татбиқи ин санади башардӯстона на танҳо сарнавишти садҳо маҳкумшударо тағйир дод, балки ба хонаводаҳои онҳо низ шодиву умеди тоза бахшид.
Дар доираи амалисозии ин қонун аз Муассисаи ислоҳии №3/6-и ноҳияи Ёвон 1147 нафар ба озодӣ баромада, ба назди пайвандону наздикони худ баргаштанд. Рӯзи озодӣ барои онҳо ва аҳли оилаашон ба рӯзи фаромӯшнашавандаи дидор, ашки шодӣ ва орзуҳои нав табдил ёфт.
Назди муассиса фазои хос ҳукмфармо буд. Падару модарон, ҳамсарон, фарзандон ва дигар наздикон бо дастаҳои гул ва чашмони пур аз умед мунтазири дидори азизони худ буданд. Лаҳзаҳои вохӯрӣ пур аз эҳсосот буда, ҳар кас шодии худро ба тарзи хос изҳор мекард.
Яке аз афроди ба озодӣ баромада, Аловатшои Шамс, ин рӯйдодро оғози зиндагии нав арзёбӣ намуда гуфт, ки аз иқдоми навбатии башардӯстонаи Президенти Ҷумҳурии Тоҷикистон муҳтарам Эмомалӣ Раҳмон самимона изҳори сипос менамоям. Ин авф барои мо имкони ислоҳи хатогиҳои гузашта, оғози зиндагии нав ва бозгашт ба оғӯши гарми оила ва ҷомеаро фароҳам овард. Мо кӯшиш мекунем минбаъд бо меҳнати ҳалол ва эҳтиром ба қонун зиндагӣ намоем.
Дар байни издиҳом модароне низ буданд, ки солҳои зиёд рӯзи озодии фарзандони худро интизорӣ мекашиданд. Яке аз онҳо Руқия Собирова буд. Ӯ бо ашки шодӣ эҳсосоти худро чунин баён кард: «Имрӯз барои мо рӯзи бузурги хурсандист. Солҳо интизори чунин лаҳза будем. Аз роҳбарияти давлат барои ин иқдоми инсонпарварона миннатдорам. Орзу дорам, ки дар кишвари мо ҳамеша сулҳу оромӣ ҳукмфармо бошад ва ҳар як оила хушбахт зиндагӣ кунад».
Дар чеҳраи озодшудагон пушаймонӣ аз гузашта ва ҳамзамон умед ба фардои нек эҳсос мешуд. Фарух Қосимов, ки низ аз авф баҳра бардошт, гуфт: “Имрӯз яке аз рӯзҳои фаромӯшнашавандаи ҳаёти мост. Бо шарофати сиёсати инсондӯстона ва ғамхоронаи роҳбарияти давлат мо имкони дубора ба ҷомеа баргаштанро пайдо кардем. Ин боварӣ ва эътимод моро водор месозад, ки зиндагии худро ба роҳи дуруст равона кунем».
Ҳар қадаме, ки озодшудагон ба сӯи дарвозаи муассиса мегузоштанд, аз ҷониби наздикону пайвандон истиқбол мегардид. Баҳодур Қурбонзода, яке аз авфшудагон, чунин иброз дошт: «Хурсандии мо ҳадду канор надорад. Авф ба мо бори дигар нишон дод, ки давлат ба ислоҳи инсон ва бозгашти ӯ ба ҷомеа аҳамияти ҷиддӣ медиҳад. Мо ин бовариро қадр намуда, минбаъд кӯшиш мекунем шаҳрвандони шоистаи ҷомеа бошем».
Дар миёни интизорони назди дарвозаи муассиса модари дигаре низ бо чашмони пур аз ашки шодӣ фарзандашро пешвоз мегирифт. Ӯ гуфт, ки
имрӯз орзуи деринааш ҷомаи амал пӯшид. Бозгашти фарзанд ба хона барои ҳар модар хушбахтии бузург аст. Аз чунин ғамхорӣ ва дастгирӣ самимона сипосгузорӣ намуд.
Барои ин афрод саҳифаи нави зиндагӣ оғоз меёбад. Саҳифае, ки бояд бо меҳнати ҳалол, масъулиятшиносӣ, эҳтиром ба қонун ва садоқат ба Ватан навишта шавад. Маҳз ҳамин аст ҳадафи аслии авф – фароҳам овардани имкони бозгашт ба зиндагии шоиста ва саҳмгузорӣ дар рушди ҷомеа.
М. Акрамов,
«Сафо»
Добавить комментарий
Ахбор
БЕШ АЗ 432 МИЛЛИОН СОМОНӢ РУХСАТПУЛИИ ОМӮЗГОРОН ПАРДОХТ ШУДААСТ 17:40ПЕШРАФТ ДАР СОҲАИ МАОРИФИ ХАТЛОН: АЗ СОХТМОН ТО ДАСТОВАРДҲОИ ОЛИМПИАДАВӢ 12:36ЗИЁДА АЗ 27 ҲАЗОР ҚОНУНВАЙРОНКУНИҲО ОШКОР КАРДА ШУД 12:30ТАТБИҚИ ЛОИҲАИ “ШАҲРИ БЕХАТАР” ДАР БОХТАР 16:57Дар ноҳияи Абдураҳмони Ҷомӣ 226 иншооти ҷашнӣ мавриди истифода қарор гирифт 13:45ҶАЙҲУН ДАР МАСИРИ РУШДИ УСТУВОР ВА СОЗАНДАГӢ 14:33ТАРБИЯРО АЗ КАДОМ СИННУ СОЛ БОЯД ОҒОЗ КАРД? 14:30БОНУИ МАТИНИРОДА 13:39
Маҷаллаи №6-2019
Серхонандаҳо
РАИСИ ВИЛОЯТИ ХАТЛОН БО РАИСИ ШӮРОИ ДИРЕКТОРОНИ ШИРКАТИ SHAANXI APPLE GROUP CO., LTD. МАСЪАЛАҲОИ РУШДИ ҲАМКОРИҲОИ САРМОЯГУЗОРӢ ВА БОҒДОРИРО БАРРАСӢ КАРДАНД
ҶАЙҲУН ДАР МАСИРИ РУШДИ УСТУВОР ВА СОЗАНДАГӢ
Дар ноҳияи Абдураҳмони Ҷомӣ 226 иншооти ҷашнӣ мавриди истифода қарор гирифт
БОХТАР. БОЗСОЗИИ МАҶМААИ “ВАҲДАТ” ОҒОЗ ШУД
ТАТБИҚИ ЛОИҲАИ “ШАҲРИ БЕХАТАР” ДАР БОХТАР
ТАРБИЯРО АЗ КАДОМ СИННУ СОЛ БОЯД ОҒОЗ КАРД?
ДАР ВИЛОЯТИ ХАТЛОН НАТИҶАҲОИ РУШДИ ИҶТИМОИЮ ИҚТИСОДИИ НИМСОЛАИ АВВАЛИ СОЛИ 2026 ҶАМЪБАСТ ГАРДИДАНД
ПЕШРАФТ ДАР СОҲАИ МАОРИФИ ХАТЛОН: АЗ СОХТМОН ТО ДАСТОВАРДҲОИ ОЛИМПИАДАВӢ
БЕШ АЗ 432 МИЛЛИОН СОМОНӢ РУХСАТПУЛИИ ОМӮЗГОРОН ПАРДОХТ ШУДААСТ
АЗ ҚАЪРИ ГИЛИ СИЯҲ ТО АВҶИ ЗУҲАЛ
