Маҷаллаи Сафо
Чеҳра
Маслиҳати муфид
Номаҳо
ЯК СИМОЮ ЯК САДО, АММО ДУ САРНАВИШТ
Дар муҳити ҳунар кам иттифоқ меафтад, ки инсон на танҳо бо садо, балки бо симо ва ҳатто лаҳни гуфтораш ба ҳунарманди дигар шабоҳати зиёд дошта бошад. Қаҳрамони ин матлаб – Раҷабалӣ Воҳидов, овозхон ва омӯзгори мактаби санъати бачагонаи ноҳияи Абдураҳмони Ҷомӣ аз ҷумлаи чунин афрод аст.
Солҳост, ки ӯ ба фаъолияти омӯзгорӣ ва овозхонӣ машғул мебошад. Аммо он чизе, ки бештар таваҷҷуҳи мардумро ба худ ҷалб кардааст, шабоҳати ҳайратангези ӯ – ҳам дар симо ва ҳам дар садо ба овозхони маъруфи тоҷик Қурбоналӣ Абдуллоев аст.
Садое, ки аз иҷрои Раҷабалӣ танин меандозад, барои бисёре аз шунавандагон ошно менамояд. То ҷое, ки баъзан ба ӯ бо номи Қурбоналӣ Абдуллоев муроҷиат мекунанд. Албатта, дар олами санъат шабоҳати овозҳо кам нест, аммо шабоҳати ҳамзамони садо, симо ва ҳатто баъзе ҳаракату лаҳни гуфтор воқеияти нодир ба ҳисоб меравад.
ГУМОНИ ЯК ШОГИРД
Яке аз хотираҳои фаромӯшношуданӣ дар зиндагии Раҷабалӣ Воҳидов ба рӯзҳои аввали фаъолияти омӯзгории ӯ рост меояд.
Рӯзе духтараке ҳангоми ворид шудани ӯ ба синфхона ногаҳон аз ҷо мехезад. Нигоҳаш пур аз ҳайрат буду гӯё ба шахсе менигарист, ки дер боз мешиносад. Пеш аз он ки омӯзгор худро муаррифӣ кунад, шогирд бо шавқу ҳаяҷон мегӯяд:
– Устод, ман баромадҳои шуморо аз телевизион бисёр тамошо мекунам ва сурудҳоятонро дӯст медорам.
Раҷабалӣ Воҳидов бо табассуми ором посух медиҳад:
– Духтарам, ман ҳам овозхон ҳастам, аммо он нафаре нестам, ки ту гумон мекунӣ.
Духтарак ҳанӯз ҳам бовар намекард. Симо, садо ва ҳатто тарзи табассум ба ҳадде монанд буданд, ки ӯ худро муқобили Қурбоналӣ Абдуллоев эҳсос мекард.
Ин гуна воқеа дар рӯзгори Раҷабалӣ зиёд рух додааст ва аз ҳамон рӯз сар карда, чунин ҳолатҳо дар зиндагии ӯ такрор мешуданд.
ЗАНГИ ТЕЛЕФОНӢ АЗ “САДОИ ХУД”
Шабоҳатҳои пайдарпай Раҷабалӣ Воҳидовро водор карданд, ки рӯзе бо Қурбоналӣ Абдуллоев аз наздик вохӯрад.
Бо ҳамин ният ӯ ба Кумитаи телевизион ва радиои назди Ҳукумати Ҷумҳурии Тоҷикистон меравад – ҷое, ки он солҳо Қурбоналӣ Абдуллоев сурудҳояшро сабт мекард. Аммо он рӯз мулоқот муяссар намешавад. Раҷабалӣ рақами телефонашро мегузорад, то агар имкон бошад, овозхон бо ӯ тамос бигирад.
Баъди чанд муддат телефони ӯ занг мезанад.
– Гӯширо бардоштаму фикр кардам, ки садои худамро мешунавам, – ба ёд меорад Раҷабалӣ Воҳидов. – Вале он кас худи Қурбоналӣ Абдуллоев буданд.
Ба гуфтаи ӯ, суҳбат самимиву хотирмон гузаштааст. Қурбоналӣ Абдуллоев, ки табъи шӯх доштааст, бо ҳазл гуфтааст:
– «Қабул кунед, ки шумо ҳам Қурбоналӣ ҳастед. Чунки ман инро иҷозат додам».
Ин ҳолат барои Раҷабалӣ хотираи фаромӯшношуданӣ гардид.
ДУ РОҲ – ЯК ҲУНАР
Раҷабалӣ Воҳидов мегӯяд, ки аз монандӣ ба ҳунарманди дӯстдоштаи мардумӣ ифтихор мекунад, аммо мехоҳад пеш аз ҳама бо номи худ ва ҳунари худ шинохта шавад.
– Ман ҳам сабки худро дорам ва мехоҳам мардум маро ҳамчун Раҷабалӣ Воҳидов бишносад, – мегӯяд ӯ.
Ӯ, инчунин аз он афсӯс мехӯрад, ки имкони вохӯрии рӯ ба рӯ ва акси хотиравӣ бо Қурбоналӣ Абдуллоев барояш муяссар нашуд. Шояд тақдир чунин хоста буд: ба яке саҳна ва ба дигаре синфхона.
Қурбоналӣ Абдуллоев ҳанӯз аз овони ҷавонӣ бо садои форам ва таронаҳои дилнишинаш маҳбуби мардум гардид. Ӯ то синни 57-солагӣ дар саҳна ҳунарнамоӣ карда, соли 2021 аз олам чашм пӯшид.
Раҷабалӣ Воҳидов бошад, имрӯз бештар вақти худро ба таълиму тарбияи шогирдон мебахшад. Ӯ дар мактаби санъати бачагона ва инчунин дар муассисаҳои томактабии ноҳия фаъолият дошта, нозукиҳои овозхониро ба кӯдакону наврасон меомӯзонад.
САДОЕ, КИ НОМИ ХУДРО МЕҶӮЯД
Қиссаи Раҷабалӣ Воҳидов танҳо дар бораи шабоҳати зоҳирӣ ё монандии садо нест. Ин ҳикоя бештар аз сарнавишти ду инсон мегӯяд, ки бо вуҷуди монандӣ, ҳар кадоме роҳи хоси худро интихоб кардаанд.
Яке бо саҳна ва таронаҳояш дар хотири мардум монд. Дигаре бошад, бо синфхона, шогирдон ва муҳаббат ба ҳунар зиндагии худро маъно бахшид.
Шояд рӯзе садои Раҷабалӣ Воҳидов низ барои шунавандагон он қадар ошно гардад, ки мардум ҳангоми шуниданаш бигӯянд:
– Ин садои худи Раҷабалӣ Воҳидов аст.
Низоми ИСО
Добавить комментарий
Ахбор
ДАҲСОЛАИ СУЛҲ: ЭЪТИРОФИ ҶАҲОНИИ ТАШАББУСИ ТОҶИКИСТОН 14:53ЁВОН. МАРКАЗИ САЛОМАТИИ НАВУ ЗАМОНАВӢ БУНЁД МЕШАВАД 14:45Қабули қатъномаи Тоҷикистон зери унвони “Даҳсолаи байналмилалии таҳкими сулҳ ба хотири наслҳои оянда” 26.06.2026 12:15Паёми шодбошии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати қабули қатъномаи Созмони Милали Муттаҳид таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036» 12:11ШАРАФ БА ПЕШВО 12:07“АНЪАНАҲОРО ҲИФЗУ ОЯНДАРО БУНЁД МЕКУНЕМ” 11:59ЯК СИМОЮ ЯК САДО, АММО ДУ САРНАВИШТ 11:48ВАҲДАТ – ЗАМИНАИ СУБОТИ МИЛЛӢ 13:46
Маҷаллаи №6-2019
Серхонандаҳо
ФОРУМИ БАЙНАЛМИЛАЛИИ САЙЁҲӢ ДАР ЧИЛДУХТАРОНИ МУЪМИНОБОД
МУЛОҚОТИ РАИСИ ВИЛОЯТИ ХАТЛОН ДАВЛАТАЛӢ САИД БО НАМОЯНДАГОНИ МАГАТЭ: ТАҲКИМИ ҲАМКОРИҲО БАРОИ РУШДИ СОҲАИ ТАНДУРУСТӢ
ДОНОРОНИ ХУН ЗИЁД ШУДААНД
Ҷ. БАЛХӢ. АЗ НАҚША ЗИЁД ИНШООТ БУНЁД ШУД
ДАНҒАРА. МАЙДОНЧАИ НАВИ ВАРЗИШӢ ИФТИТОҲ ГАРДИД
БОХТАР. БЕШ АЗ 11 ҲАЗОР НАФАР КӮДАКОНУ НАВРАСОН БА ИСТИРОҲАТ ФАРО ГИРИФТА МЕШАВАНД
Ҷ. Балхӣ. Мумфаршкунии 6 километр роҳ оғоз гардид
БОХТАР. ФУТБОЛИ ЗАНОНА ДАР МЕҲВАРИ ТАВАҶҶУҲ
ФУРӮҒИ МАЪРИФАТ ДАР ЯК ХОНАДОНИ ТОҶИК
Паёми шодбошии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати қабули қатъномаи Созмони Милали Муттаҳид таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036»
