28 ноя 11:22АСОСӢ / Ахбор / Рушди деҳот, сайёҳӣ ва ҳунарҳои мардумӣ / Ҷамъият / Фарҳанг / Иҷтимоъ

ХУШХАБАР. ЧИЛ (КАБКИ ЗИРАК) ПАРАНДАИ СОЛИ 2026 ЭЪЛОН ШУД

Имрӯз, 28-уми ноябр, дар толори Академияи миллии илмҳои Тоҷикистон озмуни “Парандаи сол – 2026” баргузор гардид, ки лаҳзаҳои он барои дӯстдорони табиат басо хотирмон буданд. Ин чорабинӣ, ки бо ибтикори Академияи миллии илмҳои Тоҷикистон ва Иттиҳоди ҳифзи табиат ва гуногунии биологии ҷумҳурӣ солона ташкил мегардад, ба ҳифзи намудҳои нодири парандагон равона шудааст.

Озмуни “Парандаи сол” нахустин бор соли 1971 дар Олмон роҳандозӣ шуда, аз соли 2008 инҷониб дар Тоҷикистон низ баргузор мешавад. Соли гузашта бо иштироки фаъоли дӯстдорони табиат Дуғдоғ ҳамчун парандаи соли 2025 интихоб гардида буд. Имсол бошад барои дарёфти унвони парандаи сол даҳ намуд, аз ҷумла бедона, дурроҷи сиёҳ, зоғобӣ, доснул, иқгуи даштӣ, чархресак, булбули гардансафед, парандаи кабуд ва дигарон пешниҳод шуданд.

Ноиби президенти АМИТ, доктори илмҳои биологӣ Мирзораҳимзода А.К. ва доктори илмҳои биологӣ Абдусаттор Саидов дар назди ҳозирин таъкид карданд, ки баргузории чунин озмунҳо далели афзоиши дӯстдорони табиат ва таваҷҷуҳи ҷомеа ба ҳифзи парандагони нодир аст. Ҳамчунин, онҳо дар бораи меъёрҳои интихоби номзадҳо, хусусиятҳои биологии парандагон ва 45 намуди парандаҳои шомили Китоби сурхи Тоҷикистон маълумот доданд.

Дар ҷараёни муҳокима дурроҷи сиёҳ, чил ва чанд намуди дигар ҳамчун номзад пешниҳод шуданд. Дар ниҳоят, пешниҳод оид ба интихоби чил (кабки зирак) дастгирӣ ёфт ва ин паранда бо натиҷаи 17 овоз парандаи соли 2026 интихоб гардид.

Чил яке аз намудҳои зебову беозор буда, дар ҳолати нестшавӣ қарор дорад ва ба Китоби сурхи байналмилалӣ дохил шудааст. Ин намуд асосан дар минтақаҳои Зарафшон, поёноби рӯдҳои Кафарниҳон, Вахш, Панҷ ва Бадахшон паҳн гардидааст. Ҷойи зисти он даштҳои санглох ва нимбиёбон буда, одатан 2–3 тухм мегузорад ва дар давоми 20–26 рӯз чӯҷа мебарорад.

Интихоби чил ҳамчун парандаи соли 2026 барои дӯстдорони табиат фоҷеи хурсандиовар гардид. Ин парандаи нодиру зебо, ки болҳояшро васеъ паҳн карда лона месозад ва ҳаёти орому сариштаро пеш мебарад, аз ин ба баъд бештар зери ҳимояи ҷомеа қарор мегирад.

Интихоб шудани чил (кабки зирак) ҳамчун парандаи соли 2026 муборак бод!

Маҳмадалӣ Маҳмадалиев

Похожие новости:

Добавить комментарий