Ваҳдати мо зинда бод

Шукр гӯям, кишвари ман ваҳдатистон гаштааст,

Шаҳру деҳу дашту саҳрояш гулистон гаштааст.

Сар ба гардун Парчаму тобанда шабҳо ахтараш,

Шабчароғи раҳнамои Тоҷикистон гаштааст.

Шукр гӯям дар Ватан осуда мегирам нафас,

Ахтари иқбол аз нав гашта моро дастрас.

Табли шодӣ мезанам то авҷи гардун ҳар замон,

Мебарад аҳли ҷаҳон бар мулки зебоям ҳавас.

Сулҳу осоиш куҷо осон муяссар мешавад,

Гар бародар душмани ҷони бародар мешавад.

Шукри халқи соҳибиқболу тамадунпарвараш,

Рӯзи сахтӣ ворисаш болои минбар мешавад.

Офтоби сулҳи мо партавфишонӣ мекунад,

Мардумаш шукронаи сулҳу амонӣ мекунад.

Нури Истиқлолу Ваҳдат карда равшан оламе,

Бо фараҳ халқи азизам зиндагонӣ мекунад.

Ваҳдати мардум, Худоё, ҷовидонӣ зинда бод,

Халқи мову Сарвари мо то абад поянда бод!

Тоҷикистон – зодбуми тоҷики рӯи ҷаҳон,

Тоҷбарсар, сулҳпарвар, машъали тобанда бод!

Сафар Амирхон

Похожие новости:

Добавить комментарий

Ахбор

Маҷаллаи №6-2019

Серхонандаҳо