Маҷаллаи Сафо
Чеҳра
Маслиҳати муфид
Номаҳо
07 июн 17:03АСОСӢ / Ахбор / Саноат ва кишоварзӣ / Рушди деҳот, сайёҳӣ ва ҳунарҳои мардумӣ / Ҷамъият / Фарҳанг / Иҷтимоъ / Иқтисод / Маслиҳати муфид
Ҳузури зиндагӣ
Аз нақлу қиссаҳои пирони рӯзгордида шунидам, ки то солҳои 50-60-уми қарни гузашта дар бисёр деҳаҳои кишварамон ҷувозҳо ва осиёбҳои сангии обӣ мавҷуд буданд. Вале бо гузашти айём шумораи зиёди онҳо аз байн рафтанд.
Бар асари воқеаҳои ба ҳама маълуми солҳои 90-уми асри гузашта боз зарурати бунёди чунин осиёбу ҷувозҳо ба миён омад. Хусусан, осиёбҳои сангии обӣ ба қавле мисли обу ҳаво ба мардум зарур буд. Осиёбҳои худсози барқӣ талаботи аҳолиро қонеъ гардонида наметавонистанд, зеро орди он ниҳоят пасту бесифат буд. Аз як тараф нарасидани гандум ва аз тарафи дигар дар куҷо орд кардани гандуми ба даст омада мардумро ба мушкилоти сахт рӯ ба рӯ намуд.
Ана дар ҳамин давраи ниҳоят мушкилу вазнин сокини деҳаи Кафтархонаи ноҳияи Восеъ усто Нуриддин мушкилоти мардумро хеле осон намуд.
Аз ҳисоби обҳои чашмаҳои кӯҳи болои деҳа дар масофаи 180 метр наҳри калони обро оварда, дар мавзеи зебою сердарахти деҳа осиёби калону зебои сангӣ бунёд намуд. Инак, зиёда аз 32 сол аст, ки осиёби сангии обии амаки усто Нуриддин ба ҳазорҳо нафар сокинони деҳаҳои ноҳия ва берун аз он хизмат расонида истодааст. Бартарӣ ва афзалияти осиёби сангии обӣ дар он аст, ки қувваи барқ тамоман истифода бурда намешавад.
Вақте ки мо ба деҳаи Кафтархона расидем, аллакай рӯз бегоҳ мешуд. Баъди дидану шинос шудан ба тарзи кори осиёби сангии обии усто Нуриддин, ки хеле бароямон шавқовар буд, ба суроғи ӯ баромадем. Гуфтанд, ки ҳамроҳи фарзандонаш дар замини хоҷагии деҳқонӣ (фермерӣ)-аш, ки дар соҳили дарёи Яхсувоқеъ гардидааст, машғули кишти пахта мебошанд. Баъди тамос гирифтан мо ба пешвози ӯ рафтему вай ба истиқболи мо омад. Чун фаҳмид, ки дар бораи фаъолияти меҳнатиаш, аз ҷумла осиёби сангии обӣ, ки бо дастони муъҷизаофарини ӯ бунёд гардидааст, маводе рӯи чоп меорем, хеле хушнуд гардид. Суҳбат дар дохили осиёб сурат гирифт.
![](/uploads/posts/2024-06/medium/1717761956_whatsapp-image-2024-04-24-at-12_49_36.jpeg)
Тавре ки аз суҳбат маълум гардид, Нуриддин Тағойназаров баъди хатми бомуваффақияти техникуми сохтмони шаҳри Душанбе солҳои зиёд дар хоҷагии Хоҷа Сартези ноҳияи Восеъ ба ҳайси корманди барқ ва бригадири сохтмончиён фаъолият намудааст. Ба ихтироъкорӣ ва сохтани ҳама гуна таҷҳизотҳои сохтмонию барқӣ шавқи беандоза дорад. Ана ҳамин қобилияту истеъдодаш буд, ки соли 1992 барои ҳунари сангтарошӣ ва бунёди осиёбҳои сангии обӣ руҷӯъ намуд. Ҳунари сангтароширо аз якеаз устоҳои ботаҷрибаю номдор бобои Саидиброҳим омӯхт. Ба ғайр аз осиёби сангии обии худаш ҳамроҳи устодаш - бобои Саидиброҳим дар якчанд деҳаҳои ноҳияи Восеъ, Ховалинг ва Кӯлоб, ки ба манбаҳои об наздик буданд, 13 осиёбҳои сангии обӣ сохта, ба мардум доданд. -Зиёда аз 30 сангҳои босифати осиёбӣ тарошида, ба ниёзмандон тақдим намудем. Аммо бисёри он осиёбҳо бо сабабҳои гуногун аз кор монданд, -мегӯяд ботаассуф Нуриддин Тағойназаров.
Осиёби сангии обии усто Нуриддин дар ҳақиқат овозадор буда, дар шафати роҳи калони Восеъ- Тангатовтӣ- Ховалинг воқеъ гардидааст ва муштариёни зиёд дорад. Чӣ тавре ки ба мо маълум гардид, осиёб гандумро хеле босифат орд мекунад. Сирру асрораш дар он аст, ки наҳри оби хунуку мусаффо аз таги санги осиёб мегузарад ва санг гарм намешавад. Аз ин рӯ гандум гарм намешавад ва орд босифат тайёр мешавад. Иқтидори осиёб дар як шабонарӯз барои орд кардани 1,5 тонна гандум мусоидат менамояд. Барои кори мунтазаму босифати осиёб бояд санги он саривақт иваз карда шавад. Ҳар гуна сангҳои муқаррарӣ барои кори осиёб мувофиқ намеояд.
Чӣ тавре ки дар суҳбат усто Нуриддин иброз намуд, ҳамроҳи фарзандонаш сангҳои хосаро аз кӯҳҳои Даштиҷум (90 километр дуртар аз шаҳри Кӯлоб) дастрас карда, ба осиёб меоранд.
Дасти усто гул аст мегӯянд. Аз ҳисоби оби ба зери осиёб омада, қувваи барқ истеҳсол гардида, дохил ва гирду атрофи бинои осиёб ҳамеша равшан аст. Ҳамаи мардуми деҳа ва деҳаҳои гирду атроф аз хизматрасониҳои соҳибони осиёб хурсанду розӣ буда, дар ҳаққашон суханони нек мегӯянд.
Усто Нуриддин ҳамроҳи 4 нафар писаронаш соли 2014 дар шафати осиёбаш дар 0,70 гектар замини ғайрикорам ҳавзи моҳӣ бунёд намуданд. Алҳол дар ҳавз моҳиҳои карп, амури сафед ва зардмоҳӣ парвариш меёбад.
Инчунин дар масоҳати 3,2 гектар замин хоҷагии деҳқонӣ (фермерӣ)-и “Абубакр”-ро ташкил намуданд. Дар як гектар боғ бунёд намуда, дар ду гектари дигар зироатҳои гуногуни кишоварзӣ кишт менамоянд.
Усто Нуриддин Тағойназаров бо шукргузорӣ аз сиёсати хирадмандонаи Пешвои миллат муҳтарам Эмомалӣ Раҳмон тавассути меҳнати ҳалолу бурдборона 22 нафар аъзоёни оилаашро мехӯронаду мепӯшонад ва ҳам дар иҷрои барномаи озуқавории мамлакат саҳми арзанда мегузорад.
Ҳини суҳбат бо усто Нуриддин дар даруни бинои осиёб овози рехтани об ва гардиши санги осиёб, ки донаҳои гандумро маҳин-маҳин орд мекард, ба гӯшам форам садо медод. Беихтиёр мисраъҳои зерини шеърӣ ба хотирам омад:
Рӯзӣ ба нишастан насиби кас нашавад,
Бояд чу осиёб зи пайи обу дона рафт.
Аъзам Бобоев, ноҳияи Восеъ
Добавить комментарий
Ахбор
Меъмори Истиқлол 10:41Меҳри мардум ба роҳҳои оҳанин 13:01ПАРВАРИШИ ПИСТАИ ТУРКИЮ БОДОМИ АФҒОНӢ 16:52Номи наку ёфта аз заҳмати хеш 17:41Бохтар. Тақдими туҳфаҳои Пешвои миллат 17:20Эҳёи дубораи “Вахш”-и Хатлон аз ҳисоби бонувон 13:24ВАХШ. БУНЁДИ ЯК МАКТАБ ВА 54 СИНФХОНАИ ИЛОВАГӢ 16:30РӮЗҲОИ ФАРҲАНГИИ ҚАЗОҚИСТОН ДАР БОХТАР 11:45
Серхонандаҳо
Ҳабибулло Иззатуллозода: “Ҳиссаи маблағҳои буҷети ҷумҳуриявиро кам менамоем.”
ЁВОН. ПАНҶ КОРХОНАИ САНОАТӢ БУНЁД ШУД
Истиқбол аз Истиқлол
Э Ъ Л О Н
КӮЛОБ. 203 ИНШООТ МАВРИДИ БАҲРАБАРДОРӢ ҚАРОР ДОДА ШУД
44 ЧАШМА БОЗСОЗӢ МЕШАВАД
РӮЗҲОИ ФАРҲАНГИИ ҚАЗОҚИСТОН ДАР БОХТАР
Зӯроварӣ дар оила
ХУРОСОН. БУНЁДИ СЕ ИНШООТИ СОҲАИ МАОРИФ ДАР ШАШ МОҲ
Нишондиҳандаҳо назаррасанд