Табрикоти раиси вилояти Хатлон Қурбон Ҳакимзода бахшида ба Рӯзи кормандони милитсия, санаи 10 ноябри соли 2021.

Дар ин давра бо кӯшишҳои пайвастаи ҳамаи сохтори давлатдорӣ, аз ҷумла дар натиҷаи фаъолияти содиқонаи ҳайати шахсӣ ва кормандони мақомоти ҳифзи ҳуқуқ ҳаёти мардуми кишвар дар фазои орому осоишта ва суботи комили сиёсӣ идома дорад.

Бо камоли ифтихор ҳамаи кормандон, собиқадорони мақомоти корҳои дохилӣ ва хизматчиёни ҳарбии Қӯшунҳои дохилиро барои саҳми бисёр арзишманд, дар роҳи эъмори ҷомеаи демокративу ҳуқуқбунёд ва дунявӣ дар Тоҷикистон гузоштан изҳори минатдорӣ баён намуда, барояшон Рӯзи кормандони милитсияи тоҷикро самимона табрику таҳният гуфта, ба ҳамаи кормандони ин ниҳоди пурқудрат тансиҳатӣ, хонаободӣ ва тамоми хушиҳои зиндагиро таманно намуда, дар иҷрои вазифаҳои минбаъда иродаи қавӣ, ҳисси ватандӯстӣ, ҷасорату мардонагиро хоҳонам.

Дар давраҳои вазнини солҳои аввали соҳибистиқлолӣ милитсияи тоҷик ҳамеша дар сафи пеши мубориза бо унсурҳои ҷинояткор, ки халалдор намудани ҳаёти осоиштаи сокинони мамлакат, поймолшавии ҳуқуқ ва озодиҳои инсон, инчунин заиф гардонидани пояҳои давлатдориро мехостанд, қарор гирифта буд.

Аз масъулияту шуҷоатмандии кормандони милитсия ва натиҷаҳои судманди фаъолияти ин мақомоти давлатии имрӯзаи тоҷикон, аз бисёр ҷиҳат ҳамчун кишвари демокративу ҳуқуқбунёд ва озоду ягона пойдор буда, дар ҳоли рушд қарор дорад.

Мақомоти иҷроияи ҳокимияти давлатии вилояти Хатлон барои таҳкими асосҳои моддиву техникии ин сохтори бонуфузи ҳифзи қонунияту тартибот, ба хизмат ҷалб кардани кормандони баландихтисос, беҳтар намудани шароити зиндагӣ ва хизматии ҳайати шахсии Вазорати корҳои дохилӣ мунтазам таваҷҷуҳи хосса зоҳир намуда, хизматҳои кормандони мақомотро ҳамеша қадрдонӣ мекунад ва ҷиҳати беҳтар намудани шароити кору хизмат, баланд бардоштани сатҳи ҳифзи иҷтимоии ҳайати шахсӣ ва тақвият бахшидани заминаҳои моддиву техникии мақомоти корҳои дохилӣ тадбирҳои муассир меандешанд.

Қобили зикр аст, ки кормандони милитсия барои барқарорсозии сохти конститутсионӣ, таъмини оромиву суботи ҷомеа, тартиботи ҷамъиятӣ, ҳуқуқу озодиҳои инсон ва шаҳрванд, яъне волоияти қонун аз лаҳзаҳои нахустини соҳибистиқлолии кишвар дар сафи пеши мубориза бар зидди гурӯҳҳои террористиву экстремистӣ, ҷинояткории муташаккили фаромиллӣ ва дигар қонуншиканиҳо далерӣ ва фидокориву ҷоннисорӣ нишон дода, дар таҳкими нуфузу эътибори давлати мо дар арсаи ҷаҳон саҳми бисёр арзанда гузоштаанд.

Вақте ба таърихи гузаштаи милитсияи тоҷик назар мекунем, саҳифаҳои пур аз корнамоиву ҷоннисориҳои фарзандони бонангу номус ва содиқ ба миллати куҳанбунёду соҳибфарҳангамонро мебинем.

Ҳисси ватандӯстӣ ва садоқату самимият ба уҳдадориҳои хизматӣ дар замири фарзандони бонангу номуси ин мақомот дар солҳои нахустини соҳибистиқлолӣ ҳадафу ниятҳои нопоки душманон ва мақсадҳои ғаразноки онҳоро барбод дод.

Хело ба маврид Асосгузори сулҳу ваҳдати миллӣ - Пешвои миллат, Президенти Ҷумҳурии Тоҷикистон, Ҷаноби Олӣ муҳтарам Эмомалӣ Раҳмон қайд кардаанд, ки «Таъмини тартиботи ҳуқуқӣ ва қонуният, ҳифзи ҳаёти осоиштаи шаҳрвандон вазифаи боифтихор ва масъулиятнок буда, ҷомеа ва давлат ин вазифаҳоро ба дӯши мақомоти корҳои дохилӣ гузоштаанд».

Бо дарназардошти он ки таъмини тартиботи ҷамъиятӣ дар ҳама давру замон яке аз самтҳои афзалиятноки мақомоти милитсия ба шумор меравад, саҳми арзанда, хизмати шабонарӯзӣ ва шуҷоату қаҳрамонии кормандону хизматчиёни мақомоти корҳои дохилӣ дар роҳи барқарор намудани сохти конститутсионӣ, устувор гардонидани сулҳу осоиш ва имрӯза оромии ҷомеа, ҳамчун намунаи олии садоқат ба Ватан ва давлату миллат арзёбӣ мегардад.

Солҳои душвору вазнини гузашта таҷрибаву малакаи касбӣ ва матонату мардонагии ҳайати шахсии мақомоти корҳои дохилиро тақвият бахшида, онҳоро ба муборизаи беамон бар зидди унсурҳои сиёҳкору ҷиноятпеша ва халалдорсозандаи ҳуқуқу озодиҳои шаҳрвандон ва вайронкунандагони тартиботи ҷамъиятӣ ҳидояту раҳнамоӣ карданд.

Имрӯзҳо низ кормандони милитсия анъанаи далериву мардонагӣ ва сарсупурдагиву садоқатмандии худро ба миллату Ватан идома дода, дар ошкор ва пешгирӣ намудани садҳо ҷиноятҳои вазнини хусусияти фаромиллидошта, аз қабили терроризму экстремизм, гардиши ғайриқонунии воситаҳои нашъадор ва силоҳ, савдои одамон, ҳамчунин безарар гардонидани даҳҳо аъзоёни фаъоли гурӯҳҳои силоҳбадасти ҷиноятпеша саҳми босазо гузошта истодаанд.

Саҳми собиқадорони мақомот дар тарбияи ҳайати шахсӣ, роҳнамоӣ ва гузоштани таҷрибаи бою ғании худ дар ҷодаи мубориза бо ҷинояткорӣ хело ҳам калон буда, барои чунин заҳмати онҳо арзи сипос изҳор менамоям.

Вазъияти зудтағйирёбандаи минтақа ва ҷаҳон, аз ҷумла тавсеа пайдо кардани фаъолияти ташкилоту гурӯҳҳои террористиву экстремистӣ, ҷамъ омадани шумораи зиёди гурӯҳҳои ифротӣ дар марзи давлатӣ ва ҷой доштани дигар ҷинояту ҳуқуқвайронкуниҳо дар ҷомеа моро водор месозад, ки ҳушёриву зиракӣ ва масъулияти худро боз ҳам дучанд сохта, омодабошии доимии ҳайати шахсиро барои таъмини тартиботи ҷамъиятӣ, волоияти қонун ва ҳифзи ҳуқуқу озодиҳои шаҳрвандон таъмин созем.

Дар рӯзи таҷлили Иди касбии кормандони милитсия бори дигар минатдории худро барои заҳмату талошҳои шабонарӯзии ҳайати шахсии мақомоти корҳои дохилӣ, ки бо ҳисси баланди ватанхоҳӣ ва ифтихори миллӣ ба хотири ҳимояи манфиатҳои давлат, ҳифзи тартиботи ҷамъиятӣ, волоияти қонун ва иҷрои ҳатмии амру фармонҳои Роҳбари давлат фаъолият мекунанд, изҳор медорам.

Эътимоди комил дорам, ки ҳайати шахсии мақомоти корҳои дохилӣ дар вилоят минбаъд низ дар иҷрои вазифаҳои хизматӣ барои мубориза бо ҷинояткорӣ, таъмин намудани ҳуқуқу озодиҳои шаҳрвандон ва таъмини волоияти қонун содиқона заҳмат мекашанд ва ба халқу Ватан бошарафона хизмат мекунанд.

Бори дигар таҷлили Иди касбиро ба тамоми кормандони мақомоти корҳои дохилӣ табрик гуфта, барояшон саломатӣ, сулҳу субот ва дар фаъолияти минбаъда барору муваффақият орзу менамоям.

Иди касбӣ муборак бошад, ҳомиёни назму тартибот ва фарзандони содиқи Ватан!