Хушхабар аз Анталия

Озодбек Зулфиқоров, хонандаи муассисаи таълимии рақами 23-и ноҳияи Дӯстӣ дар олимпиадаи  "International olympiad Antalya 2022" иштирок намуда, сазовори ҷойи сеюм гаштааст.
Тавре мудири шуъбаи маорифи ноҳияи Дӯстӣ Шаҳноза Маҳмадсаидзода ба “Сафо” иттилоъ дод, ин олимпиадаи байналмилалӣ яке аз озмунҳои бонуфузтарин миёни хонандагон ба шумор рафта, муддати 14 сол аст, ки бо ибтикори Академияи туризми Анталия ва мактаби байналмилалии ЭДУАНТ дар шаҳри Анталияи Ҷумҳурии Туркия баргузор мешавад. Дар ин олимпиада беш аз 2000 иштирокчӣ аз 10 давлати дунёд иштирок менамоянд.
Аз ноҳияи Дӯсти 8 нафар хонандагон ба даври финалии ин озмун роҳхат гирифта, донишу малакаи хешро месанҷанд. 
-Хонандагони ноҳияи Дӯстӣ дар ин озмун нахустин бор аст, ки иштирок мекунанд ва аллакай дар аввалин иштирок соҳиби ҷойи сеюм ва диплом гардиданд, ки ин боиси ифтихори мост. Иштирок дар чунин олимпиадаи сатҳи баланди байналмилалӣ аз он шаҳодат медиҳад, ки хонандагони ноҳияи Дӯстӣ на танҳо дар дохили ҷумҳурӣ, балки берун аз он ҳам метавонанд шаъну шарафи Тоҷикистони азизро дар арсаи ҷаҳонӣ боло бардоранд, - гуфт Шаҳноза Маҳмадсаидзода.
Дар ин олимпиада як гурўҳ хонандагони Литсейи давлатии №1-и шаҳри Бохтар низ иштирок намуда истодаанд. 
Сулаймон СУЛТОНОВ