Маҷаллаи Сафо
Чеҳра
Маслиҳати муфид
Номаҳо
ШУТУРМУРҒПАРВАРӢ ДАР ШАҲРИТУС:
ШАВҚ Ё ТИҶОРАТИ ОЯНДАДОР?
Вақте аксари сокинони деҳоти Тоҷикистон мурғу чорвои одӣ парвариш мекунанд, як ҷавони чорводор дар Шаҳритус ба парвариши шутурмурғ машғул аст – парандае, ки бештар хоси қитъаи Африқо аст, на ҳавлӣ.
Дар деҳоти Тоҷикистон, бахусус минтақаҳои ҷанубӣ, чорводорӣ яке аз манбаъҳои асосии даромад ба ҳисоб меравад. Аммо дар баробари он, тайи солҳои охир баъзе сокинон ба парвариши парандаҳои ғайриодӣ низ рӯ овардаанд, ҳарчанд ин соҳа ҳанӯз рушд накардааст.
Файзулло Собиров, ҷавони чорводор аз ноҳияи Шаҳритус аз зумраи чунин шахсони навовар аст. Ӯ пайваста талош мекунад, ки таҷрибаҳои навро дар амал татбиқ намояд. Ахиран бо харидории шутурмурғ парвариши ин парандаро дар қатори дигар чорвои хонагӣ ба роҳ монд.
– Як сол қабл аз Ҷумҳурии Ӯзбекистон 3 чӯҷаи шутурмурғро харида, ба ноҳияи Шаҳритус овардам, – мегӯяд Ф. Собиров. – Албатта, ҳоло дар давраи омӯзиш қарор дорам. Бо омӯхтани тамоми нозукиҳои парвариш, шумораи шутурмурғро зиёд карда, мехоҳам ба фурӯш гузорам.
Ба нақли ӯ, як сафари омӯзишии ӯ ба Ӯзбекистон шумораи парандаҳои нодири ӯро бештар кард. Шутурмурғ ягона парандае нест, ки ӯ нигоҳубин менамояд. Товус, мурғи даштӣ (фазан), сасарка, кабк, бедона, кафтарҳои товусӣ ё павлин, мурғи марҷон, мурғҳои ороишӣ ва ба ин монанд парандаҳои дигарро ҳам ӯ дар ҳавлиаш парвариш мекунад.
Самти асосии фаъолияти ин ҷавони навовар асосан чорводорист. Ӯ чорвои калони шохдорро харида, фарбеҳ карда, баъдан ба нуқтаҳои гӯшт месупорад ва бо ин васила зиндагии худро таъмин месозад.
Парвариши парандаҳои нодир барои ӯ шавқ ва шуғли писандидаи иловагӣ гаштааст.
– Албатта, ки ҳама мехоҳад даромади худро рушд диҳад, – мегӯяд Файзулло қаҳрамони матлаб. – Вақте дар Ҷумҳурии Ӯзбекистон бо таҷрибаи бародарону дӯстони ӯзбекистониам шинос шудам, пеши худ мақсад гузоштам то ин таҷрибаро дар кишвари худамон ҷорӣ кунам. Фикр мекунам зуд меомӯзаму дар ин самт ҳам муваффақ хоҳам шуд.
Барои парвариши шутурмурғ ҷойи васеъ, ҳавои кушод ва нигоҳубини махсус лозим аст. Ба онҳо ғизои дуруст, девори мустаҳкам ва шароити бехатар лозим мешавад, зеро онҳо калонҷусса ва хеле фаъоланд.
Шутурмурғ, калонтарин паранда дар рӯйи ҷаҳон ба ҳисоб меравад. Баландии он то 2,7 метр ва вазнаш то ба 170 кг мерасад. Ин паранда парвоз карда наметавонад, аммо то 70 км дар як соат метавонад давад. Дар як сол то 40-60 тухм мегузорад. Як тухми он баробар аст ба 20-24 тухми мурғ. Умри шутурмурғ дар шароити хуб метавонад беш аз 40 сол бошад.
Таҷрибаи Файзулло Собиров нишон медиҳад, ки дар шароити деҳот низ метавон ба парвариши парандаҳои нодир машғул шуд. Ҳарчанд ӯ ин ҷодаро ҳамчун шавқ оғоз бахшида бошад ҳам, дар оянда метавонад ба як самти иловагии даромад табдил диҳад.
Н. Исо, “Сафо”
Добавить комментарий
Ахбор
ДАР ВИЛОЯТИ ХАТЛОН НАТИҶАҲОИ РУШДИ ИҶТИМОИЮ ИҚТИСОДИИ НИМСОЛАИ АВВАЛИ СОЛИ 2026 ҶАМЪБАСТ ГАРДИДАНД 15:47Ҳамоиш таҳти унвони "Ин ҷаҳонро нигар бо чашми хирад" 12:36АВФ – ОҒОЗИ САҲИФАИ НАВИ ЗИНДАГӢ 08:291147 НАФАР АЗ МУАССИСАИ ИСЛОҲИИ №3/6-И НОҲИЯИ ЁВОН БА ОЗОДӢ БАРГАШТАНД 14:41БОХТАР. ТАРАБХОНАИ “KFC” БА ФАЪОЛИЯТ ОҒОЗ НАМУД 13:21АВФ – БАХШОИШЕ, КИ САРНАВИШТҲОРО ДИГАР МЕКУНАД 13:18Тоҷикистон – Ватанам 15:38РОҲИ АВТОМОБИЛГАРДИ ЁВОН-ВАҲДАТ-НОРАК БОЗСОЗӢ КАРДА МЕШАВАД 14:39
Маҷаллаи №6-2019
Серхонандаҳо
Паёми шодбошии Президенти Ҷумҳурии Тоҷикистон, Пешвои миллат муҳтарам Эмомалӣ Раҳмон ба муносибати қабули қатъномаи Созмони Милали Муттаҳид таҳти унвони «Даҳсолаи байналмилалӣ оид ба таҳкими сулҳ барои наслҳои оянда, солҳои 2027 – 2036»
ДОНОРОНИ ХУН ЗИЁД ШУДААНД
БОХТАР. БЕШ АЗ 11 ҲАЗОР НАФАР КӮДАКОНУ НАВРАСОН БА ИСТИРОҲАТ ФАРО ГИРИФТА МЕШАВАНД
ЁВОН. МАРКАЗИ САЛОМАТИИ НАВУ ЗАМОНАВӢ БУНЁД МЕШАВАД
НОРАК. 194 ИНШООТИ ТАЪИНОТИ ГУНОГУН БУНЁД ШУД
БОХТАР. ФУТБОЛИ ЗАНОНА ДАР МЕҲВАРИ ТАВАҶҶУҲ
БОХТАР. ТАРАБХОНАИ “KFC” БА ФАЪОЛИЯТ ОҒОЗ НАМУД
РОҲИ АВТОМОБИЛГАРДИ ЁВОН-ВАҲДАТ-НОРАК БОЗСОЗӢ КАРДА МЕШАВАД
ЯК СИМОЮ ЯК САДО, АММО ДУ САРНАВИШТ
ДАҲСОЛАИ СУЛҲ: ЭЪТИРОФИ ҶАҲОНИИ ТАШАББУСИ ТОҶИКИСТОН
