СОДИРОТИ МЕВАҶОТ БЕШ АЗ 40 ФОИЗ

Нақшаи содироти меваю сабзавот аз вилояти Хатлон ба хориҷи кишвар ба андозаи 40,5% иҷро гардид. Дар ин бора Шарофиддин Асомиддинзода, - масъули бахши Агентии содироти назди Ҳукумати Ҷумҳурии Тоҷикистон дар вилояти Хатлон ба «САФО» хабар дод.

Бино ба иттилоъи манбаъ, асосан дар ин давра содироти сабзавот- бахусус пиёз хеле хуб ба роҳ монда шуда, феълан ба хориҷа 36 ҳазору 255,2 тонна пиёз содир карда шудааст. 

- Мавсими содироти меваҷот шурӯъ гардид. Мо нахуст ба содироти олу шурӯъ кардем. Феълан аз навоҳии Ҷалолиддини Балхӣ ва Кӯшониён ба Федератсияи Россия, асосан шаҳри Санкт- Петербург олу содирот намуда истодаем.  Соҳибкорони маҳаллӣ мушкилоти пешоруомадаи ҷаҳониро сарфи назар карда, аллакай беш аз 100 тонна олуро тавассути нақлиёти автомобилӣ равонаи хориҷ намуданд- илова карда Ш. Асомиддинзода.

Гуфта мешавад, ки кишоварзони хатлонӣ имсол ба хориҷа- асосан ба Қазоқистон, Покистон, Афғонистон, Федератсияи Россия ва Қирғизистон беш аз 90 ҳазор тонна меваю сабзавот содирот хоҳанд кард.

АБӮБАКРИ ФАЙЗАЛӢ