Беш аз 350 нафар ҷарима шуданд

Барои сари вақт пешниҳод накардани маълумоти оморӣ, соли гузашта 357 нафар шахсони масъули ташкилоту идораҳои давлатии вилояти Хатлон ба маблағи 145 ҳазор сомонӣ ҷарима шудаанд. 
Дар ин бора сардори Агентии омори назди Президенти Ҷумҳурии Тоҷикистон дар ивлояти Хатлон Қурбон Ҳакимзода зимни нишасти матбуотӣ иттилоъ дод.
Ба гуфти ӯ бештари ҷаримаҳо дар шаҳру ноҳияҳои Хуросон, Дӯстӣ, Қубодиён, Шаҳритус ва Мир Сайид Алии Ҳамадонӣ ба қайд гирифта шудааст. 
- Дар баробари сари вақт пешниҳод накардани маълумот, масъулин дар баъзе ҳолат онро бо хатоӣ пешниҳод мекунанд. Мо низ намехоҳем онҳо ҷарима шаванд. Мехоҳем ҳисобот сари вақт ва бе хато пешниҳод гардад, - гуфт Қурбон Ҳакимзода.
Соли 2021 низ 308 нафар масъулони идораҳои вилоят барои ин гуна камбудиҳо ба маблағи 118 ҳазор сомонӣ ҷарима шуда буданд.
Сулаймон СУЛТОНОВ