САМАРИ ИСТИҚЛОЛ

   Роҳи обод, биноҳои зебо, мактабу бунгоҳ, дукону мағозаҳои тозабунёд ва гашту гузори сокинони Ҷамоати деҳоти  ба номи Утақара Назаров мақоли халқиеро ба зеҳн меорад, ки мегӯянд: “Соле, ки накуст аз баҳораш пайдост”. Воқеан аз даромадгоҳи ҷамоати номбурда аён аст, ки бо наздик шудани ҷашни фархундаи 30-солагии истиқлоли Ватан ин ҷо тадбирҳои созандагӣ вусъат мегирад. Дар ҳар гӯшаи деҳот сохтмончиён саргарми коранд. Онҳо дар муассисаҳои таълимӣ синфхонаҳои иловагӣ, дар маҳалҳо бунгоҳҳои тиббӣ, барои эҳтиёҷоти маишии аҳолӣ марказҳои хизматрасонии иборат аз мағозаву дорухона, ҳаммому сартарошхона, нуқтаи шустушӯи мошинҳо, майдончаҳои варзишӣ барои ташаккули тарзи ҳаёти солим бунёд намудаанд, ки худ далели ободкориҳост. Тибқи маълумот то ба имрӯз 27 иншооти тозабунёд ба истифода дода шуда, дар панҷтои дигар раванди корҳои сохтмонӣ хеле хуб ҷараён дорад. Бар замми ин бо ташаббуси сокинони заҳматкашу соҳибкорони ҳимматбаланд илова ба нақшаи пешбинигардида 12 иншооти иҷтимоӣ сохта шуда, мавриди баҳрабардории умум қарор гирифтааст.    

   -Мо кӯшиш намудем, ки тибқи дастуру супоришҳои Сарвари давлат муҳтарам Эмомалӣ Раҳмон барои сокинони ҳар як деҳа шароите муҳайё намоем, ки онҳо эҳтиёҷоташонро аз деҳа набаромада, дар маҳалли зисти худ бароварда созанд, - иброз намуд раиси ҷамоат. – Аз панҷ деҳаи ҷамоат қаблан мо дар се деҳа бунгоҳи тиббӣ доштем. Бо шарофати истиқлоли кишвар дар ду деҳаи боқимонда низ бунгоњи тиббӣ бунёд намудем. Дар назди муассисаҳои таълимӣ бо дастгирии соҳибкорону волидайни хонандагон 27 синфхонаи иловагӣ сохта шуда, ҳоло ҳам дар ин самт кор идома дорад. Бар замми варзишгоҳи марказии ҷамоат дар ҳамаи деҳаҳо майдончаи замонавии варзишӣ ташкил гардиданд, ки наврасону ҷавонон аз онҳо хеле самаранок истифода бурда истодаанд. Барои дастрасӣ ба музди меҳнат, нафақа ва дигар хизматрасонии молиявӣ дар ҷамоат ду филиали бонки давлатии амонатгузории “Амонатбонк” таъсис дода шуда, дар якчанд нуқта барои пардохти ҳаққи хизматрасониҳои мобилӣ бонкаматҳо гузошта шудааст.

   Ба гуфтаи Нурмуҳаммад Юсупов аксари бошандагони ҷамоати деҳот дар ободу зебо гардидани маҳалли зисти худ ташаббускоранд. Онҳо дар ин самт сиёсати давлатии Роҳбарияти олии давлату ҳукумати мамлакатро ҳамаҷониба дастгирӣ намуда, дар ҳамбастагӣ инфрасохтори ҳар як деҳаро мувофиқ ба талаботи замон мукаммал намуда истодаанд. Аз ҷумла, сокинону соҳибкорон Бегназаров Алишер, Абдумалик Эрматов, Фарҳод Зиёев, Илҳом Қурбонов, Маҳмуд Раҳмонов дар ободониҳои номбурда саҳми бориз гузоштанд. 

Гурўҳи кории Ҷамоати деҳоти ба номи Утақара Назаров, ки дар он аҳли илму адаб ва зиёиёну собиқадорони соҳаҳои гуногуни хоҷагии халқ шомиланд, пайваста миёни аҳолӣ тадбирҳои созандагиро тарғиб намуда, онҳоро ба ободонии манзили зисту деҳоти худ даъват менамоянд.

   Сокинон дар баробари бунёди хонаву дар, ҳамчунин хуб дарк намудаанд, ки роҳу пулсозӣ низ аз беҳтарин амалҳои хайрхоҳона буда, кори савоб аст. Ин аст, ки бо дастгирии аҳолии деҳот ва соҳибкорони бо нангу номуси ҳудуди ҷамоат 18 километр роҳи маҳаллӣ пурра мумфарш ва се кўпруки байни рустоҳо азнавсозӣ шуданд, ки онҳо ҳаракати воситаи нақлиёт ва пиёдагардонро дар ҳамаи фасли сол осон намуданд. 

   Ҳарчанд чароғҳои симчўбҳои барқии гузару маҳаллаҳо иваз карда шуда, дар ҳолати корианд, аммо аҳли ҷамоатчигӣ боз ҳам имрӯзҳо дар деҳаҳо насби пояҳои оҳанини равшаннамоиро оғоз намудаанд. Мувофиқи маълумоти масъулон то ба имрӯз 128 симчўби фарсудашуда бо симчўбҳои бетонӣ иваз карда шуд. Баҳри кам кардани сарбории трансформаторҳо, ки баъзан дар фаслҳои тирамоҳу зимистон барои мунтазам таъмин намудани аҳолӣ бо барқ мушкилот пеш меовард дар деҳоти ҷамоат иловатан чор адад трансформаторҳои пуриқтидор насб карда шудааст.   

   Дар Ҷамоати деҳоти ба номи Утақара Назаров, ки 26 ҳазор нафар аҳолӣ дорад аксарият ба кори ҳоҷагии қишлоқ банд буда, бо меҳнати ҳалоли худ рӯзгори пурфайз доранд. Онҳо қариб дар 1900 гектар замини корами обӣ асосан ба пахкориву обчакорӣ машғул мебошанд. Ҳамаи дастгоҳҳои обкашӣ дар ҳолати корӣ қарор дошта, заминҳоро шодоб менамоянд, то заҳмати деҳқон самаровар гардад. 

   Дар Солҳои рушди деҳот, сайёҳӣ ва ҳунарҳои мардумӣ дар ҳудуди ҷамоати мазкур ду сехи дӯзандагӣ ташкил карда шуд, ки дар онҳо 25 нафар занону духтарон бо ҷойи кори доимӣ таъмин гардиданд. Ҳоло онҳо хеле серкор буда, ба дӯхти либосҳои мактабӣ банд ҳастанд. Ба хотири ба шуғл фаро гирифтани занону духтарон ва афзун намудани иқтидори истеҳсолии коргоҳҳои дӯзандагӣ масъулони ҷамоати деҳот ният доранд, ки боз як сехи дӯзандагии калон бунёд намоянд. 

   -Дар муассисаҳои таълимии мо 4 ҳазору 650 нафар хонанда таҳсил менамояд. Ҳамчунин дар ҳудуди ҷамоат литсейи касбӣ техникии рақами 46 мавҷуд аст, ки дар ин ҷо ҷавонон ба касбомӯзӣ ҷалб гардидаанд. Ҳадафи мо низ ҳарчи бештар фаро гирифтани наврасону ҷавонон ба касбу ҳунар мебошад, то онҳо ояндаи нек дошта бошанд, мегӯяд раиси ҷамоат. 

   Ба гуфтаи мавсуф дар деҳаи навбунёд, ки Бошқалъа-2 ном дорад, 400 оила зиндагӣ мекунад. Роҳи ин деҳа сангфарш гардида, аҳолиаш пурра бо барқ таъмин карда шудааст. Ягона мушкилоти сокинони деҳаи мазкур мавҷуд набудани мактаб мебошад. Аҳли деҳаи номбурда омодаанд, ки барои фарзандони худ муассисаи таълимӣ бунёд намоянд. Барои амалӣ намудани ин кори нек иҷозаи истифодаи қитъаи заминро аз мақомоти марбута интизоранд.