Маҷаллаи Сафо
Шеъру адаб
Чеҳра
Маслиҳати муфид
Номаҳо
РАҲНАВАРДИ САНЪАТИ ШАШМАҚОМ ВА ФАЛАК
Шашмақом яке аз нодиртарин мероси фарҳангии миллати тоҷик буда, асрҳо боз бо оҳангҳои дилнишин ва маъниҳои амиқ қалби дӯстдорони санъати асилро тасхир мекунад. Дар замоне, ки аксарияти ҷавонон ба мусиқии сабуку зудгузар майл доранд, ҳастанд ҷавондухтароне, ки бо муҳаббат ба ҳунари аҷдодӣ барои ҳифзу эҳёи арзишҳои миллӣ талош меварзанд. Толибзода Муслима аз ҷумлаи ҳамин ҷавонони соҳибистеъдод аст, ки бо садои марғуладор ва муҳаббати самимӣ ба шашмақому фалак роҳи ҳунари миллиро интихоб кардааст.
Шашмақом яке аз нодиртарин ганҷинаҳои фарҳангии мардуми тоҷик маҳсуб ёфта, асрҳо инҷониб қалби дӯстдорони мусиқии асилро тасхир намудааст. Ин санъати воло на танҳо маҷмуи оҳангу суруд, балки ойинаи таърих, маънавиёт ва ҷаҳонбинии миллати мост. Аз умқи асрҳо садои танбӯру доира ва овози дилнишини ҳофизони шашмақом моро ба олами ҳикмат, муҳаббат ва зебоӣ мебарад. Дар ҳар пардаи он дарди инсон, орзуи зиндагӣ, меҳри Ватан ва эҳсоси баланди инсонӣ таҷассум ёфтааст.
Дар ҷаҳоне, ки навои дилангези шашмақом садо медиҳад, ҳузури духтаре бо қалби саршор аз муҳаббат ба ҳунар басо фараҳбахшу умедофар менамояд. Ӯ бо чеҳраи ором, нигоҳҳои пурмаъно ва садои дилнишинаш гӯё пайванди дирӯзу имрӯзро зинда медорад.
Толибзода Муслима ҷавондухтарест, ки оромиши худро дар олами шашмақом ва фалак пайдо кардааст. Ҳарчанд ҷавон аст, вале садои марғуладораш аллакай қалбҳои пиру ҷавонро тасхир намудааст. Зимни суҳбат маълум гардид, ки дар замири ӯ муҳаббат ба Ватан, инсондӯстӣ ва эҳтиром ба ҳунари аҷдодӣ ҷойгоҳи хос дорад.
Дар замоне, ки қисми зиёди ҷавонон бештар ба мусиқии эстрадиву зудгузар рӯ меоранд, Муслима барои ҳифзи арзишҳои миллӣ талош меварзад. Ӯ мекӯшад нозукиҳои ин санъати волоро аз худ намуда, мероси гаронбаҳои ниёгонро ба насли оянда расонад.
Ҳанӯз замони хонандаи муассисаи таҳсилоти миёнаи умумӣ буданаш садои фораму ҷаззобаш дар саҳнаҳои зодгоҳаш танинандоз мегашт. Ӯ аз муҳаббат, орзуҳои ҷавонӣ ва эҳсосоти самимӣ месуруд. Ба гуфтаи худи ӯ, аз овони мактабхонӣ дар чорабиниҳои фарҳангӣ фаъолона иштирок мекард, то бо ҳунараш дар қалби ҳамсолонаш меҳру муҳаббат ва умедро бештар намояд.
Маҳорати ҳунарии Муслима таваҷҷуҳи омӯзгорону волидонашро ҷалб намуд ва онҳо тавсия доданд, ки дар озмуни ҷумҳуриявии «Тоҷикистон — Ватани азизи ман» ширкат варзад. Ӯ дар ин озмун фаъолона иштирок намуда, бо садои фораму ҷаззобаш сазовори ҷойи дуюм гардид.
Воқеан ҳам, духтари шашмақомхон рӯи саҳна гулеро дар боғи фарҳангу маърифат ва зебоӣ мемонад. Ӯ бо табассуми малеҳ, латофату назокат ва навоҳои руҳнавоз фазои саҳнаро муаттар месозад. Ҳангоми сароидани мақом гӯё торҳои дил ба ларза меоянд ва муҳити саҳна аз меҳру самимият лабрез мегардад.
– Шашмақом ва эстрадаро дӯст медорам, вале ба фалакхонӣ бештар шавқ дорам. Аз давраи мактабхонӣ орзу мекардам, ки бо овози баланд суруд хонам. Дар ин роҳ модарам бештар маро дастгирӣ мекарданд ва имрӯз ҳам барои рушди ҳунарам пайваста маслиҳату роҳнамоӣ медиҳанд, – мегӯяд Муслима.
Шашмақом танҳо маҷмуи оҳанг нест, балки мактаби бузурги маънавият, эҳсос, сабру таҳаммул ва ҷаҳоншиносист. Ворид шудан ба ин олам аз инсон қалби пурэҳсос, андешаи амиқ ва иродаи устувор талаб мекунад. Ҷавондухтаре, ки роҳи шашмақомро интихоб намудааст, дар асл роҳи фарҳангу маърифат ва худшиносии миллиро пеш гирифтааст.
Толибзода Муслима зодаи ноҳияи Хуросон буда, пас аз хатми муассисаи таҳсилоти миёнаи умумӣ бо орзуи ба бар кардани хилъати сафеди ҳамширагӣ тибқи имтиҳонҳои Маркази миллии тестии назди Президенти Ҷумҳурии Тоҷикистон ба Коллеҷи давлатии тиббии шаҳри Бохтар дохил шуд. Айни ҳол донишҷӯи бахши аввали ин муассиса буда, ҳамзамон барои сайқали ҳунар бо мутахассисони соҳа ба эҷод ва тамрини сурудҳои нав машғул аст.
– Вақте дар Озмуни «Тоҷикистон – Ватани азизи ман» иштирок доштам, устод Қосимзода Шералӣ ба маҳорати ман баҳои баланд доданд ва тавсия карданд, ки бо аҳли ҳунар ҳамкорӣ намоям. Ин суханони устод ба ман руҳу илҳоми тоза бахшиданд ва аввалин қадамҳоямро ба олами шашмақом устувор сохтанд. Ҳоло ду сол мешавад, ки бо устодони санъати шашмақом, фалак ва оҳангсозон ҳамкорӣ дорам, – мегӯяд ӯ.
Муслима ҳар байти классикиро бо муҳаббат аз бар мекунад ва ҳар оҳангро бо эҳсоси хос месарояд. Барои ӯ шашмақом танҳо ҳунар нест, балки бахше аз ҳастӣ ва ҷаҳони ботинист. Ҳангоми иҷрои мақомҳо чеҳраи ӯ пур аз эҳсос мегардад ва шунаванда худро дар оламе эҳсос мекунад, ки дар он муҳаббат, вафо, сабр ва зебоӣ ҳукмфармост.
Ба гуфтаи ин ҷавондухтари хушсадо, ҳар бор рӯи саҳна ҳунарнамоӣ кардан барои ӯ мисли як имтиҳон аст. Хушбахтона, ӯ имрӯз аллакай бо садои марғуладораш мухлисони худро пайдо намудааст.
Бояд гуфт, ки чунин ҷавонони соҳибистеъдод идомадиҳандаи роҳи ҳунармандони бузурги миллатанд. Онҳо бо истеъдоду заҳмат собит месозанд, ки фарҳанги миллӣ ҳанӯз зинда аст ва дар қалби ҷавонон ҷойгоҳи устувор дорад.
Воқеан ҳам, ҷавондухтаре дар олами шашмақом рамзи латофат, фарҳангсолорӣ ва садоқат ба арзишҳои миллӣ мебошад. Муслима бо ҳар суруд гӯё таърихи миллатро қисса мекунад ва бо ҳар наво қалбҳоро ба ҳам меорад. Маҳз чунин ҷавонони соҳибистеъдод метавонанд чароғи фарҳанги миллиро фурӯзон нигоҳ дошта, онро ба наслҳои оянда ба мерос гузоранд.
Махфират ШОИМОВА, “Сафо”
Добавить комментарий
Ахбор
МУЛОҚОТИ РАИСИ ВИЛОЯТИ ХАТЛОН ДАВЛАТАЛӢ САИД БО НАМОЯНДАГОНИ МАГАТЭ: ТАҲКИМИ ҲАМКОРИҲО БАРОИ РУШДИ СОҲАИ ТАНДУРУСТӢ 13:25ХАТЛОН.РӮЗИ БАЙНАЛМИЛАЛИИ ҲИФЗИ КӮДАКОН ТАҶЛИЛ ГАРДИД 15:18ДАР ВИЛОЯТИ ХАТЛОН БОРИ НАХУСТ КУРСИ АЗНАВТАЙЁРКУНИИ КАДРҲОИ ДАР ЗАХИРАБУДАИ ХИЗМАТИ ДАВЛАТӢ РОҲАНДОЗӢ ГАРДИД 11:12ПАЁМИ ТАБРИКИИ РАИСИ ВИЛОЯТИ ХАТЛОН ДАВЛАТАЛӢ САИД БА МУНОСИБАТИ РӮЗИ БАЙНАЛМИЛАЛИИ ҲИФЗИ КӮДАКОН 10:05НАХУСТНАМОИШИ “МЕТРАНПАЖ” ДАР ТЕАТРИ ВИЛОЯТӢ 10:56ФУРӮҒИ МАЪРИФАТ ДАР ЯК ХОНАДОНИ ТОҶИК 10:49ПАЁМИ ШОДБОШИИ РАИСИ ВИЛОЯТИ ХАТЛОН ДАВЛАТАЛӢ САИД БА МУНОСИБАТИ ФАРОРАСИИ ИДИ САИДИ ҚУРБОН 16:35Хунёгари нағмаҳои дилнавоз 10:40
Маҷаллаи №6-2019
Серхонандаҳо
МАРҲИЛАИ ДУЮМИ АЗНАВСОЗӢ ВА ТАЪСИСИ МЕДИАТЕКАИ ПРЕЗИДЕНТИ ҶУМҲУРИИ ТОҶИКИСТОН ДАР КИТОБХОНАИ ВИЛОЯТИИ БА НОМИ ШАМСИДДИН ШОҲИН ВА ОҒОЗИ АЗНАВСОЗИИ КИТОБХОНАИ ВИЛОЯТӢ ДАР ШАҲРИ КӮЛОБ
ЁВОН. БОЗДИДИ РАИСИ ВИЛОЯТ АЗ РАФТИ БАРТАРАФСОЗИИ ОҚИБАТҲОИ ОФАТИ ТАБИӢ ВА СУҲБАТ БО СОКИНОНИ ЗАРАРДИДА
ҶАЙҲУН. 1,1 КИЛОМЕТР РОҲ МУМФАРШ КАРДА ШУД
БОХТАР. БОЗ ЯК КӮДАКИСТОНИ НАВУ ЗАМОНАВӢ БУНЁД МЕШАВАД
ЛЕВАКАНТ. НИЁЗМАНДЕ СОҲИБИ ХОНА МЕШАВАД
РАИСИ ВИЛОЯТИ ХАТЛОН АЗ РАФТИ СОХТМОНИ НЕРУГОҲИ БАРҚИИ ОФТОБӢ ДАР НОҲИЯИ ҶАЙҲУН БОЗДИД НАМУДАНД
ҚАДРШИНОСИИ ИШТИРОКЧИЁНИ ҶАНГ - НИШОНАИ ЭҲТИРОМ БА ТАЪРИХ ВА ВАҲДАТИ МИЛЛӢ
РАИСИ ВИЛОЯТИ ХАТЛОН БА АЁДАТ ВА ТАБРИКИ ИШТИРОКДОРИ 103-СОЛАИ ҶАНГИ БУЗУРГИ ВАТАНӢ РАФТАНД
ҶАВОНОН ВА МАСЪУЛИЯТИ ОИЛАДОРӢ
РАИСИ ВИЛОЯТИ ХАТЛОН АЗ РАФТИ СОХТМОНИ МУАССИСАИ ТОМАКТАБӢ ДАР НОҲИЯИ ҶАЙҲУН БОЗДИД НАМУДАНД
