Фирдавс Раҳмонов : Ба худтабобаткунӣ машғул нашавед

Даричаи ошноӣ

Фирдавс Раҳмонов - хатмкардаи Донишгоҳи давлатии тиббии Тоҷикистон ба номи Абуали ибни Сино, Орденатураи Донишгоҳи давлатии тиббии шаҳри Москва ба номи И. В. Сеченов, иштирокчии конференсия ва конгрессҳои илмӣ дар кишварҳои Россия ва Қазоқистон, духтури дараҷаи олӣ

- Ҳамасола бо фарорасии фасли гармо бемориҳои мавсимӣ, аз ҷумла бемориҳои пӯст низ хуруҷ менамояд. Албатта, гармшавии аз ҳад зиёди ҳаво барои саломатии инсон як қатор мушкилотро пеш меорад,- мегӯяд Фирдавс Раҳмонов, духтури Маркази бемориҳои пӯсту зуҳуравии вилояти Хатлон.

Аз мушоҳидаҳо бармеояд, ки дар баъзе ҳолатҳо бисёр шахсон ба бемориҳои гуногуни пӯст гирифтор мешаванд, аммо бемории худро пинҳон менамоянд ва саривақт ба духтур муроҷиат намекунанд. Дар натиҷа табобати беморӣ мушкил мегардад.

Ҳаким Абуали ибни Сино чи хуб гуфтааст:

Агар хоҳӣ, ки бини рӯи дармон,

Макун дард аз табиби хеш пинҳон.

Хуб мешавад, ки дар мавриди мушоҳидаи аввалин нишонаҳои беморӣ шахс ба духтур муроҷиат намояд ва тибқи тавсияи табибон амал намояд.

- Бемориҳои пӯст хеле гуногун мешаванд. Вобаста ба шароити табиӣ ва иқлими кишвари мо намудҳои бемориҳои замбурӯғӣ бештар паҳн гардидааст.

Таснифоти баъзе бемориҳои пӯстро ба таври зайл нишон додан ба мақсад мувофиқ аст: доначак, барас (сафедшавии пӯст), дардхориш, дерматити перморалӣ, микроспория (занбурӯғи зоофилӣ), обиласорӣ, розатсеа (захмҳои пӯсти рӯй), токсидермия (дерматити шадиди бемориҳои рӯйпуши пӯст), хоришак (канаи хориш), шукуфаи фалсӣ (бемории музмини илтихобии пӯст), экзема (бемории аллергикии пӯст), эритразма (бемории бактериявии пӯст), педикулёз (беморие, ки барангезандаи он шабушк мебошад) ва ғайраҳо. Сабабҳои пайдоиши бемориҳои пӯст хеле бисёру гуногун аст, - мегӯяд Фирдавс Раҳмонов.

Тавре ин табиби кордон ва ботаҷриба иброз медорад, роҳҳои асосии пешгирӣ аз касалиҳои пӯст ин риоя кардани қоидаҳои санитарӣ – гигиенӣ, тозаю озода нигоҳ доштани манзили зист, истеъмоли таомҳои парҳезӣ, худдорӣ кардан аз тамос бо ҳайвоноту парандаҳои бемор, напӯшидани либосҳои синтетикӣ, оббозӣ накардан дар ҷӯю канал ва ҳавзҳои обашон ифлос мебошад.

Баъзе шахсоне, ки гирифтори бемориҳои пӯст мешаванд, бо усули худтабобатӣ аз гиёҳҳои шифобахш истифода мебаранд, ки он дар бисёр мавридҳо натиҷаи хуб намедиҳад. Хуб мешавад, ки онҳо дар ин самт аз маслиҳату тавсияҳои духтурони соҳибтаҷриба истифода баранд. Зеро яке аз усулҳои табобати камарзишу фоидаовар, ин истифодаи дурусти гиёҳҳои табобатӣ мебошад.

Чуноне ки духтур Фирдавс Раҳмонов дар идомаи суҳбат илова намуд, аксарияти бемороне, ки ба онҳо муроҷиат мекунанд, гирифторони бемории рихининҳои гулобӣ, эритразма (бемории бактериявии пӯст), розатсеа (захми пӯсти рӯй) мебошанд. Агар ин бемориҳо сари вакт табобат карда нашаванд, оқибат ба пӯсидашавии пӯсти рӯй оварда мерасонанд.

- Хушбахтона имрӯз илми тибби муосир дар самти мубориза, пешгирӣ ва табобати бемориҳои пӯст ба дастовардҳо ва комёбиҳои баланд ноил гардидааст. Мояи ифтихору сарбаландист, ки ҳамасола таваҷҷуҳи Ҳукумати ҷумҳурӣ, бахусус Пешвои миллат Эмомалӣ Раҳмон ба соҳаи тандурустӣ бештар мегардад. Дар Маркази бемориҳои пӯсту зуҳуравии вилоятӣ низ таҷҳизотҳои замонавии тиббӣ дастрас гардид. Аз ҷумла, ба Маркази мо чанде пештар як дастгоҳи наву муосири тиббии ПУВА ворид карда шуд, ки он кори моро дар самти табобати бемориҳои пӯст осону қулай намуд. Инчунин, мо боз соҳиби як дастгоҳи замонавии тиббӣ гардидем, ки он барои табобати самараноки бемориҳои кафи пойҳо ва нохунҳо хеле манфиатовар аст, - афзуд Фирдавс Раҳмонов.

Ташхиси бемориҳои пӯст аз муоинаи пурра ва таҳқиқи пӯст асос меёбад.

Бояд зикр намуд, ки духтур беморро оид ба кай гирифтор шуданаш ба ин беморӣ, сӯзиши дард, шикоятҳои ӯ аз вазнинии дард пурсида, баъди таҳлил ва ташхис ба табобат шуруъ намояд.

Мавриди зикр аст, ки на ҳамаи бемориҳои пӯст гузарандаанд. Масалан, бемории барас (сафедшавии пӯст), ки бо пайдоиши доғҳо ва мӯйҳои сафедшуда дар қисматҳои гуногуни бадан ба назар мерасад, гузаранда нест. Бисёр одамон, аз ҷумла наздикони бемор аз ӯ дурӣ меҷӯянд. Бемор бошад, аз чунин муносибати онҳо азоби руҳӣ мекашад.

Ба андешаи ҳамсуҳбати мо, духтури мушфиқ Фирдавс Раҳмонов беморон аз маслиҳату тавсияи табибон дурӣ наҷӯянд ва худсарона ба худтабобаткунӣ машғул нагарданд. Худтабобаткунӣ оқибатҳои ногувор дорад. Солимии худро эҳтиёт намоянд, ҳаёти худу наздикон ва аҳли ҷомеаро ҳифз намоянд.

Аъзам Бобоев

Похожие новости:

Добавить комментарий

Ахбор

Наздики 20 километр заҳбуру заҳкашҳо тоза карда шуд 14:48 БОХТАР. АРЧАИ СОЛИНАВӢ ҚОМАТ АФРОХТ 14:10 ТАДБИРҲОИ ОБОДОНӢ ДАР ШАҲРИ БОХТАР 15:25 ДАР НОҲИЯИ ПАНҶ ҲАМА СОҲАҲО БА ЗИМИСТОН ОМОДААНД 13:51 Ҷ. БАЛХӢ. ҶУДОШАВИИ ОИЛАҲО КОҲИШ ЁФТААСТ 12:11 Тақдими 30 ҳазор сомонӣ ба дастаи“Бохтар – ситӣ” 14:31 Кӯшониён. Аёдати оилаҳои сарбозони шаҳидшуда 13:54 Дар ноҳияи Вахш панҷ бинои баландошёна бунёд мешавад 14:12

Маҷаллаи №6-2019

Серхонандаҳо

ИМЗОИ СОЗИШНОМАҲО БА МАБЛАҒИ 8 МИЛЛИОН ЕВРО Кӯшониён. Тақдими сару лисоби зимистона ба ятимони кул “ХАТЛОН – 1” МАҚОМИ АВВАЛРО ИШҒОЛ НАМУД Ҷ. БАЛХӢ. ҶУДОШАВИИ ОИЛАҲО КОҲИШ ЁФТААСТ БЕШ АЗ 3 ТОННА МАҲСУЛОТИ ПАСТСИФАТ НОБУД КАРДА ШУД ТАДБИРҲОИ ОБОДОНӢ ДАР ШАҲРИ БОХТАР Тақдими 30 ҳазор сомонӣ ба дастаи“Бохтар – ситӣ” ДАР НОҲИЯИ ПАНҶ ҲАМА СОҲАҲО БА ЗИМИСТОН ОМОДААНД Кӯшониён. Аёдати оилаҳои сарбозони шаҳидшуда Дар ноҳияи Вахш панҷ бинои баландошёна бунёд мешавад