ДАР ХАТЛОН АМАЛИЁТИ “НЕЛЕГАЛ – 2023” РАФТА ИСТОДААСТ

Дар шаҳру ноҳияҳои вилояти Хатлон амалиёти “Нелегал – 2023” оғоз гардидаю идома дорад. Ин амалиёт дар ду марҳила, аз қабили “Нелегал – Трафик” ва “Нелегал – Кордон” гузаронида мешавад. 

Марҳилаи якуми он аз 19 июн оғоз гардида то 25 июни соли равон идома меёбад ва марҳилаи дуюм бошад рӯзҳои 2 то 8-уми октябри соли ҷорӣ гузаронида мешавад.

Тавре саҳифаи фейсбукии Милитсияи Хатлон иттилоъ додааст: “Мутобиқи Нақшаи гузаронидани амалиёти минтақавии Созмони Аҳдномаи амнияти дастаҷамъии СААД оид ба муқовимат бо муҳоҷирони ғайриқонунии “Нелегал – 2023”, ки аз 15 апрели соли 2023 тасдиқ шудааст, дар ҳудуди давлатҳои аъзои СААД амалиёти минтақавии “Нелегал – 2023” дар ду марҳила гузаронида мешавад. Мақсад аз гузаронидани амалиёти мазкур, санҷиши тартиби риояи буду боши шаҳрвандони хориҷӣ ва шахсони бешаҳрванд, дар фурудгоҳҳо, истгоҳҳои роҳи оҳан, манзилҳои истиқоматӣ, меҳмонхонаҳо, хобгоҳҳо ва иншоотҳои корӣ, ошкор намудани шаҳрвандони хориҷӣ ва шахсони бешаҳрванде, ки бе раводид, бе қайди шиноснома дар мақомоти корҳои дохилӣ, бе иҷозат барои кор ва шиносномаҳои беэътибор дар Ҷумҳурии Тоҷикистон буду бош ва фаъолияти меҳнатӣ доранд, иборат мебошад.”

Ин амалиёт дар вилояти Хатлон дар ҳамбастагӣ бо ҳайати шахсии масъулини Раёсати Вазорати корҳои дохилӣ дар вилояти Хатлон, Кумитаи давлатии амнияти миллии Ҷумҳурии Тоҷикистон дар вилояти Хатлон ва Хадамаоти муҳоҷират ва шуғли аҳолӣ дар вилояти Хатлон гузаронида мешавад.