ДОСТОНИ ПАСИ ЯК ЧЕҲРАИ ШЕДИИ ҲУНАР

Каму беш аз 10 сол мешавад, ки ӯ бо ҳузури пурнуру меҳрофарин, садои ҷаззобу дилангезаш ба базму маҳфилҳо ва маросиму чорабиниҳои фарҳангии вилоят шукуҳу шаҳомати дигар мебахшад. Бо ҳама истеъдоди беназиру малакаи волои суханварӣ Офаридгор ба ин ҳунарманди хушсалиқа чеҳраи ориёӣ ва ҳам сирати поку сиришти наку ато бинмудааст, ки ба гоҳи офаридани нақшҳои фарзандони фарзонаи миллат тамошобин дар симои ӯ Сомониву Рӯдакӣ, Синову Мавлоно, Абдураҳмони Ҷомиву шоҳони “Шоҳнома”-и безавол Ҷамшед, Манучеҳр ва Бежанро мебинад.

Отахон Саидзода, директори Театри вилоятии мусиқӣ - мазҳакавии ба номи Ато Муҳаммадҷонови шаҳри Бохтар дар баробари масъулияти роҳбарӣ дар саҳнаҳои театрӣ нақшҳои зебову шуҳратёр мебозад. Ӯ аз ровиёни беназирест, ки ба ҳангоми қироати дилангези ғазалу абёти ноби бузургон, ба ёди мо ҳунарманди нотакрор Маҳмудҷон Воҳидовро меорад. Аммо паси ин симои нуронии ҳунарманди ҷавон рӯзу рӯзгорони сахту сангини даврони кӯдакиву наврасӣ, хотироти ғуссаву андуҳи дидани ранҷу азоби ногуфтании модари яккаву танҳо меистад, ки дар мушкилтарин даврони ҳодисаҳои шаҳрвандӣ рӯзгори шаш тан ҷигарбандони ноболиғи хешро пеш мебурд.

Дар ҷавоб ба суоли пайроҳаи расидан ба орзуҳо, як дам ба фикр фурӯ рафта, дидаи меҳрофарин ба он сӯи оинаи тирезаи ҳуҷраи кориаш дӯхт. Лаҳза ба лаҳза дигаргун гаштани рамузи нигоҳи нурафшонаш гувоҳи ҳол буд, ки ин сонияҳо хотироти аз овони кӯдакиву наврасӣ ва масири то хатми таҳсилоти олии риштаи ҳунар монои наворҳои синамо аз пеши назараш мегузаранд.

– Ҳанӯз ба синни мактабхонӣ нарасида будам, ки садои мусиқии аз кӯчаву хонаҳои гузари зодгоҳам маро ба сӯи худ ҷалб мекард. Дар тӯю хурсандиҳои ҳамсояҳои меҳрубонам, ки ҳамагӣ мухлисони санъату ҳунари воло буданд, мисли дар маросимҳои хонаводагии худамон ба завқи том мерақсидам. Шояд завқу истеъдоди кӯчакамро дида, атрофиён маро ҳамчун ҳавасманди ҳунарҳои зебо пазируфта буданд, ки ҳангоми дар саҳнаҳои хурду бузург ҳунарнамоӣ карданам бо кафкӯбиҳо ба ман руҳияву илҳоми ногуфтанӣ мебахшиданд. Ба гоҳи таҳсину офаринхониҳои мухлисонам, ки аксаран пиразанҳо ва мӯйсафедон буданд, мегуфтанд, ки дар замири ин кӯдак завқу истеъдоди бузурге нуҳуфтааст. Ба ростӣ дар пайроҳаи минбаъдаи ҳунар ҳамин сухани ҷонбахши онҳо ба ман эҳсоси тавонмандӣ мебахшад, – иброз дошт дар оғози суҳбат Отахон.

Овони мактабхонӣ ҳам нафароне, ки аз ҳунару маҳораташ огоҳӣ доштанд, ҳунарпешаи ояндаро ба саҳна мебароварданду Отахони хурдсол таҳти кафкӯбиҳои иштирокчиён бо завқу маҳорати воло мерақсид. Дар ин ҳангом онҳо аз шаҳри Кӯлоб ба имрӯза шаҳри Бохтар кӯчиданд ва ӯ бо бародару хоҳаронаш таҳсилро дар МТМУ №6 идома медиҳанд. Замоне модар фаъолияти омӯзгориро аз МТМУ №4 оғоз бахшид, фарзандонаш низ таҳсилро дар ин муассисаи таълимӣ идома доданд ва маҳз дар ин мактаб устоди фанни суруд ва мусиқӣ равоншод Миралӣ Мирзовалиевро дарёфт, ки минбаъд ин марди накукор дар такмили маҳорату сайқали истеъдоди Отахон нақши ниҳоят муҳим гузошт.

– Муҳаббату садоқати устоди нахустинам ба пешаи интихобкардааш буд, ки тарбияву ташаккули ҳунару истеъдоди шогирдонашро рисолати худ дар зиндагӣ дониста, берун аз дарсҳои фаннӣ ҳам бо ман машғулиятҳои иловагӣ мегузаронид, то завқу рағбати маро ба санъати рақсу сарояндагӣ дучанд созад. Мурури солҳои баъдӣ дарк намудам, ки устод бо рафтору гуфтори пандомез ва сахтгириву ҳам ҷиддият, меҳру муҳаббати ҷовидонӣ ба ҳунарҳои зеборо дар замири мо шогирдон парвардааст. Маҳз бо заҳмати пайвастаи устоди дарси суруд ва мусиқӣ равоншод Миралӣ Мирзовалиев ман бори нахуст бо иҷрои суруди машҳури “Кишвари зебои ман” дар саҳнаҳои бузург ҳунарнамоӣ намудам. Ба қавли устодони санъат ин суруду мусиқии дилафрӯз мақбули ҳамагон гардид, ки онро дар барномаҳои фарҳангиву идонаи чорабиниҳои сатҳи шаҳру вилоят интихоб намуданд ва ман дар саҳнаву толорҳои пур аз тамошобин бо завқу маҳорати баланд иҷро менамудам, – андешамандона иброз дошт Отахон Саидзода.

Ҳунарпешаи номвар лаҳзае хомӯшӣ ихтиёр намуда, беихтиёр ба замзамаи он таронаи мондагор пардохт:

Водиҳоят кони зар,

Меваҳоят чун шакар.

Мардумонат пурҳунар,

Кишвари зебои ман,

Модари танҳои ман.

Гарчанде аз овони мактабхонӣ бо донишу истеъдод, симои ҷаззобу шавқу маҳорати баланди шеъру сурудхониаш миёни мардум маҳбубият пайдо карда бошад ҳам пайроҳаи расидан ба қуллаҳои баланди ҳунар барояш ҳамвору осон наменамуд. Зеро парвардаи дудмони озодагон буду ба ҷуз дарси устоди равшанзамир ва дуову раҳнамоии модар ба дастгириву сарпарастии каси дигар умед набаста, шебу фарози дар ҷодаи ҳунар пешомадаро бо заҳмати шабонарӯзӣ паси сар менамуд. Мурури солҳо ҳамчун ҳунарпешаи ояндадор варо ба хотири иҷрои суруд ва қироати дилнишин аз ашъори бузургони адаб ба ҷашнвораҳои фарҳангӣ, маҳфилҳои муҳташами бахшида ба бузургдошти нухбагони миллат даъват мекарданд. Аз ҷумла, дар озмуни ҷумҳуриявии “Офарин”, аз миёни як гурӯҳ ҳаваскорони навраси шаҳри Бохтар Отахон ҳамроҳи хоҳараш нақшҳои рамзии солҳои 1999 ва 2000-умро бозида, сазовори ҷойи ифтихорӣ мегарданд.

– Аз соли 2000-ум модари заҳматкашам сарвари МТМУ №7 шаҳри Бохтар таъйин гардид ва ба хотири зери назорати ҳамешагиаш қарор додани мо, фарзандони ба хуни ҷигар парвардааш, таҳсилро дар муассисаи мазкур идома бахшидем. Ба ин минвол рӯзу соатҳои фориғ аз дарси мактаб бо машқу тамринҳо назди устодони санъати театру мусиқӣ, ҳунарнамоиҳо, хоса бо шеъру сурудхонӣ, тақлидкориву саҳнабозиҳои хотирмон дар озмунҳои сертамошобин, аз ҷумла “Маҳфили зарифон”, “Андалеб”-у маросиму чорабиниҳои оммавӣ мегузаштанд. Баъзе қобилияту зарфиятҳои фардиамро ба эътибор гирифта, дар доираи як лоиҳаи фарҳангии созмонҳои хайриявӣ маро сарвари Кумитаи амали талабагии МТМУ №7 интихоб намуда буданд. Ёдоварӣ аз дастоварду ҳам нокомиҳои овони наврасӣ, даврони пуршӯри муаррифӣ шуданам ҳамчун навраси соҳибистеъдод ва номбардори мактабу шаҳри азизамон будан, маҳз аз азобу ранҷи солиён кашидаи модари бузургворам сарчашма мегирад, ки мо, фарзандонашро ба сахтиҳо, нодориву мушкилоти миёншикани пайроҳаи пуршебу фарози зиндагӣ тарбияву ба камол расонидааст....

Хело кӯчак будему ҳатто доштани як пойафзоли одии тобистонаро орзу мекардем ва ҳоло шароити зисти фарзандонамро ба даврони бачагии худ қиёс карда, дар ҳайрат мемонам, ки чи гуна мо ба мушкилот тоб оварда, аммо назди модар шикваю гилагузорӣ намекардем. Шояд ин таъсири тарбияи модари азизамон буд, ки бо ҳама мушкилоти сангини рӯзгор нигоҳ накарда, назди фарзандону ақрабо ва ҳамсояҳо эҳсоси нотавониву бечорагӣ надошт. Ӯ то шабонгоҳ пайи корҳои мактаб, омодагӣ ба дарси фардои шогирдонаш буда, пас он, то поси шаб дар назди Комбинати орди шаҳри Бохтар дар навбати нон меистод, – ёд овард Отахон Саидзода.

Мурури тарбияву обутоб дар мактаби таҳаммулпазирии модар, Отахон минбаъд таҳсилро дар литсейи давлатии №1 шаҳри Бохтар идома бахшида, соли 2004 онро хатм намуд. Ба иқрори ӯ бинобар асароти мушкилоти ҳаётӣ ӯ ва баъзе ҳамсолонаш ба мисли наврасону ҷавонони замони муосир касбҳои дӯстдоштаи худро интихоб накарда буданд. Ҳамин сон, бо маслиҳату роҳнамоии хешовандон, ки ба истеъдоду завқу рағбати санъатдӯстии ин ҷавони хушсалиқа баҳои баланд дода буданд, ба Донишкадаи давлатии фарҳанг ва санъати Тоҷикистон ба номи Мирзо Турсунзода ҳуҷҷат супорид. Он замон устоди зиндаёд Аловуддин Абдуллозода ба симати директори Театри вилоятии мусиқӣ-мазҳакавии ба номи Ато Муҳаммадҷонови шаҳри Бохтар ба шогирди ояндааш роҳхат медиҳад, ки вилояти Хатлон ба кадрҳои ҷавони соҳаи театру санъати мусиқӣ эҳтиёҷ дорад.

Баъди санҷиши нутқ ва иҷрои муваффақонаи этюд ба имтиҳонҳои дохилшавӣ роҳ ёфт ва охиран донишҷӯи донишкадаи мазкур гардида, соли 2009 онро бо дипломи сурх хатм мекунад. Фаъолияти касбиро дар Театри вилоятии мусиқӣ-мазҳакавии ба номи Ато Муҳаммадҷонови шаҳри Бохтар оғоз бахшида, баъди як сол ба хизмати ҳарбӣ сафарбар мешавад. Замони хизмати ҳарбӣ дар сафи Артиши миллӣ, дар яке аз фестивалҳои бонуфузи “Манораи баланд” дар Майдони Сурхи шаҳри Москав иштирок дошт. Барои хизматҳои шоён дар сафи Қувваҳои Мусаллаҳи Тоҷикистон бо медалҳои ҷашнии 15-солагии Қувваҳои Мусаллаҳи Ҷумҳурии Тоҷикистон ва 60-солагии Ғалаба сарфароз гардидааст. Ӯ бо рутбаи лейтенанти хурд хизмати ҳарбиро анҷом дода, пас он, фаъолияти касбиро дар театр идома медиҳад.

Отахон Саидзода оиладор, соҳиби се фарзанд буда, барои хизматҳои арзанда дар рушди соҳаи фарҳанг ва театр бо нишони Аълочии фарҳанги Ҷумҳурии Тоҷикистон, Ҷоизаи Кумитаи кор бо ҷавонон ва варзиши назди Ҳукумати Ҷумҳурии Тоҷикистон, Дипломи “Беҳтарин ҳунарманди соли 2021”, “30-чеҳраи муваффақ” дар соли 2022 ва “100 чеҳраи муваффақи соли 2024” ва чандин ифтихорномаву сипосномаҳо сарфароз гардидааст.

Юсуфи Собир

Похожие новости:

Добавить комментарий

Ахбор

Дӯстӣ. Бунёди боз як иншооти соҳаи тандурустӣ 13:59 Ҷ. Балхӣ. Бунгоҳи тиббии нав ифтитоҳ шуд 16:08 3 ДАЛЕЛ БАРОИ МУТОЛИАИ КИТОБ 13:56 Намоиш-фурӯши китобҳо бахшида ба "Ҳафтаи китоби кӯдакону наврасони Тоҷикистон" 13:52 СУХАНИ ТАБРИКИИ РАИСИ ВИЛОЯТИ ХАТЛОН ДАВЛАТАЛӢ САИД ДАР ЧОРАБИНИИ РӮЗИ ДАЪВАТШАВАНДА 13:47 ПАДИДАИ БЕНАЗИР ДАР ХАТЛОН 13:43 ИНСОНИ КОМИЛ, ТАБИБИ ҲОЗИҚ 13:16 ПАЁМИ ТАБРИКИИ РАИСИ ВИЛОЯТИ ХАТЛОН ДАВЛАТАЛӢ САИД БА МУНОСИБАТИ ИДИ САИДИ ФИТР 16:34

Маҷаллаи №6-2019

Серхонандаҳо

Хатлон 109 нафақагири аз 100 сола боло дорад ПЕШАИ ПУРИФТИХОР ХАТЛОН: АЁДАТИ МОДАРИ 104-СОЛА ВА СОБИҚАДОРЕ, КИ 62 СОЛ ИНҶОНИБ ОМӮЗГОР АСТ Тақдими 100 000 сомонӣ ба ғолибон Таҷлили Рӯзи Модар дар Хатлон Хатлон. 113- солагии матбуоти тоҷик таҷлил шуд ХОВАЛИНГ. МАТБАА СОҲИБИ ДАСТГОҲИ ЗАМОНАВӢ ШУД Дар шаҳри Бохтар 350 ҳазор гул шинонида шудааст Ёвон. Майдончаи варзишӣ ифтитоҳ шуд Пешвои миллат эҳёгари Наврӯз