Санаҳои ифтихории миллат

Мусоҳибаи вижа бо Шодиён Муҳаммад Султонзода, вакили Маҷлиси намояндагони Маҷлиси Олии Ҷумҳурии Тоҷикистон

Дар саҳифаҳои таърихии даврони Истиқлоли Ҷумҳурии Тоҷикистон санаҳои хуҷастапайке бо ҳарфҳои заррин сабт гардидаанд, ки ҳамасола ҳамчун ҷашнҳои фархундаи эҳёи муқаддасоти милливу оғози марҳилаи навини давлатдорӣ ва амалигардонии орзуву ормонҳои ҳазорсолаи халқи тоҷик бо шукуҳу шаҳомати хоса таҷлил карда мешаванд. Муҳимтарин рӯйдоди тақдирсозу таърихӣ барои мардуми Тоҷикистон дар моҳи ноябр ба вуқуъ пайвастааст, ки аз рӯзи 16-уми ноябри соли 1992 оғози Иҷлосияи XVI Шурои Олии Ҷумҳурии Тоҷикистон ибтидо гирифта, барои пойдории Истиқлолият ва мурури солҳо ҳамчун давлати демокративу ҳуқуқбунёд, дунявию ягона устувор монда, ин кишвари азизамон, ҳамчунин, ба рушду нумӯи минбаъдаи Тоҷикистони соҳибихтиёр замина гузоштанд. Маҳз дар ҳамин Иҷлосия рамзҳои давлатӣ қабул гардида, 24 ноябр дар кишварамон Рӯзи Парчами давлатӣ эълон гардидааст. Ҳамчунин, дар таърихи 6-уми ноябри соли 1994 мардуми Тоҷикистон нахустин Конститутсияи даврони соҳибистиқлолии Ҷумҳурии Тоҷикистонро қабул намуданд ва санаи 16-уми ноябри ҳамон сол баъди ғолибият дар интихобот Президенти Ҷумҳурии Тоҷикистон ба фаъолият шуруъ намуда буданд.

- Чун дар арафаи санаи фархундаи 16-уми ноябр - Рӯзи Президенти Ҷумҳурии Тоҷикистон қарор дорем, нахуст оид ба нақши рӯйдодҳои муҳими сиёсии марбут ин рӯзи таърихсоз дар рушду нумӯи минбаъдаи Тоҷикистони соҳибистиқлол андешаҳои худро иброз медоштед.

-Гарчанде Истиқлолияти давлатии Ҷумҳурии Тоҷикистон дар таърихи 9-уми сентябри соли 1991 эълон гардида буд, вале мутаассифона, душманони фурсатталаби мо дар дохилу хориҷ аз кишвар ба ин дастоварди бузурги миллати тоҷик муросо карда наметавонистанд, ки ҷомеаи мо ба гирдоби ҷанги шаҳрвандӣ кашида шуд. Бинобар вазъи печидаи сиёсӣ ва мушкилоти пасомади он мо натанҳо ба бунёди давлати соҳибихтиёр ноил нагардидем, балки бадхоҳони миллати тоҷик ин фурсати муҳими таърихиро аз мо рабуданӣ шуда, мардумро ба парокандагӣ ва Тоҷикистонро ба гирдоби нестӣ мувоҷеҳ намуда буданд.

Хушбахтона, ба иқболи баланди халқи тоҷик давраи навини давлатсозии Тоҷикистони соҳибистиқлол аз Иҷлосияи 16-уми Шурои Олии Ҷумҳурии Тоҷикистон ва ба сари қудрат омадани фарзанди фарзонаи миллат муҳтарам Эмомалӣ Раҳмон оғоз гардид. Ҳоло дар фазои сулҳу осоиштагӣ ва даврони саодату шукуфоии ҷомеа дар ин мавзуъ бароҳат метавон суҳбат кард. Аммо дар он шабу рӯз дар мавриди суботу оромӣ ва ояндаи Тоҷикистон, тақдири миллат сухан гуфтан осон набуд.

Мардум танҳо дар фикри наҷоти ҷону дарёфти як бурда нон буданд ва дар чунин як вазъияти печидаи сиёсиву буҳрони иқтисодиву иҷтимоӣ ҳар мансабдор фишанги идоракунии давлат он сӯ истад, ҳатто ишғоли масъулиятҳои роҳбарии мақомоти маҳаллии Тоҷикистони дар гирдоби мушкилоти бузургро орзу намекард.

Дар ҳамон вазъи ноороми сиёсиву хатари нестии миллату парокандагии кишвар маҳз азму неруи ғайримуқаррарӣ ва муҳаббату ҷасорати бузурги ватандӯстонаи фарзанди фарзонаи миллат муҳтарам Эмомалӣ Раҳмон буд, ки рисолати тақдирсозу таърихсози давлатсозиро бар зимма гирифт. Биноан, имрӯз вақте давлат мегӯем фаъолияти пурсамару густурдаи шохаҳои ҳокимияти давлатӣ аз ҷумла, ҳокимияти қонунбарору ҳокимияти судӣ ва ҳам ҳокимияти иҷроия пеши назар меояд ва ҳам симои мондагори қаҳрамонони халқи тоҷик, ки то ба ин даврони хушбахтиву саодати миллати хеш ҷонбозиву фидокориҳои бемисл анҷом додаанд.

- Гуфтед, ки нахустин иқдомҳои ватандӯстонаву тасмимгириҳои хирадмандона дар бунёдгузории давлати соҳибистиқлоламон аз азму неруи ғайримуқаррарии он замон Сарвари ҷавони кишвар сарчашма мегирифт. Лутфан, ин нуктаро каме шарҳ медодед.

Бубинед, ки дар он вазъияти ниҳоят буҳрони сиёсиву иқтисодиву иҷтимоӣ ба дӯш гирифтани зимоми давлатдории кишваре, ки ҳатто маркази маъмуриаш зери тасарруфи гурӯҳҳои силоҳбадаст қарор дошта, масоили оштии милливу ба сулҳу салоҳ овардани сангарҳои муқобил, ба Ватан баргардонидани гурезаҳои иҷборӣ, таъмини аҳолӣ лоақал ба нону ғизои аввалия ва кафолати сарпаноҳиву бехатарии мардум аз мушкилоти мураккабу печида арзёбӣ мегардид. Бар замми мушкилоти зикргардида, ҳамчунин, дар иҷлосия масъалаҳои давлату давлатдорӣ аз мадди назар дур намонда буд ва бо ташаббусу пешниҳоди Раиси тозаинтихоби Шурои Олии Ҷумҳурии Тоҷикистон рамзҳои давлатӣ Парчам, Нишон ва Суруди миллии Тоҷикистон қабул гардид. Яъне, бардошту тавони шуҷоатмандона дар ҳаллу фасли масоили печидаи оғози фаъолияти ҳокимияти қонунӣ аз роҳбари аввал зеҳнияту иродаи ниҳоят бузургро талаб мекард, ки ин зарфиятҳои барҷаста дар гуфтору тасмимгириҳои ҷасуронаи муҳтарам Эмомалӣ Раҳмон таҷассум ёфта буд. Аз ин лиҳоз, Иҷлосияи XVI Шурои Олии Ҷумҳурии Тоҷикистон заминагузори воқеии эҳёву ташаккули давлати навини мо, қабули нахустин Конститутсияи Тоҷикистони соҳибистиқлол тариқи раъйпурсии умумихалқӣ ва интихоби Президенти кишвар мебошад. Ба инобати ин дастоварду комёбиҳои бузургу беназир соли 2016 дар асоси Қонуни Ҷумҳурии Тоҷикистон “Дар бораи рӯзҳои ид” 16 - ноябр Рӯзи Президенти Ҷумҳурии Тоҷикистон эълон гардид. Маврид ба зикри хос аст, ки марҳилаи нави давлатдории миллӣ аз ҳамин санаи таърихӣ оғоз ёфтааст, ки тибқи Конститутсияи давлати соҳибихтиёр шакли идораи президентӣ дар Ҷумҳурии Тоҷикистон ва ба иҷрои вазифа шуруъ намудани Президенти тозаинтихоб оғоз гардидааст. Яъне, Рӯзи Президент қабул гардидани 16-уми ноябр ин нишони эҳтирому эътирофи сиёсати давлатдории нави кишвар, таъмини сулҳу субот ва ваҳдати мардум, афзудани обрӯю нуфузи Тоҷикистони соҳибистиқлол дар арсаи байналмилалӣ мебошад, ки ин ҳама дастовардҳои таърихӣ ба фаъолияти босамари Президенти Ҷумҳурии Тоҷикистон алоқамандӣ дорад.

Қабл аз ҳама фидокориҳои ватандӯстона дар роҳи наҷоти миллату давлати мо аз парокандагӣ муҳтарам Эмомалӣ Раҳмон рисолати сарвариро аз эҳтироми бузургу арҷгузорӣ ба муқаддасоти миллату давлат оғоз бахшида, қабл аз ба минбар баромадан нахуст Парчами давлатиро бӯсида ба дидагони хеш молиданд, ки барои мо мардуми Тоҷикистон мушоҳидаи ин манзараи ҳароратангез ҳикматҳои зиёд дошт. Ҳамин сон, баъди чанд лаҳзае аз минбари Иҷлосияи тақдирсоз нахустин Паёми ҷонбахши сиёсатмадори ҷавон садо дод: “Ман ба Шумо сулҳ меорам ва то як гурезаи тоҷик дар хориҷи кишвар аст, ором буда наметавонам”.

Баъдан, дар вазъияти ҳассоси соли 1994 ташкилу баргузор намудани раъйпурсии умумихалқӣ, Сарвари давлат ба эътимоду боварӣ ва такя ба мардуми кишвар кафолати амнияту субот дар кишварамонро дода, кафили таъмини бехатарии нозирони байналмилалӣ дар интихобот гардид. Дар ҳоле ки як ҳолати таҳдиду хатар ба интихобкунандагону нозирони байналмилалӣ метавонист Тоҷикистони тозабунёдро дар саросари ҷаҳон ҳамчун кишвари ноамн муаррифӣ намояд. Хушбахтона, ин маъракаи муҳими сиёсӣ дар фазои орому озодона доир гардида, мардум нахустин Конститутсияи Тоҷикистони соҳибистиқлолро қабул намуданд.

Дигар аз ҷанбаҳои муҳиму тақдирсози оғози бунёдгузории давлати соҳибистиқлоламон ин буд, ки новобаста ба таъсиру нуфузи баъзе гурӯҳҳои қудратманд, ки иддае ҷонибдори давлати исломӣ ва қисмати дигар хоҳони сохти давлати коммунистӣ буданд, аммо Раиси тозаинтихоби Шурои Олии Ҷумҳурии Тоҷикистон аллакай сохти давлатдории минбаъдаи моро муайян намуда, гуфта буданд, ки мо ҷонибдори давлати демократӣ, ҳуқуқбунёд дунявӣ ва ягона мебошем. Воқеан, ин Паёми Сарвари ҷавон ифодагари мафҳумҳои хеле ҳам васеъ ва ояндабинонае буд, ки мурури вақт дар амал татбиқ гардида, масири минбаъдаи давлатдории моро муайян намуд.

- Моҳияти омӯзиши ҷанбаҳои фаъолияти роҳбарии Президенти кишвар муҳтарам Эмомалӣ Раҳмон барои ҷавонон ва насли ояндаи моро чӣ гуна арзёбӣ менамоед?

- Мусаллам аст, ки фаъолияти пурсамари роҳбарии Пешвои муаззами мо натанҳо мавриди омӯзиши таърихнигорону пажӯҳишгарони риштаи сиёсатшиносӣ, балки барои насли ояндасози кишварамон, аз ҷумла, ҳар фарди худогоҳу ватандӯст муҳим аст. Таҷрибаи беназири сулҳу ваҳдатофарӣ, ҷасорату матонати ҳаллу фасли мушкилоти печидаи ҷомеа ва давлат, салиқаи ба ҳам овардану сарҷамъии миллат, иродаи бузурги гузашту бардоштҳо ба хотири сулҳу ризоияти миллӣ аз зарфиятҳои муҳиму хиради фарзанди фарзонаи халқи тоҷик муҳтарам Эмомалӣ Раҳмон аст, ки миллатро аз вартаи нестӣ ва сарзамини аҷдодиро аз парокандагӣ наҷот бахшид.

Муҳаббати бузург ба Ватан ва меҳру самимияти беандозаи ӯ ба мардум буд, ки Сарвари давлат аз рӯзҳои аввали ба сари қудрат омаданашон ба халқ такя намуданд. Чуноне дар Конститутсияи мо омадааст: “Халқ ифодакунандаи сарчашмаи ягонаи ҳокимияти давлатӣ мебошад ва халқ ин ҳокимиятро бевосита тариқи интихоботҳо ва ба воситаи вакилони мардумӣ амалӣ менамояд”.

Умуман, бо хиради азаливу саъю талошҳои наҷотбахши миллат дар муддати хеле кӯтоҳ бо ташкилу баргузории давра ба давра музокироти сулҳ, соли 1997 Созишномаи истиқрори сулҳ ва ризоияти миллӣ ба имзо расид. Мурури ба эътидол омадани авзои сиёсӣ дар кишвар ва рӯи даст гирифтани тадбирҳои ояндасозӣ мардумро атрофи Роҳбари давлат муттаҳид намуд. Тули даврони соҳибистиқлолӣ хизматҳои пайгиронаву бесобиқаи Пешвои миллат аз тарафи мардум ҳамовозии зиёд пайдо кард ва мардум, аз ҷумла, ҷомеаи ҷаҳонӣ Сарвари асилро шинохт. Ин ва дигар хизматҳои шоёни Президенти кишвар, ки шарҳу тавзеҳашон васею доманадор аст, зарурияти таҷлили Рӯзи Президентро ба миён овард.

- Дар моҳи ноябр мардуми Тоҷикистон боз як санаи муҳими таърихӣ- Рӯзи Парчами давлатиро низ ҷашн мегиранд. Вобаста ба ин мавзуъ чӣ гуфтаниҳо доред?

- Чуноне ки дар моддаи 3-и Конститутсияи Ҷумҳурии Тоҷикистон гуфта мешавад, Парчам, Нишон ва Суруди миллӣ рамзҳои давлатии Ҷумҳурии Тоҷикистон мебошанд. Аслан парчаму парчамдорӣ як мавзуи фароху доманадорест ва таҷрибаи парчамдории халқи тоҷик аз умқи таърих сарчашма мегирад. Ба гоҳи суҳбат атрофи Парчами давлатӣ пеши назар ҳамон “Парчами Коваёнӣ” ҷилвагар мешавад, ки қаҳрамони таърихӣ- Коваи оҳангар пешдомани чармини худро ба сари найза баркашида, бар зидди Заҳҳоки морон ба мубориза бархеста буд. Ҳамин сон бо ба сари қудрат омадани шоҳ Фаридун парчами давлати худро бо нақшу рамзҳои озодагиву озодихоҳӣ оро дода, онро “Парчами Коваёнӣ” ном гузошт. Гузори замонҳо ин Парчам то даврони салтанати Сосониён ҳамчун рамзи давлатдориву ҷасорати ниёгони мо ҳифзу парафшон буд. Дар замони Иттиҳоди Шуравӣ бошад Парчами Ҷумҳурии Тоҷикистон ифодагари рамзу арзишҳои он буд.

Ҳамин тавр, халқи тоҷик танҳо дар Иҷлосияи XVI Шурои Олии Ҷумҳурии Тоҷикистон соҳиби Парчам ва дигар рамзҳои давлатии худ гардид, ки дар ин рӯйдоди муҳими таърихӣ Сарвари давлат муҳтарам Эмомалӣ Раҳмон саҳми ниҳоят муҳим гузоштаанд. Баъдан соли 1997 Қонуни Ҷумҳурии Тоҷикистон дар бораи Парчами давлатӣ қабул гардид ва дар соли 1999 бо Фармони Президенти Ҷумҳурии Тоҷикистон Рӯзи Парчами давлатӣ ба расмият дароварда шуд, ки ҳамасола мардуми шарафманди Тоҷикистон дар 24- уми ноябр Рӯзи Парчами давлатиро ҷашн мегиранд. Тавре ҳамагон шоҳид будем, соли 2011 ба ифтихори 20- солагии Истиқлолияти давлатӣ бо ташаббуси Роҳбари давлат дар пойтахти кишварамон бузургтарин Парчам бо баландии парчампояи 165 метрӣ гузошта шуд, ки имрӯз ба намоди ифтихори миллӣ табдил ёфтааст.

- Дар ин рӯзу лаҳзаҳои хуҷастапайк, ки ҷашнҳои фархундаи Ватани азизамонро истиқбол намуда истодаем, ба мардуми кишвар чӣ таманно доред?

- Дар арафаи ин ҷашнҳои бузург таманно дорам, ки Парчами Тоҷикистони азиз асрҳои аср парафшону ваҳдату ягонагии миллати мо ҷовидонӣ бошад ва ба хонадони якояки ҳамватанонамон файзу баракати афзун орзумандам.

- Бо сипосу миннатдорӣ аз чунин як суҳбати пурмуҳтаво ба шумо низ дар ҳаёту фаъолияти пурсамаратон муваффақияту комёбиҳо таманно дорем.

Мусоҳиб Юсуфи Собир

Похожие новости:

Добавить комментарий

Ахбор

Дӯстӣ. Бунёди боз як иншооти соҳаи тандурустӣ 13:59 Ҷ. Балхӣ. Бунгоҳи тиббии нав ифтитоҳ шуд 16:08 3 ДАЛЕЛ БАРОИ МУТОЛИАИ КИТОБ 13:56 Намоиш-фурӯши китобҳо бахшида ба "Ҳафтаи китоби кӯдакону наврасони Тоҷикистон" 13:52 СУХАНИ ТАБРИКИИ РАИСИ ВИЛОЯТИ ХАТЛОН ДАВЛАТАЛӢ САИД ДАР ЧОРАБИНИИ РӮЗИ ДАЪВАТШАВАНДА 13:47 ПАДИДАИ БЕНАЗИР ДАР ХАТЛОН 13:43 ИНСОНИ КОМИЛ, ТАБИБИ ҲОЗИҚ 13:16 ПАЁМИ ТАБРИКИИ РАИСИ ВИЛОЯТИ ХАТЛОН ДАВЛАТАЛӢ САИД БА МУНОСИБАТИ ИДИ САИДИ ФИТР 16:34

Маҷаллаи №6-2019

Серхонандаҳо

Хатлон 109 нафақагири аз 100 сола боло дорад ПЕШАИ ПУРИФТИХОР ХАТЛОН: АЁДАТИ МОДАРИ 104-СОЛА ВА СОБИҚАДОРЕ, КИ 62 СОЛ ИНҶОНИБ ОМӮЗГОР АСТ Тақдими 100 000 сомонӣ ба ғолибон Таҷлили Рӯзи Модар дар Хатлон Хатлон. 113- солагии матбуоти тоҷик таҷлил шуд ХОВАЛИНГ. МАТБАА СОҲИБИ ДАСТГОҲИ ЗАМОНАВӢ ШУД Дар шаҳри Бохтар 350 ҳазор гул шинонида шудааст Ёвон. Майдончаи варзишӣ ифтитоҳ шуд Пешвои миллат эҳёгари Наврӯз