Инак баъди чандин солҳо ман, писари хурдӣ ва нозпарвари шумо, аз роҳи хеле дур ба кӯҳистон, ба умеду назру ниёиш ва зиёрати манзили охирати шумо, ба деҳаи аҷдодӣ омадам.

Дар ин тамузи тобистон ба ростӣ мазористон дар оғӯши гулу буттаҳо ва дарахтони сабз як табиати нотакрори баҳориро мемонад.

Дар ин оромии оромгоҳ танҳо садои шилдирроси шаршараи рӯ ба рӯйи мазор, ки аз канори харсанги беҳад азим поён мефарояд, бо садои хушнаво ва қақраи кабкони даштӣ муҳитро камее ноором месозад.

Падари азиз, аз поении манзили охирататон ва ин қабристони бекарон, дарёи муқаддас ва хурӯшони Панҷ бо як оромӣ ва ранги пурҷилои нилуфарӣ каф зада мегузарад.

- Падари бузургвор он ватани бузург ва ягона, ки дар ёддоштҳоят аз он бо як ифтихор ва ҳурмату эҳтиром нигоштаед, дигар арзи вуҷуд надорад. Дар ин асос, аз он чизе, ки оид ба худшиносии миллӣ ва истиқлолият дар он солҳои дури 60-уми асри пор гуфтаӣ кунун рӯи об омада ва Тоҷикистони азизат, ки бо меҳр дар борааш навиштаӣ, имрӯз соҳибистиқлол аст!

- Падарҷони азиз!

Суханҳои қайдии шумо дар хусуси кам будани адабиёти бадеӣ ва педагогӣ вобаста ба тарбияи оиладорӣ ва ин мушкилоти муҳими педагогӣ баъди солҳои 90-ум ҳақиқаташро дар тамоми хоки Шуравӣ ва Тоҷикистони азиз ёфт. Имрӯз андешаҳои педагогии шумо оид ба тарбияи педагогии оиладорӣ чанд даҳсола боз дар хоки пасошуравӣ чун фанни алоҳида омӯхта мешавад. Аз оне, ки шумо як педагоги навовар ва хело ҳам ҷавони тоҷик дақиқкорона, он солҳо яке аз аввалинҳо шуда дар империяи азими Шуравӣ оид ба ин проблемаи педагогии мактаби Шуравӣ амиқан ва ба таври касбӣ андеша намудаед, ман писари нозпарвари шумо меболам.

Қиблагоҳи бузург, эй шахсияти бароям аз ҳама азиз, аз ҳама қимат, эй бахшандаи ҳаёти ман!

Чанде пеш ба он мактабе, ки сарвараш будед ва бо дастони худ ва ташаббуси худ охири солҳои 50-ум хишти аввалинашро гузошта, онро сохтед ва ин мактаби фаррох ва замонавӣ то имрӯз маркази бузурги маънавӣ ва омӯзгории ноҳия аст, қадам ранҷа кардам. Хушбахтона, баъди солҳои зиёде, ба ҷои мактаби сохтаи шумо, имрӯз мактаби хушсохту замонавӣ, балки беҳтарин мактаб дар кишвар зери сиёсати наҷибона ва маорифпарваронаи Перезиденти Ҷумҳурии Тоҷикистон, Пешвои муаззами миллат, муҳтарам Эмомалӣ Раҳмон дар ин тангнои кӯҳистон қомат рост кардааст. Мактабе, ки он ҷо басо навоварӣ кардед ва номи худро то ба долонҳои Вазоратхонаҳои маорифи Иттиҳоди Шуравӣ ва Тоҷикистон бо навоварӣ, принсипнокӣ, дониши баланд ва чун зиёии пешқадам бурдаед ва мактабе, ки номи Сталинро дошт ва бо таку даву ташаббуси шумо номи омӯзгори бани башарият Саъдии Шерозиро гирифта буд, имрӯз мактаби беҳтарин аст.

Ман писари кӯчаки шумо бо роҳбаладии мудири шуъбаи маориф ва дигар омӯзгорон вориди мактаби шумо гаштам. Мактаб, бо ташаббуси ҷавонони фарҳангии диёр ва ибтикори сиёсати созанда ва маорифпарваронаи Пешвои миллат, Президенти Ҷумҳурии Тоҷикистон, хело ободу зебост ва ба таври аъло аз лиҳози меъморӣ сохта шуда, дили касро шоду масрур мегардонад.

Мактабат падарҷон моро хуш қабул кард. Маро дар иҳота ва истиқболи гарми толибилмон ва омӯзгорон бо гулу гулдаста истиқбол гирифтанд. Дар дохили мактаб қадам мезадаму ҳушу ёдам ба ёди шумо буд.

Оҳ, падари бузургвор!

Он дам ман худро хушбахттарин шахс мепиндоштам. Он рӯз, шогирдони меҳрубони шумо бо як меҳру муҳаббат ва самимият дар бораи устоду роҳбари ҷавонмарги хеш сухан карданд.

Ба ростӣ дарёфтам, ки шумо инсони заминӣ не, балки осмонӣ будаед! Аз ин рӯ ҷаҳони фарҳангӣ ва маънавии кӯҳистони тоҷикро дар 32 соли ҳаёти кӯтоҳу пурбаракати худ як такон додеду рафтед. Сурати зебои шуморо падарҷон ба мактабатон супоридам. Ҳоло акси зебои шумо дар лавҳи директорони мактаб қарор гирифтааст.

Падарҷони азиз!

Бароятон як чиз, амалеро мегӯям: шогирдони зиёд, вафодор ва донишманде тарбия кардаед. Дар куҷое, ки будам, чун шогирдонат дарёфтаанд, ки ман писари шумоям, боэҳтироми баланд нисбати устоди бузургу ҷавонмарги хеш аз ҷой бархоста, бо як эҳтироми хоса бо ман мулоқот кардаанд.

Дар чунин ҳолатҳо падарҷони азиз меандешам, оё шарт ҳаст, ки инсон 100 сол умр бинаду коре барои ҷомеаю башарият ва миллати хеш анҷом надиҳад? Чун тандиси беҷон ва карахт ё бо аъмоли безории аҳриманӣ асре беш зияд ва чун даргузарад, рӯзи дигар мазори ӯ ва хотирааш ба нобудӣ ва фаромӯшӣ равад. Чунин инсонҳои дарозумри беамал ва зишткор фикр мекунам, ки ҳамон давра, ҳамон рӯзи таваллуд аллакай мурдаанд!

Ман писари шумо, дар кору амал бо номи шумо ҳама вақт ифтихор мекунам ва эҳтиром мегузорам.

Шумо ором, дар ватани биҳиштосои худ, канори рӯди муқаддаси Панҷ-Пири дарёбод (ба гуфти дӯсту ҳамсабақатон, устоди бузурги шеъри порсии имрӯз устод Муъмин Қаноат) бихобед.

Ман давоми умри кӯтоҳ ва пурбаракати шумо хоҳам буд!

Ман сояи қомати чун сарв болои шумо, бо чеҳраи басо зебои тоҷиконаи шумо ва дорои ифтихори басо баланди миллӣ ва хело пурғурур ба истеъдоди суханварӣ ва нотиқии шумо низ каме ҳам бошад даст ёфтаам.

Чеҳраи зебо, сирати зебои шумо дар тани ман дар пайкари ман ҷойгир ва дар шараёни хунгарди ман ҷорист падарҷон!

Падари бузурги ман!

Имрӯз ба шарофати сиёсати маорифпарваронаи роҳбари миллату давлати Тоҷикистон соҳаи маорифи Тоҷикистон басо пешрав гаштаву бо ибтикори Роҳбари давлат ба омӯзгорон арҷ гузошта мешавад. Омӯзгор имрӯз дар ҷомеаи Тоҷикистони азиз ҷойгоҳи баланду сазовору шоиста ва ному касби худро соҳиб гаштааст ва чи тавре, ки Пешвои миллат дар Рӯзи дониш иброз доштаанд: «Эҳтиром ба омӯзгор –эҳтиром ба ояндаи давлату миллат аст».

Падари бузургу ҷавонмарг ва ормонии ман, 90- солагӣ муборак бошад ва чи тавре, ки дӯстонатон дар таъзияномаи хеш 58 сол муқаддам дар нашрияҳои даврӣ навишта буданд: «Дар хоки ватан осуда бихобед Давлатҷони азиз, омӯзгори ҷавонмард, ҷавонмарг ва беҳамтои миллат!»

Варқа Зайниддин,

Ёвари калони прокурори вилояти Хатлон,

Мушовири адлияи дараҷаи 1

Похожие новости:

Добавить комментарий

Ахбор

Дӯстӣ. Бунёди боз як иншооти соҳаи тандурустӣ 13:59 Ҷ. Балхӣ. Бунгоҳи тиббии нав ифтитоҳ шуд 16:08 3 ДАЛЕЛ БАРОИ МУТОЛИАИ КИТОБ 13:56 Намоиш-фурӯши китобҳо бахшида ба "Ҳафтаи китоби кӯдакону наврасони Тоҷикистон" 13:52 СУХАНИ ТАБРИКИИ РАИСИ ВИЛОЯТИ ХАТЛОН ДАВЛАТАЛӢ САИД ДАР ЧОРАБИНИИ РӮЗИ ДАЪВАТШАВАНДА 13:47 ПАДИДАИ БЕНАЗИР ДАР ХАТЛОН 13:43 ИНСОНИ КОМИЛ, ТАБИБИ ҲОЗИҚ 13:16 ПАЁМИ ТАБРИКИИ РАИСИ ВИЛОЯТИ ХАТЛОН ДАВЛАТАЛӢ САИД БА МУНОСИБАТИ ИДИ САИДИ ФИТР 16:34

Маҷаллаи №6-2019

Серхонандаҳо

Хатлон 109 нафақагири аз 100 сола боло дорад ПЕШАИ ПУРИФТИХОР ХАТЛОН: АЁДАТИ МОДАРИ 104-СОЛА ВА СОБИҚАДОРЕ, КИ 62 СОЛ ИНҶОНИБ ОМӮЗГОР АСТ Тақдими 100 000 сомонӣ ба ғолибон Таҷлили Рӯзи Модар дар Хатлон Хатлон. 113- солагии матбуоти тоҷик таҷлил шуд ХОВАЛИНГ. МАТБАА СОҲИБИ ДАСТГОҲИ ЗАМОНАВӢ ШУД Дар шаҳри Бохтар 350 ҳазор гул шинонида шудааст Ёвон. Майдончаи варзишӣ ифтитоҳ шуд Пешвои миллат эҳёгари Наврӯз