Мактаб – интернат ба истифода дода мешавад

Раиси ноҳияи Вахш Қурбоналӣ Қувватзода зимни нишасти матбуотӣ гуфт, ки бо ташаббуси фонди хайриявии Арабистони Саудӣ бунёди мактаб – интернати ноҳия дар арафаи анҷомёбӣ қарор дорад. 
Қайд гардид, ки иншоот бо харҷӣ 8 миллион сомонӣ бунёд шуда, дар он 480 нафар хонанда ба таълиму тарбия фаро гирифта мешаванд.
Инчунин дар ноҳия бунёди як муассисаи таълимӣ барои 480 хонанда дар ду баст ва ду синфхонаи иловагӣ барои 48 ҷойи нишаст дар як баст ба охир расидааст, ки рӯзҳои наздик мавриди баҳрабардорӣ қарор мегиранд.
Боз дар назди 14 муассисаи таълимӣ сохтмони 103 синфхонаи иловагӣ барои ба таҳсил фаро гирифтани 2200 хонанда дар як баст бо маром идома дорад.
Дар самти соҳаи тандурустӣ дар доираи ҳамкориҳои шарикӣ аз тарафи “Лоиҳаи ҳифзи саломатии модару кӯдак ва беҳтар намудани самти ёрии таъҷилии тиббӣ дар ноҳияҳои вилояти Хатлон” таъмири асосии беморхонаи марказии ноҳия дар арафаи анҷомёбӣ қарор дорад. Он бо харҷи 9 миллион евро таъмир шуда, бо тамоми таҷҳизоти муосири тиббӣ муҷаҳҳаз хоҳад шуд.
-Соли гузашта 4 бунгоҳи саломатӣ сохта ба истифода дода шуда, 6 бунгоҳи саломатии дигар аз таъмири асосӣ бароварда шуд ва айни замон дар 9 маркази саломатии деҳотӣ таъмири асосӣ бо маром идома дорад, - гуфт Қурбоналӣ Қувватзода.
Сулаймон СУЛТОН