Маҷаллаи Сафо
Шеъру адаб
Чеҳра
Маслиҳати муфид
Номаҳо
ТАРБИЯИ МАЪНАВӢ – ВАСИЛАИ МУҚОВИМАТ БО ИФРОТГАРОӢ
Дар даврони муосир, ифротгароӣ ва шомилшавии ҷавонон ба гурӯҳҳои экстремистӣ яке аз мушкилоти ҷиддии ҷомеа маҳсуб меёбад. Бо вуҷуди пешрафти илму техника ва дастрасии фаровони иттилоотӣ, баъзе ҷавонон ҳанӯз ҳам ба андешаҳои маҳдуд ва ғояҳои ифротӣ майл доранд. Дар мусоҳибаи навбатӣ Шарофат Дониёр, сармуҳаррири маҷаллаи “Меҳровар” нақши оила, мактаб ва расонаҳои иттилоотиро дар пешгирӣ аз ин зуҳурот баррасӣ мекунад ва маслиҳатҳои мушаххас барои тарбияи фарзандон ва рушди худогоҳии ҷавонон пешниҳод менамояд.
– ИМРӮЗ МАСЪАЛАИ ИФРОТГАРОӢ ЯКЕ АЗ МАВЗУЪҲОИ МУҲИМИ ҶОМЕАИ ҶАҲОНӢ МАҲСУБ МЕЁБАД. БА НАЗАРИ ШУМО, МАФҲУМИ ИФРОТГАРОӢ ЧӢ МАЪНО ДОРАД?
– Ифротгароӣ, пеш аз ҳама, маҷмуи андешаҳо ва амалҳое мебошад, ки ба қонунҳои амалкунандаи давлат, арзишҳои миллӣ ва меъёрҳои пазируфташудаи ҷомеа мухолифат дорад. Вақте шахс ё гурӯҳе кӯшиш мекунад диду назари худро бо роҳи зӯроварӣ ё таблиғоти нодуруст ба дигарон таҳмил намояд, чунин рафтор метавонад ҳамчун зуҳуроти ифротгароӣ арзёбӣ гардад. Ин зуҳурот аксаран бо экстремизм ва терроризм ҳамбастагӣ дошта, барои амнияти ҷомеа хатари ҷиддӣ эҷод мекунад.
– БО ВУҶУДИ ПЕШРАФТИ ИЛМУ ТЕХНИКА ВА ФАРОҲАМ БУДАНИ ИМКОНИЯТҲОИ ЗИЁД БАРОИ ТАҲСИЛУ РУШДИ ШАХСИЯТ, ЧАРО БАЪЗЕ ҶАВОНОН БА ГУРӮҲҲОИ ИФРОТГАРО ШОМИЛ МЕШАВАНД?
– Сабабҳои ин раванд гуногунанд. Аммо яке аз омилҳои асосӣ сатҳи пасти маърифату ҷаҳонбинӣ мебошад. Ҷавоне, ки дониши кофӣ надорад ва воқеиятҳои ҷомеаро таҳлил карда наметавонад, ба осонӣ зери таъсири таблиғоти гурӯҳҳои ифротгаро қарор мегирад. Мутаассифона, баъзе ҷавонон кам китоб мехонанд ва бештар ба иттилооти тасодуфӣ ё муғризонае, ки дар шабакаҳои иҷтимоӣ паҳн мешавад, такя мекунанд. Ин ҳолат онҳоро ба доми таблиғоти ғаразнок гирифтор месозад.
– ЯЪНЕ ШАБАКАҲОИ ИҶТИМОӢ НИЗ МЕТАВОНАНД ДАР ИН РАВАНД ТАЪСИРГУЗОР БОШАНД?
– Бешубҳа. Имрӯз шабакаҳои иҷтимоӣ ба як фазои бузурги иттилоотӣ табдил ёфтаанд. Дар баробари манфиатҳои зиёд, онҳо метавонанд воситаи паҳн намудани ғояҳои ифротгаро низ бошанд. Баъзе ҷавонон бидуни дарки паёмадҳои чунин иттилоот аз ин шабакаҳо истифода мебаранд. Дар натиҷа, тавассути мағзшӯии иттилоотӣ, ки аз ҷониби гурӯҳҳои иртиҷоӣ роҳандозӣ мешавад, ба ақидаҳои нодуруст бовар мекунанд.
– ДАР ИН МАВРИД НАҚШИ ОИЛА ТО ЧӢ АНДОЗА МУҲИМ АСТ?
– Суоли хеле бамаврид. Нақши оила бисёр калидӣ аст. Оила пойдевори ҷомеа мебошад. Тарбияи фарзанд маҳз аз муҳити оила оғоз мегардад. Агар дар оила муҳити солим, муносибати нек ва назорати оқилона вуҷуд дошта бошад, фарзанд бо ҷаҳонбинии дуруст ба воя мерасад. Волидон бояд ба фарзандон на танҳо дониш, балки фарҳанги истифодаи дурусти технологияҳои муосир, аз ҷумла интернет ва телефонҳои мобилиро низ омӯзонанд.
– ОЁ МУАССИСАҲОИ ТАЪЛИМӢ МЕТАВОНАНД ДАР ПЕШГИРИИ ИН ЗУҲУРОТ САҲМГУЗОР БОШАНД?
– Албатта. Мактаб ва донишгоҳҳо дар тарбияи маънавии ҷавонон нақши бузург доранд. Баргузории суҳбатҳои фаҳмондадиҳӣ, викторинаҳо, озмунҳо ва мулоқот бо мутахассисон метавонанд ба боло бурдани маърифати ҳуқуқӣ ва иҷтимоии ҷавонон мусоидат намоянд. Ин гуна чорабиниҳо бояд мунтазам ва бо усулҳои ҷолиб ба роҳ монда шаванд, то ҷавонон тавонанд хатарҳои ифротгароиро дуруст дарк кунанд.
– БА АНДЕШАИ ШУМО ВОСИТАҲОИ АХБОРИ ОММА ДАР ИН РАВАНД ЧӢ НАҚШ ДОРАНД?
– Воситаҳои ахбори омма яке аз муҳимтарин абзорҳои таъсиррасонӣ ба афкори ҷомеа мебошанд. Расонаҳо метавонанд тавассути барномаҳои таҳлилӣ, мусоҳибаҳо, мақолаҳо ва гузоришҳои иттилоотӣ мардумро аз хатарҳои ифротгароӣ огоҳ созанд. Бо пешниҳоди мисолҳои воқеӣ ва таҳлилҳои касбӣ онҳо метавонанд дар баланд бардоштани сатҳи худшиносӣ ва худогоҳии ҷавонон саҳми назаррас гузоранд.
– ИМРӮЗ ҶОМЕА БАРОИ ПЕШГИРИИ ИН ЗУҲУРОТИ ХАТАРБОР ЧӢ КОРҲОРО БОЯД АНҶОМ ДИҲАД?
– Пешгирии ифротгароӣ кори дастаҷамъона аст. Оила, мактаб, ҷомеа ва расонаҳои иттилоотӣ бояд ҳамкорӣ намоянд. Муҳим аст, ки ҷавонон ба роҳи худшиносӣ, худогоҳӣ ва эҳтиром ба арзишҳои миллӣ ҳидоят карда шаванд. Агар мо ба тарбияи дурусти насли наврас диққати ҷиддӣ диҳем, метавонем ҷомеаи солим ва устуворро бунёд намоем.
– ДАР АНҶОМИ СУҲБАТ БА ҶАВОНОН ЧӢ МАСЛИҲАТҲО МЕДИҲЕД?
– Ба ҷавонон мехостам бигӯям, ки дониш омӯзанд, китоб хонанд ва ҳар иттилоотеро, ки мегиранд, бо ақлу таҳлил қабул намоянд. Ҷавонони соҳибмаърифат ва худогоҳ метавонанд ояндаи давлат ва ҷомеаро устувор нигоҳ доранд. Танҳо бо дониш, маърифат ва ватандӯстӣ метавон аз ҳар гуна андешаҳои ифротӣ эмин монд.
Мусоҳиб М. Акрамов
Добавить комментарий
Ахбор
БОХТАР. БЕШ АЗ 11 ҲАЗОР НАФАР КӮДАКОНУ НАВРАСОН БА ИСТИРОҲАТ ФАРО ГИРИФТА МЕШАВАНД 16:49ДОНОРОНИ ХУН ЗИЁД ШУДААНД 13:01ДАНҒАРА. МАЙДОНЧАИ НАВИ ВАРЗИШӢ ИФТИТОҲ ГАРДИД 15:05Ҷ. БАЛХӢ. АЗ НАҚША ЗИЁД ИНШООТ БУНЁД ШУД 15:02РАИСИ ВИЛОЯТИ ХАТЛОН БА ХОНАВОДАИ МАРҲУМ ФАЙЗАЛӢ РАҲИМОВ ИЗҲОРИ ҲАМДАРДӢ НАМУДАНД 16:55РАИСИ ВИЛОЯТИ ХАТЛОН АЗ РАФТИ КОРҲОИ КИШОВАРЗӢ ДАР НОҲИЯИ ПАНҶ БОЗДИД НАМУДАНД 14:49РАИСИ ВИЛОЯТИ ХАТЛОН БО ПАЁМАДҲОИ ОФАТИ ТАБИӢ ДАР НОҲИЯИ ПАНҶ АЗ НАЗДИК ШИНОС ШУДАНД 12:43ФОРУМИ БАЙНАЛМИЛАЛИИ САЙЁҲӢ ДАР ЧИЛДУХТАРОНИ МУЪМИНОБОД 16:53
Маҷаллаи №6-2019
Серхонандаҳо
ФОРУМИ БАЙНАЛМИЛАЛИИ САЙЁҲӢ ДАР ЧИЛДУХТАРОНИ МУЪМИНОБОД
БОХТАР. БОЗ ЯК КӮДАКИСТОНИ НАВУ ЗАМОНАВӢ БУНЁД МЕШАВАД
МУЛОҚОТИ РАИСИ ВИЛОЯТИ ХАТЛОН ДАВЛАТАЛӢ САИД БО НАМОЯНДАГОНИ МАГАТЭ: ТАҲКИМИ ҲАМКОРИҲО БАРОИ РУШДИ СОҲАИ ТАНДУРУСТӢ
ДОНОРОНИ ХУН ЗИЁД ШУДААНД
Ҷ. БАЛХӢ. АЗ НАҚША ЗИЁД ИНШООТ БУНЁД ШУД
Ҷ. Балхӣ. Мумфаршкунии 6 километр роҳ оғоз гардид
ДАНҒАРА. МАЙДОНЧАИ НАВИ ВАРЗИШӢ ИФТИТОҲ ГАРДИД
ЖУРНАЛИСТЕ, КИ ҶАҲОНРО БО ДИЛ МЕШУНАВАД
ФУРӮҒИ МАЪРИФАТ ДАР ЯК ХОНАДОНИ ТОҶИК
ПАЁМИ ШОДБОШИИ РАИСИ ВИЛОЯТИ ХАТЛОН ДАВЛАТАЛӢ САИД БА МУНОСИБАТИ ФАРОРАСИИ ИДИ САИДИ ҚУРБОН
