ЁВОН. ТАҶДИДУ БОЗСОЗИИ РОҲҲО БО МАРОМ ИДОМА ДОРАД

Бо ташаббуси мақомоти иҷроияи ҳокимияти давлатии ноҳияи Ёвон ва саҳми соҳибкорони ватандӯст, аз ҷумла роҳбари ҶДММ “Моҳир – семент” роҳи байнидеҳавии деҳаи Даҳанаи Ҷамоати деҳоти Даҳанаи ноҳия ба масофаи 2,5 километр мумфарш карда шуд. 

Дар ин бора аз мақомоти иҷроияи ҳокимияти давлатии ноҳияи Ёвон ба “Сафо” иттилоъ доданд.

Иқдоми мазкур дар асоси дастуру супоришҳои Асосгузори сулҳу ваҳдати миллӣ – Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон амалӣ гардида, ҷиҳати рушди инфрасохтори деҳот, таъмини шароити мусоиди гашту гузор ва ҳаракати бемамонияти нақлиёт мусоидат хоҳад кард. 

Масофаи роҳи мумфаршгашта 2,5 километр ва паҳноиаш 12 метр буда, барои анҷоми корҳои сохтмонӣ техникаҳои махсуси соҳавӣ ҷалб гардидаанд. 

Тадбирҳои ободонӣ дар доираи нақша – чорабиниҳои ҷашни 35 –солагии Истиқлолияти давлатии Ҷумҳурии Тоҷикистон дар ноҳияи Ёвон вусъати тоза касб намуда, дар назар аст, ки мумфаршкунии роҳҳои ҳудуди ноҳия идома ёбад. 

С. СУЛТОНОВ