Пешоҳангони фарҳанги миллӣ

Театр ба унвони пайвандгари маънавии наслҳо дар тарбияи маънавии инсон нақши бағоят муҳим бозида, дар қиёс ба дигар намудҳои санъат муҳимтарин василаи таъсиррасонӣ дар ташаккули афкори ҷомеа арзёбӣ мегардад. Раҳнавардони ин ҷода ба дарки рисолати бар зимма доштаашон, ки тарғиби ахлоқи ҳамида, некиву адолатпарварӣ ва ҷумла арзишҳои муқаддаси ҳаётиро дар замири инсон парвардан аст, монои тарбиятгари инсон худ низ дар ин мактаби бузург рушду ташаккул меёбанд. Ин аст, ки сухани ҳунарпешаи асил ба мисоли панди дилнишин мақбули дилҳо ва ҳузурашон дар маҳфилҳо меҳру сафо мебахшад.

Ҷӯрахон Расулов аз зумраи шахсиятҳои маъруфи шаҳри Бохтар аст, ки солиёни зиёд дар соҳаи театр ва фарҳанг хизматҳои шоён анҷом додааст. Тавре худ изҳор медорад, аҳли ҳунар, ки бо нақшҳои офаридаашон дар тарбияву ташаккули афкори мардум нақши муассир доранд, бояд ҳамеша дар ҷустуҷӯи илму сухани воло буда, ҳама ҳастии худро ба саҳна бахшида бошанд. Ҳунарпешаи асил бо сеҳри сухан, нақшҳои мондагор андешаву афкори одамонро ба зиндагӣ тағйир дода, онҳоро ба адлу ҳақиқатҷӯӣ, росткориву арҷгузорӣ ба ҳаққу ҳуқуқҳои инсон талқин менамояд.

Ӯ дар ноҳияи Мир Сайид Алии Ҳамадонӣ, дар хонадони хизматчӣ чашм ба олами ҳастӣ кушодааст. Падар хизматчии одиву модараш хонашин буд ва рӯзгори фарзандонро ба заҳмати ҳалол пеш мебурданд. Завқу дилбастагиаш ба санъати театрӣ аз тарбияи устодони мактабиаш маншаъ мегирад, ки бо истеъдоди баланди шеъру сурудхонӣ наврасони лаёқатманде амсоли Ҷӯрахонро ба маҳфилҳои ҳунарӣ ҷалб намуда, минбаъд ин ҳаваскорони ҷавон дар маҳфилҳои ҳунариву озмуни сертамошобини “Бӯстон” маҳорати худро сайқал додаанд.

-Зодгоҳам диёри устоди номбардори санъати тоҷик шодравон Одина Ҳошим хоки ҳунарпарвар аст. Дар пайравӣ аз ин ҳунарманди беназир садҳо нафар ҷавонон ҳаёти худро ба саҳнаи театру санъати мусиқӣ бахшида, имрӯз дар рушду нумӯи соҳаи фарҳанги кишвари азизамон нақши пешоҳангӣ доранд. Аз ҷумла, камина ҳам баъди хатми таҳсилоти миёнаи умумӣ нахуст Омӯзишгоҳи маданӣ-равшаннамоиро хатм намуда, баъдан солҳои 1976-1980 дар шуъбаи актёрӣ, драма ва кинои Донишкадаи давлатии фарҳанг ва санъати Тоҷикистон ба номи Мирзо Турсунзода таҳсил намудаам,- бо ифтихор иброз медорад Ҷӯрахон Расулов.

Фаъолияти касбиро аз имрӯза Театри ба номи Одина Ҳошими ноҳияи зодгоҳаш оғоз бахшида, ҳини ҳимояи кори дипломӣ ӯ бо чанд тан аз ҳамсабақонашро бо роҳхати Вазорати фарҳанг ба Театри навтаъсиси собиқ вилояти Қӯрғонтеппа фиристоданд. Бо дастгириву роҳнамоии устодони ҳунар Ҷӯрахон ва як зумра ҳунарпешаҳои ҷавон аз қабили Меҳринисо Ҳоҷибоева, Зарина Хушвахтова, Худойназар Тилавов, Амина Табарова, Шобуддин Ҳасанов, Манасим Мадёров, Бурҳониддин Раҷабов дар намоишномаҳои “Пулдон”-и Желаш Биш, “Имтиҳон”-и Файзулло Ансорӣ ва якчанд асарҳои Антон Чехов нақшҳои ҷолибро офаридаанд.

-Театр макони тарбияи маънавии инсон аст, ки ба тамошобин илму маърифат меомӯзад, аз тамошои як саҳнаи театрӣ мардум гӯё як асари комилро мутолиа кардааст. Илова бар ин, театр инсонро амалан ислоҳ карда, ӯро таҳрик медиҳад, ки роҳи дурусти зиндагиро интихоб намояд,- мегӯяд пардозгари Театри вилоятии мусиқи мазҳакавии ба номи Ато Муҳаммадҷонови шаҳри Бохтар Ҷӯрахон Расулов. Ӯ дар идома гуфт, ки зарфияти дигари намоишномаҳои театрӣ ин вобаста ба синну соли одамон таҳия ва ба саҳна гузоштани асарҳои тарбиявию мафкурасозӣ аст ва бетардид, намоишномаҳои муносиби синну солӣ ба тамошобин таъсири амиқтар дорад.

Ҳунарманди асил, ки беш аз чиҳил соли умри худро дар ҷодаҳои театр ва соҳаи фарҳанг бахшидааст, меҳру таваҷҷуҳ ва эҳтирому маҳбубияти мардумро нисбат ба ҳунарпешаҳо волотар аз ҳама унвонҳо медонад. Ба андешаи ӯ дар ҷодаи театр ва таҳияву ба саҳна гузоштани намоишномаҳои мондагор аслан коргардонҳо ва эҷодкороне муваффақ мегарданд, ки маҳсули эҷодашон аз муқаддасоти миллату давлатдорӣ ва ниёзу арзишҳои муҳими мардуми меҳани хеш сарчашма гирифтааст.

-Дар баробари ба саҳна гузоштани асарҳои миллӣ дар Театри вилоятии мусиқӣ- мазҳакавии ба номи Ато Муҳаммадҷонови шаҳри Бохтар бояд ба хотири роҳату фараҳмандии мардум асарҳои мусиқиву мазҳакавӣ ба саҳна гузошта шаванд. Ёд дорам солҳои аввали фаъолияти касбии насли мо ҳунарпешаҳои ҷавон ба даврони рушду нумӯи театрҳо рост меомад. Бар замми фаъолияти назарраси театрҳо ва толорҳои пуртамошобин ҳамвора, аҳли ҳунар бо намоишномаҳои нав ба нави театри сайёр назди мардум мерафтанд.

- Нахуст коргардони моҳир Абдувалӣ Мақсудов ва баъдан Зафар Ҷаводов дар рушди театри вилоят нақши бориз гузоштаанд. Бахусус, солҳои роҳбарии Зафар Ҷаводов дар соҳаи театри вилоят гардиши бузург ба вуҷуд омад. Аз ҷумла, соли 1985 мо бо панҷ намоишномаҳои ҷолиби театрӣ- “Шоҳи урён”, “Модар нигарон буд”, “Обканда”-и Захватов ва ғайраҳо бо барномаи ҳисоботии театри вилоятӣ дар шаҳри Душанбе баромад доштем, - иброз дошт ҳамсуҳбатамон.

Ҷӯрахон Расулов тули фаъолияти пурсамар дар Театри вилоятии мусиқӣ- мазҳакавии ба номи Ато Муҳаммадҷонови шаҳри Бохтар, ҳамчунин, дар се давра солҳои 1997- 2000, 2004- 2007, 2010- 2014 вазифаи мудири шуъбаи фарҳанги шаҳри Бохтарро бар зимма дошта, 7 соли дигар ба ҳайси муовини сардори Раёсати фарҳанги вилояти Хатлон кору фаъолият бинмудааст.

Бо ифтихору шукргузорӣ аз пайроҳаи дар ин ҷода тай намудааш изҳор медорад, ки дар баробари рисолати касбӣ андар масири ҳунар шогирдони зиёдеро тарбия намудаааст, ки имрӯз дар рушду нумӯи фарҳанг ва театрҳои касбиву халқии кишварамон саҳми арзанда гузошта истодаанд. Ба пиндори ҳунарпешаи номвар бартарии фарҳангии миллати тоҷик аз ин нукта зоҳир мешавад, ки дар радифи зуҳури ҳунарпешаҳои номвари кишвар сарвари фарҳангдӯсту ҳунарпарвар дорем, ки ба хотири рушду пешрафтҳои соҳаи фарҳанг иқдомҳои бузургро амалӣ намуда истодаанд.

Ҳампешагону аҳли фарҳанг ва зиёиёни солманди шаҳри Бохтар ҳунарпешаи хушсалиқа, фарҳангшиноси собиқадор Ҷӯрахон Расуловро аз зумраи шахсиятҳои ифтихории водии Вахш мешуморанд, ки дар солҳои мушкили баъди ҳаводиси шаҳрвандӣ дар барқарорсозӣ ва рушди минбаъдаи соҳаи фарҳанг саҳми ниҳоят муҳим гузоштааст. Ӯ аз зумраи нахустин фарҳангпарварони асил ва ташаббускори баргузории нахустин маросими оммавии ҷашни Наврӯз дар водии Вахш ба ҳисоб меравад.

-Дарвоқеъ ҳам, нахустин маросими оммавии ҷашни Наврӯз дар маркази вилояти Хатлон бозгӯи шавқу таваҷҷуҳи мардум ба эҳёи расму оин ва урфу анъанаҳои хоси миллии мо буд. Барномаи фарҳангии он нахустин маросими идонаи наврӯзии шаҳри моро Қиёмиддин Сатторӣ таҳия карда буду баъди ризоияти мақомоти маҳаллиро гирифтан мо чорабинии оммавиро дар майдони имрӯза ҳудуди Театри вилоятии мусиқӣ- мазҳакавии ба номи Ато Муҳаммадҷонов баргузор намудем, - лаҳзае ба андеша фурӯ рафта, идома медиҳад ҳамсуҳбати мо. – Дигар аз чорабинии хотирмон дар саҳифаҳои рӯзгори мо нахустин маротиба истиқбол гирифтани Сарвари ҷавони мамлакат дар маркази маъмурии вилояти Хатлон аст. Моҳи декабри соли 1992 дар шабу рӯзе, ки сокинони шаҳр дар кӯчаҳо озод гашта наметавонистанд, хабар оварданд, ки Сарвари тозаинтихоби Тоҷикистон ба маркази вилоят ташриф меоранд. Дар он шабу рӯз баландгӯяку дигар асбобу таҷҳизоти барои аҳли фарҳанг як тараф истад, ҳатто як майдончаи ободу толори баргузории чорабиниҳои майдаро ҳам надоштем. Новобаста аз вазъи ноором дар минтақа он бегоҳӣ садҳо нафар сокинони маркази вилоят ба хотири дидори Сарвари давлат дар варзишгоҳи шаҳрамон ҷамъ омада буданд ва бегоҳии он рӯз муҳтарам Эмомалӣ Раҳмон аз минбаре, ки дар майдони варзишгоҳ ороста будем, суханронӣ намуданд.

Ҳамин сон, даврони соҳибистиқлолии кишвари азизамон сокинони ватандӯсту фарҳангпарвари шаҳри Бохтар ҳамеша Роҳбари давлатро бо хурсандиву болидаруҳӣ, дастовардҳои меҳнативу эҷодӣ ва бо шукуҳу шаҳомати хоса истиқбол мегиранд, ки ин аз самимияти Пешвои муаззами миллат нисбат ба халқ ва боварию эътимоди мардум ба Президенти маҳбуби кишварамон дарак медиҳад. Мо, ҳунарпешаҳо ва аҳли фарҳанг арҷгузорӣ ба ташаббусҳои бузургу хизматҳои шоёни Пешвои миллатро дар роҳи рушди фарҳанги миллӣ, рисолати касбиву ҳаётии худ мешуморем ва ҳастии худро дар ҷодаҳои касбӣ бахшида, дар рушду нумӯи минбаъдаи фарҳангу соҳаи театри кишвари соҳибистиқлоламон саҳми муассир хоҳем гузошт,- иброз дошт дар фарҷоми суҳбат Ҷӯрахон Расулов.

Юсуфи СОБИР

Похожие новости:

Добавить комментарий

Ахбор

Ҷ. Балхӣ. Бунгоҳи тиббии нав ифтитоҳ шуд 16:08 3 ДАЛЕЛ БАРОИ МУТОЛИАИ КИТОБ 13:56 3 ДАЛЕЛ БАРОИ МУТОЛИАИ КИТОБ 13:56 Намоиш-фурӯши китобҳо бахшида ба "Ҳафтаи китоби кӯдакону наврасони Тоҷикистон" 13:52 СУХАНИ ТАБРИКИИ РАИСИ ВИЛОЯТИ ХАТЛОН ДАВЛАТАЛӢ САИД ДАР ЧОРАБИНИИ РӮЗИ ДАЪВАТШАВАНДА 13:47 ПАДИДАИ БЕНАЗИР ДАР ХАТЛОН 13:43 ИНСОНИ КОМИЛ, ТАБИБИ ҲОЗИҚ 13:16 ПАЁМИ ТАБРИКИИ РАИСИ ВИЛОЯТИ ХАТЛОН ДАВЛАТАЛӢ САИД БА МУНОСИБАТИ ИДИ САИДИ ФИТР 16:34

Маҷаллаи №6-2019

Серхонандаҳо

Хатлон 109 нафақагири аз 100 сола боло дорад ПЕШАИ ПУРИФТИХОР ХАТЛОН: АЁДАТИ МОДАРИ 104-СОЛА ВА СОБИҚАДОРЕ, КИ 62 СОЛ ИНҶОНИБ ОМӮЗГОР АСТ Тақдими 100 000 сомонӣ ба ғолибон Таҷлили Рӯзи Модар дар Хатлон Хатлон. 113- солагии матбуоти тоҷик таҷлил шуд ХОВАЛИНГ. МАТБАА СОҲИБИ ДАСТГОҲИ ЗАМОНАВӢ ШУД Дар шаҳри Бохтар 350 ҳазор гул шинонида шудааст Ёвон. Майдончаи варзишӣ ифтитоҳ шуд Пешвои миллат эҳёгари Наврӯз