Маҷаллаи Сафо
Шеъру адаб
Чеҳра
Маслиҳати муфид
Номаҳо
АЗ ХУТАН ТО КУВАЙТ
«Ҷавонони боистеъдоду лаёқатманд мояи ифтихор ва сарбаландии миллатанд”
Эмомалӣ Раҳмон
БА ҶОЙИ САРСУХАН
Дар бораи кору фаъолияти табиби ҷавон Суннатулло Шарифзода ҳанӯз як сол пеш, замоне ки ӯ дар беморхонаи марказии ноҳияи Фархор фаъолият мекард, ният доштем мақолае таҳия намоем. Аммо бо сабаби серкорӣ, машғул будан ба корҳои ихтироъкорию таҳқиқотӣ ва иштирок дар конфронсу ҳамоишҳои илмӣ бо ӯ вохӯрдан муяссар нагардид.
Хушбахтона, дертар имконият даст доду дар яке аз рӯзҳои баҳори хуҷастапай дар назди Донишгоҳи давлатии тиббии Тоҷикистон ба номи Абуалӣ ибни Сино бо ӯ мулоқот намуда, суҳбати ҷолибе анҷом додем.
ДАР ОЛАМИ ОРЗУҲО ВА ТАҲСИЛ ДАР МАКТАБИ ДЕҲА
Суннатулло аз овони кӯдакӣ бо орзуву ҳадафҳои нек ба воя расидааст. Оилаи онҳо дар деҳаи Дарёобод, Ҷамоати деҳоти Хутани ноҳияи Фархор зиндагӣ мекунанд. Волидон дар таълиму тарбияи фарзандашон ҳамеша ғамхорӣ ва таваҷҷуҳи зиёд зоҳир менамуданд.
Вақте ки ӯ ба ҷои кори модараш – маркази саломатии деҳа мерафт, муносибати ғамхоронаи модарашро нисбат ба беморон мушоҳида намуда, орзу мекард, ки дар оянда табиб шавад ва ба мардум хизмат расонад.
Дар давраи таҳсил дар мактаби миёна бо дониши хубу аъло ва рафтору ахлоқи намунавӣ миёни ҳамсинфон фарқ мекард. Синфи 9-уми МТМУ №35-и ноҳияи Фархорро бо баҳои аъло ва аттестати сурх хатм намуд.
Баъдан тариқи озмун ба Мактаби Президентӣ барои хонандагони болаёқат дар шаҳри Кӯлоб дохил шуда, таҳсилро идома дод. Ҳамчун хонандаи фаъол бо дониши баланд, зеҳни қавӣ, ҷаҳонбинии васеъ ва истеъдоди фавқулода таваҷҷуҳи омӯзгорону мураббиёнро ба худ ҷалб кард.
Ҳангоми таҳсил дар олимпиадаи ҷумҳуриявӣ аз фанни биология иштирок намуда, соҳиби ҷои дуюм ва медали нуқра гардид.
Соли 2016 Мактаби Президентиро бо аттестати аъло хатм намуда, тариқи Квотаи Президентӣ ба Донишгоҳи давлатии тиббии Тоҷикистон ба номи Абуалӣ ибни Сино дохил гардид.
ТАҲСИЛ ДАР ДОНИШГОҲ
Суннатулло аз рӯзҳои аввали таҳсил худро ҳамчун донишҷӯи фаъол нишон дод. Ӯ ҷавони рустоӣ буда, бо дониши баланд, ташкилотчигӣ ва ташаббускорӣ миёни донишҷӯёни факултаи тиббӣ мисли «гули сари сабад» маъруф гардид.
Бештари вақти холии худро дар китобхонаи донишгоҳ ва Китобхонаи миллии Тоҷикистон мегузаронд. Аз курси дуюм сар карда, дар маҳфилҳо, конфронсҳо ва чорабиниҳои илмии факултет ва донишгоҳ фаъолона иштирок намуда, бо маърӯза баромад мекард.
Баъдан барои иштирок дар конфронсҳо, форумҳо ва ҳамоишҳои илмию ихтироъкории ҷумҳуриявию байналмилалӣ роҳ ёфт.
Дар давраи таҳсил дар Муассисаи давлатии Маркази тиббии шаҳрии №21-и шаҳри Душанбе ва ҳамчунин, дар интернатураи клиникии назди Донишгоҳи давлатии тиббии Тоҷикистон таҷрибаи корӣ андӯхт.
ОҒОЗИ ФАЪОЛИЯТИ КОРӢ
Соли 2020 донишгоҳро бомуваффақият хатм намуда, бо роҳхати Вазорати тандурустӣ ва ҳифзи иҷтимоии аҳолии Ҷумҳурии Тоҷикистон ба беморхонаи марказии ноҳияи Фархор фиристода шуд.
Ӯ фаъолияти худро ҳамчун духтури ҷарроҳ оғоз кард. Оғози кори ӯ ба даврае рост омад, ки дар тамоми ҷаҳон бемории COVID-19 паҳн шуда буд.
Табиби ҷавон тамоми донишу таҷрибаи худро барои пешгирӣ ва табобати беморон равона мекард. Шабу рӯз дар паҳлуи беморон қарор дошта, дарди онҳоро дарди худ медонист ва сиҳатии онҳоро хушбахтии худ мешуморид.
Баъд аз паси сар шудани ин беморӣ ӯ таҷрибаи бойи касбӣ андӯхт. Ҳангоми фаъолият донишҳои назариявии омӯхтаашро бо амалия пайваста, усулҳои муосири ҷарроҳиро меомӯхт.
Ҳамаи донишу таҷрибаи худро барои беҳтар намудани ташхис, баланд бардоштани сифати хизматрасонии тиббӣ ва ҷорӣ намудани усулҳои инноватсионӣ дар амалияи тиббӣ равона менамуд.
Маҳз ҳамин масъулиятшиносӣ ва навовариҳо сабаб гардиданд, ки ӯро барои идомаи фаъолият ба Муассисаи давлатии Маркази шаҳрии ёрии таъҷилии тиббии шаҳри Душанбе даъват намоянд.
ДАСТОВАРДҲО ВА ИХТИРОЪКОРИҲО
Суннатулло Шарифзода дар баробари фаъолияти корӣ дар чандин конфронсу форумҳои байналмилалӣ иштирок намуда, соҳиби мукофоту ҷоизаҳои баланд гардидааст.
Моҳи марти соли 2023 дар Конфронси байналмилалӣ дар шаҳри Тошканди Ҷумҳурии Ӯзбекистон иштирок намуда, соҳиби ҷоиза ва нишони сарисинагии «Беҳтарин мақолаи илмӣ дар ҳудуди ИДМ» гардид.
Рӯзи 3 майи соли 2024 дар Конфронси илмӣ-амалии донишҷӯён ва олимони ҷавон, ки дар Донишгоҳи давлатии тиббии Тоҷикистон баргузор гардид ва намояндагон аз 60 кишвари ҷаҳон иштирок доштанд, маърӯза намуда, дипломи дараҷаи I гирифт.
Ҳамчунин, дар Конфронси 78-уми илмӣ-амалии олимони ҷавон дар шаҳри Самарқанд (17 майи 2024), Конфронси байналмилалии олимони ҷавон дар Донишкадаи давлатии тиббии Бухоро (31 майи 2024) иштирок намуда, соҳиби ҷои аввал гардид.
Дар пойтахти Қазоқистон – шаҳри Остона Озмуни байналмилалии «100 идея барои ИДМ» баргузор гардид, ки дар он Суннатулло Шарифзода ғолиби мутлақ дониста шуда, соҳиби шоҳҷоиза гардид.
ДУ ДАСТОВАРД АЗ ҚУВАЙТ
Рӯзҳои 8–11 феврали соли ҷорӣ дар пойтахти Қувайт – шаҳри Ал-Қувайт Форуми 16-уми байналмилалии ихтироъкорон (IIFME) баргузор гардид. Дар ин ҳамоиш намояндагони 70 кишвари ҷаҳон иштирок карданд.
Суннатулло Шарифзода дар ин форуми сатҳи баланд Ҷумҳурии Тоҷикистонро муаррифӣ намуд ва соҳиби ду мукофоти бонуфуз гардид:
Медали тилло – ғолиби ҷои аввал дар номинатсияи «Тиб ва ихтирои беҳтарин», Медали биринҷӣ – ғолиби ҷои сеюм дар номинатсияи «Ихтирои гурӯҳӣ».
Дар суҳбат бо мо ӯ бо ифтихор гуфт, ки «Ҳангоми маросими ҷоизасупорӣ ман тоқии гулдӯзӣ бо навиштаҷоти “Тоҷикистон” доштам. Вақте ҳакамон фаҳмиданд, ки ман намояндаи Тоҷикистон ҳастам, бо эҳтиром гуфтанд: “Тоҷикистон ба пеш!”».
БА ҶОЙИ ОХИРСУХАН
Табиби ҷавону боистеъдод Суннатулло Шарифзода бо талоши пайваста, омӯзиши илм ва сабру таҳаммул ба дастовардҳои назаррас ноил гардидааст.
Бузурге гуфтааст:
«Дониш ва сабру таҳаммул асоси пирӯзиҳост».
Оре, ӯ зина ба зина барои фатҳи қуллаҳои илм ва пирӯзиҳо камари ҳиммат мебандад. Панди Соибро сармашқи фаъолияти худ медонад.
Агар номи баланд аз чарх хоҳӣ, сабр кун, Соиб,
Зи пастӣ метавон рафтан ба бом оҳиста – оҳиста.
Ӯ имрӯз ҳамчун духтури ҷарроҳ дар Маркази шаҳрии ёрии таъҷилии тиббии шаҳри Душанбе фаъолият намуда, ҳамзамон аспиранти кафедраи бемориҳои ҷарроҳии №1-и Донишгоҳи давлатии тиббии Тоҷикистон мебошад.
Ният дорад таҳқиқоти илмиро идома дода, дар ояндаи наздик рисолаи номзадии худро ҳимоя намояд.
Ӯ бо ифтихор таъкид мекунад, ки Ҳукумати кишвар, бахусус Пешвои миллат муҳтарам Эмомалӣ Раҳмон барои рушди илму маориф ва дастгирии ҷавонони боистеъдод тамоми шароиту имкониятҳои мусоидро фароҳам овардаанд.
Аъзам Бобозода
Добавить комментарий
Ахбор
Ҷ. Балхӣ. Мумфаршкунии 6 километр роҳ оғоз гардид 13:03МУЛОҚОТИ РАИСИ ВИЛОЯТИ ХАТЛОН ДАВЛАТАЛӢ САИД БО НАМОЯНДАГОНИ МАГАТЭ: ТАҲКИМИ ҲАМКОРИҲО БАРОИ РУШДИ СОҲАИ ТАНДУРУСТӢ 13:25ХАТЛОН.РӮЗИ БАЙНАЛМИЛАЛИИ ҲИФЗИ КӮДАКОН ТАҶЛИЛ ГАРДИД 15:18ДАР ВИЛОЯТИ ХАТЛОН БОРИ НАХУСТ КУРСИ АЗНАВТАЙЁРКУНИИ КАДРҲОИ ДАР ЗАХИРАБУДАИ ХИЗМАТИ ДАВЛАТӢ РОҲАНДОЗӢ ГАРДИД 11:12ПАЁМИ ТАБРИКИИ РАИСИ ВИЛОЯТИ ХАТЛОН ДАВЛАТАЛӢ САИД БА МУНОСИБАТИ РӮЗИ БАЙНАЛМИЛАЛИИ ҲИФЗИ КӮДАКОН 10:05НАХУСТНАМОИШИ “МЕТРАНПАЖ” ДАР ТЕАТРИ ВИЛОЯТӢ 10:56ФУРӮҒИ МАЪРИФАТ ДАР ЯК ХОНАДОНИ ТОҶИК 10:49ПАЁМИ ШОДБОШИИ РАИСИ ВИЛОЯТИ ХАТЛОН ДАВЛАТАЛӢ САИД БА МУНОСИБАТИ ФАРОРАСИИ ИДИ САИДИ ҚУРБОН 16:35
Маҷаллаи №6-2019
Серхонандаҳо
МАРҲИЛАИ ДУЮМИ АЗНАВСОЗӢ ВА ТАЪСИСИ МЕДИАТЕКАИ ПРЕЗИДЕНТИ ҶУМҲУРИИ ТОҶИКИСТОН ДАР КИТОБХОНАИ ВИЛОЯТИИ БА НОМИ ШАМСИДДИН ШОҲИН ВА ОҒОЗИ АЗНАВСОЗИИ КИТОБХОНАИ ВИЛОЯТӢ ДАР ШАҲРИ КӮЛОБ
ҶАЙҲУН. 1,1 КИЛОМЕТР РОҲ МУМФАРШ КАРДА ШУД
БОХТАР. БОЗ ЯК КӮДАКИСТОНИ НАВУ ЗАМОНАВӢ БУНЁД МЕШАВАД
ЛЕВАКАНТ. НИЁЗМАНДЕ СОҲИБИ ХОНА МЕШАВАД
РӮЗИ БАЙНАЛМИЛАЛИИ ОИЛА- ҶАШНИ МЕҲР ВА ҲАМДИГАРФАҲМӢ
ҶАВОНОН ВА МАСЪУЛИЯТИ ОИЛАДОРӢ
ҲАБИБ САФАРОВ. ЗИНДАГИНОМАИ ҚАҲРАМОНИ 102 – СОЛА
ҲАМОИШ БАХШИДА БА РӮЗИ БАЙНАЛМИЛАЛИИ ОИЛА
Ҷ. Балхӣ. Мумфаршкунии 6 километр роҳ оғоз гардид
ОИЛА – ПОЙДЕВОРИ ҶОМЕАИ СОЛИМ
